လါအီးကထိဘၢၣ် ၈သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်ကၠီၣ်တဲၣ်ပူၤ မုၥ်ကျိၤ၀ဲၤကွၥ်ဆံးလီၤစှၤလီၤအဃိ တၢ်မၤလီၢ်အါတက့ၢ်အပူၤ တၢ်မၤစှၤလီၤကွံၥ်၀ဲ ပှၤမၤတၢ်ဖိနီၣ်ဂံၢ်၀ံၤ ဖဲအပူၤကွံၥ်တနွံအတီၢ်ပူၤ စဲးဖီကဟၣ်တၢ်မၤလီၢ်ဒီး တၢ်မၤလီၢ် (၈)လီၢ်အပူၤ ကီၢ်ပယီၤခီကီၢ်ပှၤမၤတၢ်ဖိ ၃,၀၀၀ဘျဲၣ် ဘၣ်တၢ်မၤစှၤလီၤကွံၥ်၀ဲအဂ့ၢ် တၢ်သ့ၣ်ညါဘၣ်လၢ တၢ်မၤစၢၤပှၤမၤတၢ်ဖိကရၢ Myanmar Humanitarian Action Centre (MHAC)အအိၣ်န့ၣ်လီၤ.
ကီၢ်ကၠီၣ်တဲၣ်ပူၤ ဖဲအပူၤကွံၥ် လါစဲးပထ့ဘၢၣ် ၃၀သီအနံၤစ့ၢ်ကီး ဖ့းဘူၣ်ရံၣ်ကီၢ်ရ့ၣ်အိၣ် CDစဲးဖီကဟၣ်တၢ်မၤလီၢ်အပူၤ ပှၤမၤတၢ်ဖိ ၁,၄၅၀ဂၤ ဘၣ်တၢ်ထုးထီၣ်ကွံၥ်အီၤလၢတၢ်မၤ၀ံၤ ဖဲအပူၤကွံၥ်စှၤသီအတီၢ်ပူၤဒီး ခဲအံၤစှၤသီအတီၢ်ပူၤ စဲးဖီကဟၣ်တၢ်မၤလီၢ်လၢ မၤလီၤစှၤကွံၥ်ပှၤမၤတၢ်ဖိ အိၣ်ထီၣ်၀ဲ ၁၀ဘျဲၣ်လံအဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိလၢ မုၥ်ကျိၤ၀ဲၤကွၥ်တၢ်အိၣ်သးတဖၣ်အဃိ တၢ်မၤစှၤလီၢ်ကွံၥ်ပှၤမၤတၢ်ဖိတၢ်ဂ့ၢ်သ့ၣ်တဖၣ် ဟဲကဲထီၣ်အသးလၢကီၢ်ကၠီၣ်တဲၣ်တၢ်လီၢ်သကုးအပူၤ၀ံၤ ခီကီၢ်ပှၤမၤတၢ်ဖိ ၃၀၀၀ဘျဲၣ်လၢ ဘၣ်တၢ်ထုးထီၣ်ကွံၥ်တၢ်မၤတဖၣ် MHACကရၢ ဘၣ်ဟးထိၣ်ဃူဘှါရှဲန့ၢ်၀ဲဒီး တၢ်မၤကစၢ်တဖၣ်အဂ့ၢ်န့ၣ်လီၤ.
“ဘၣ်မနုအဃိ ဘၣ်တၢ်ထုးထီၣ်ကွံၥ်အီၤ ပှၤမၤတၢ်ဖိဒီဒူၣ်ဒီထၢလဲၣ်န့ၣ် ကၠီၣ်တဲၣ်အပူၤ အပူၤကွံၥ်နံၣ်တဖၣ်အပူၤ ကၠီၣ်တဲၣ်တူၢ်လိၥ်၀ဲ တရူးထံဖိကီၢ်ဖိတၢ်မၤကစၢ်တဖၣ် အါအါဂီၢ်ဂီၢ်အဃိလီၤ. တရူးတဖၣ်န့ၣ် ဒုးအိၣ်ထီၣ်၀ဲ စဲးဖီကဟၣ်တၢ်မၤလီၢ်တဖၣ်လီၤ. အါအါဂီၢ်ဂီၢ်လီၤ. အမဲရကၤအပူၤ ဒီၣ်နၢၣ်ထရၢး ကဲထီၣ်ကီၢ်ခီ၀ံၤအလီၢ်ခံ အမဲရကၤဖီလစံၣ်အဖီခိၣ် ကၠီၣ်တဲၣ်ပူၤ တရူးတၢ်မၤလီၢ်တဖၣ်အါထီၣ်၀ဲလီၤ. ခီဖျိတရူးတၢ်မၤလီၢ်တဖၣ်အါအဃိ တၢ်ထၢအါထီၣ် ခိသွဲဃုၥ်ဒီး မုၥ်ကျိၤ၀ဲၤကွၥ်စ့ၢ်ကီး ဆံးလီၤစှၤလီၤ၀ဲလီၤ. တၢ်ပိၥ်ထွဲထီၣ်အခံန့ၣ် စဲးဖီကဟၣ်တၢ်မၤလီၢ်တဖၣ်အပူၤ ဘၣ်တၢ်မၤစှၤလီၤကွံၥ်၀ဲပှၤမၤတၢ်ဖိဒီဒူၣ်ဒီထၢ”အဂ့ၢ် AAC ကိၣ်ယဲမ့ စံး၀ဲန့ၣ်လီၤ.
