လါအီးကထိဘၢၣ် ၁၃သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တနီသရံၣ်ကီၢ်ခီ, ဒ၀ဲၢ်၀့ၢ် ကိတိၥ်ဟံၣ်လီၢ်, ခလရ ၁၀၄သုးရ့ၣ်ဒီး ယ့ၣ်ဖၠူၣ်၀့ၢ်ပၢၤကီၢ်သုးကလၢၤတဖၣ် ဘၣ်တၢ်လဲၤဒုးအီၤလၢဒြိအဂ့ၢ် ဒူၣ်ရးကးသုးကျိၤ စံး၀ဲန့ၣ်လီၤ.
လါအီးကထိဘၢၣ် ၅သီ, မုၢ်ထူၣ် ၁၂နၣ်ရံၣ်ဃၣ်ဃၣ်အဆၢကတီၢ် သုးကီၣ်မံးရှၢၣ်အသုးလၢအိၣ်ဆီလီၤဃၥ်အသး ဖဲ ယ့ၣ်ဖၠူၣ်ကီၢ်ဆၣ်, ယ့ၣ်ဖၠူၣ်၀့ၢ်ပၢၤကီၢ်သုးကလၢၤတဖၣ် ဘၣ်တၢ်လဲၤဒုးအီၤလၢဒြိအဂ့ၢ်, ဖဲလၢတၢ်လဲၤဒုးအီၤအပူၤ သုးကီၣ်မံးရှၢၣ်တကပၤ သံဒီးဘၣ်ဒိအိၣ်တအိၣ် တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်န့ၣ်အသိး ဖဲအနံၤ, ဟါလီၤခီ ၄နၣ်ရံၣ်ဘျဲၣ်အဆၢကတီၢ် သုးကီၣ်မံးရှၢၣ်အသုးလၢ အိၣ်ဆီလီၤဃၥ်အသး ဖဲဒ၀ဲၢ်၀့ၢ်ကိတိၥ်ဟံၣ်လီၢ်အပူၤတဖၣ်ဘၣ်တၢ်လဲၤဒုးအီၤလၢဒြိ၀ံၤ သုးကီၣ်မံးရှၢၣ်တပၤ တၢ်ဘၣ်ဒိဘၣ်ထံးနီၣ်ဂံၢ်နီၣ်ဒွးတဖၣ် တၢ်မၤလီၤတံၢ်အီၤတန့ၢ်ဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ဖဲလါအီးကထိဘၢၣ် ၈သီ, ဟါ၇နၣ်ရံၣ်ဃၣ်ဃၣ်အဆၢကတီၢ် တၢ်ပၢၢ်ဆၢသုးပၥ်ဖှိၣ်တဖၣ် လဲၤဒုးကဒီး၀ဲ လီလိၣ်ကီၢ်ဆၣ် ခလရ ၁၀၄သုးရ့ၣ်လၢဒြိအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲလၢတၢ်လဲၤဒုးအီၤလၢ ဒြိတဖၣ်အပူၤ ဒ၀ဲၢ်ဒီကလုၥ်တၢ်ထူၣ်ဖျဲးသုးမုၢ်ဒိၣ်(DNLA) အဒူၣ်ရးကးသုးကျိၤ (Drone Team ) ဒီး DEF (Drone Team)တဖၣ် ပၥ်ဖှိၣ်လဲၤဒုးဃီၤ၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ထံဖိကီၢ်ဖိကမျၢၢ်တဖၣ်တခီ တၢ်မၤဆူၣ်ထီၣ်သုးဂ့ၢ်၀ီတဖၣ် ဖဲထံကီၢ်ဒီတဘ့ၣ်အပူၤအဃိ တၢ်ကလ့ၤလိၤဟးထီၣ်ဘၣ်လၢ တၢ်ပလီၢ်ပဒီအပူၤအဂီၢ် ဟ့ၣ်သဆၣ်ထီၣ်ဃၥ်၀ံၤ တနီသရံၣ်ကီၢ်ခီအပူၤ သုးကီၣ်မံးရှၢၣ်တပၤ ဟဲဒုးတၢ်လၢကလံၤကျါ ကိးဆၢကတီၢ်ဒဲးအပူၤသ့အဃိ ကလူၤပိၥ်မၤထွဲ ဘၣ်ထွဲဒီးကလံၤကျါတၢ်ဒီသဒၢတၢ်ဂ့ၢ်တၢ်ကျိၤတဖၣ်အဂီၢ်ဒီးတၢ်ပၢၢ်ဆၢဒီးသုးဂ့ၢ်၀ီတဖၣ်အသဟီၣ်ဆူၣ်ထီၣ်တဘျီဃီအဆၢကတီၢ် သုးဖိဒီး ပၢၤကီၢ်သုးတဖၣ်လၢ အဲၣ်ဒိးပၥ်ဖှိၣ်မၤသကိးတၢ်ဒီး ကမျၢၢ်တဖၣ် ကဟဲပၥ်ဖှိၣ်မၤသကိးတၢ်လၢအဆိအချ့အဂီၢ် ဒူၣ်ရးကးသုးကျိၤ ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
Crd: KTM
