လါအီးကထိဘၢၣ် ၁၃သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, ကီးတရံးကီၢ်ဆၣ်, နီၢ်မံးသ၀ီကျဲမုၢ်အဖီခိၣ် KNLAသုးပၥ်ဖှိၣ် ဒီး DKBAဘိၣ်ဘံးသုးကရၢအဘၢၣ်စၢၤ တၢ်ဘၣ်သဂၢၢ်ဒုးလိၥ်သးကဲထီၣ်၀ဲ၀ံၤ တၢ်ဖီၣ်န့ၢ်ဃၥ်၀ဲ DKBAဘိၣ်ဘံးအပှၤသုးဖိတနီၤအဂ့ၢ် တၢ်သ့ၣ်ညါဘၣ်လၢ ပှၤလၢအိၣ်ဘူးဒီး KNLAဂံၢ်ခီၣ်ထံးသုးဂ့ၢ်၀ီအအိၣ်န့ၣ်လီၤ.
လါအီးကထိဘၢၣ် ၁၁သီ, မဟါအနံၤ, မုၢ်ထူၣ်၂နၣ်ရံၣ်ဘျဲၣ်အဆၢကတီၢ် DKBAဘိၣ်ဘံးအသုးဒီး သုးကီၣ်မံးရှၢၣ်အသုးတဖၣ် ဟဲထီၣ်သုးကျိၤဆူ မၠးပတဲၣ်, နီၢ်မံးသ၀ီတပၤအဃိ တၢ်ဘၣ်သဂၢၢ်ဒုးလိၥ်သးကဲထီၣ်၀ဲဒီး KNLAသုးပၥ်ဖှိၣ်အဘၢၣ်စၢၤ၀ံၤ တၢ်ဒုးဆူၣ်၀ဲအဂ့ၢ် စံး၀ဲန့ၣ်လီၤ.
တၢ်ဒုးအပူၤ DKBAဘိၣ်ဘံးသုးပၥ်ဖှိၣ်တပၤ တၢ်ဘၣ်ဒိဘၣ်ထံးအါ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“စကမ အပှၤသုးဖိဒီး DKBAဘိၣ်ဘံးသုးကရၢတဖၣ် တၢ်ဘၣ်ဒိဘၣ်ထံးအါ၀ဲလီၤ. တၢ်ဖီၣ်န့ၢ်မူဒံးတဂၤန့ၣ်လီၤ.ပှၤလၢဘၣ်ဒိတဖၣ် တၢ်လဲၤဆှၢဃၥ်အီၤဆူ နဘူတၢ်ဆါဟံၣ်အဂ့ၢ်” KNLAဂံၢ်ခီၣ်ထံးသုးဂ့ၢ်၀ီတၢ်ကစီၣ် စံး၀ဲန့ၣ်လီၤ.
DKBA သုးပၥ်ဖှိၣ်လၢ ဘၣ်ဂုၤက့ၤအခံအံၤ ခးလီၤ၀ဲကျိဖးဒိၣ်ဒီး ဒြိတဖၣ်ဆူ ထံဖိစၣ်သ၀ီတပၤအဃိ လီၢ်က၀ီၤကမျၢၢ်ဖိတဖၣ်စ့ၢ်ကီး ဘၣ်ဃ့ၢ်ပူၤဖျဲးထီၣ်သးအဂ့ၢ် တၢ်သ့ၣ်ညါဘၣ်န့ၣ်လီၤ.
“ထံဖိစၣ် ကီးဖၣ်ယဲးသ၀ီဖိတဖၣ် ဘၣ်လဲၤဃ့ၢ်ပူၤဖျဲးအသးဆူ ကူၣ်မီၣ်တဲၣ်သ၀ီတပၤအိၣ်အသိး တနီၤစ့ၢ်ကီး လဲၤဃ့ၢ်ပူၤဖျဲးအသးဆူ သ၀ီတပၤန့ၣ်လီၤ. ထံဖိစၣ်သ၀ီ ကူၣ်မီၣ်တဲၣ်တပၤစ့ၢ်ကီး ပှၤသူၣ်ခ့သးပှၢ်ဒီး ဖိသၣ်တဖၣ်အိၣ်၀ဲလီၤ. ပှၤလၢအိၣ်ဖဲန့ၣ်တဖၣ်စ့ၢ်ကီး ကဃ့ၢ်ပူၤဖျဲးအသးအဂီၢ် အိၣ်ကတီၤ၀ဲအဂ့ၢ်” ဟီၣ်က၀ီၤဂံၢ်ခီၣ်ထံးတၢ်ကစီၣ် စံးကဒီး၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ သုးကီၣ်မံးရှၢၣ်အသုးအံၤ စးထီၣ်လၢလါအီးကထိဘၢၣ်၇သီအနံၤန့ၣ် ဟဲထီၣ်ဒုး သုးက့(၇)ဟီၣ်က၀ီၤအပူၤ KNLAဒီးသိၣ်မှံသုးပၥ်ဖှိၣ်တဖၣ် ပၢဆှၢဃၥ်တၢ်လီၢ်တဖၣ်၀ံၤ ဖီၣ်ဆူၣ်၀ဲစ့ၢ်ကီး နဘူ, မၠးပတဲၣ်, နီၢ်ထးပၣ်သ၀ီကမျၢၢ်ဖိတဖၣ်စ့ၢ်ကီး အိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: မောင်း