ကတီၢ်ခဲအံၤ တၢ်မၤကစၢ်တဖၣ် ထုးထီၣ်ကွံၥ်ပှၤမၤတၢ်ဖိတဖၣ်အပူၤ ပၣ်ဃုၥ်ဒီးပှၤမၤတၢ်ဖိနံၣ်ယံၤလါထၢတဖၣ်တကးဘၣ် ပှၤမၤတၢ်ဖိအသီတဖၣ်အဃိ ပှၤမၤတၢ်ဖိ သဲးစတၢ်ဘျၢအဖီခိၣ် တၢ်န့ၢ်သါအဂီၢ်စ့ၢ်ကီး တၢ်ကီတၢ်ခဲအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ကၠီၣ်တဲၣ်အပူၤ ဖဲအပူၤကွံၥ် လါအီးကထိဘၢၣ် ၃သီအနံၤစ့ၢ်ကီး ခၠၣ်ခၠ့ၣ်ဆီၣ်ကီၢ်ရ့ၣ်အိၣ် တၢ်မၤလီၢ်တခါအပူၤ ပှၤမၤတၢ်ဖိ ၃၂၀ဘျဲၣ် ဘၣ်တၢ်ထုးထီၣ်ကွံၥ်အီၤလၢတၢ်မၤအဃိ MHACကရၢ ဘှါရှဲန့ၢ်၀ဲအဃိ ကတီၢ်ခဲအံၤန့ၣ် ဒိးန့ၢ်၀ဲ တၢ်ဟ့ၣ်စ့အီၣ်လိး စ့ယိၤ ၃ကကွဲၢ်( ၃,၀၀၀,၀၀၀)အဂ့ၢ် တၢ်သ့ၣ်ညါဘၣ်န့ၣ်လီၤ.
“ဒ်သိးအခဲအံၤ တၢ်ထုးထီၣ်ပှၤမၤတၢ်ဖိဒီဒူၣ်ဒီထၢတၢ်ဂ့ၢ်သ့ၣ်တဖၣ်န့ၣ် ကဲထီၣ်တ့ၢ်ဒိၣ်ဒိၣ်မုၢ်မုၢ်လၢအပူၤကွံၥ် ၂နံၣ်ဃၣ်ဃၣ်န့ၣ်လီၤ. ဖဲန့ၣ်ခါစ့ၢ်ကီး ပှၤမၤတၢ်ဖိ အကလးတဖၣ် ဘၣ်တၢ်ထုးထီၣ်ကွံၥ်အီၤလၢတၢ်မၤန့ၣ်လီၤ. အခဲစ့ၢ်ကီး တၢ်ဂ့ၢ်သ့ၣ်တဖၣ် စးထီၣ်ကဲထီၣ်သးလံအဂ့ၢ် လၢယတၢ်လဲၤခီဖျိအဖီခိၣ် ထံၣ်ဘၣ်၀ဲ”အဂ့ၢ် ကိၣ်ယဲမ့ တဲအါထီၣ်၀ဲန့ၣ်လီၤ.
ကီၢ်ကၠီၣ်တဲၣ်ပူၤမုၥ်ကျိၤ၀ဲၤကွၢ်ဆံးလီၤစှၤလီၤတၢ်ဃံးတၢ်စ့ၢ်တဖၣ်အဃိ ဘၣ်တၢ်မၤစှၤလီၤကွံၥ် ပှၤမၤတၢ်ဖိတဖၣ်အိၣ်ထီၣ်ဘၣ်ဆၣ် ပှၤကီၢ်ပယီၤဖိတဖၣ်န့ၣ် ခီဖျိလၢ သုးကီၣ်မံးရှၢၣ်ထၢန့ၢ်ဆူၣ်သုးဒီးမုၥ်ကျိၤ၀ဲၤကွၥ် ဆံးလီၤစှၤလီၤအဃိ ဟဲနုၥ်လီၤတဖိးသဲစးလၢ ကၠီၣ်တဲၣ်ပူၤအိၣ်ထီၣ်၀ဲ ကိးမုၢ်နံၤဃၣ်ဃၣ်၀ံၤ ဘၣ်တၢ်ဖီၣ်န့ၢ်အီၤတဖၣ်စ့ၢ်ကီး အိၣ်ထီၣ်၀ဲကိးမုၢ်နံၤဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအပူၤကွံၥ် လါစဲးပထ့ဘၢၣ် ၃၀သီအနံၤစ့ၢ်ကီး ကီၢ်ပယီၤဖိ ၉၀ဘျဲၣ်လၢ ဟဲနုၥ်လီၤတဖိးသဲစးလၢ ကၠီၣ်တဲၣ်-ပယီၤကီၢ်ဆၢ ကၣ်ခၠးနးဘူၣ်ရံၣ်ကီၢ်ရ့ၣ်ပူၤတဖၣ် ဘၣ်တၢ်ဖီၣ်န့ၢ်အီၤအဂ့ၢ် တၢ်သ့ၣ်ညါဘၣ်လၢ ကၠီၣ်တဲၣ်တၢ်ကစီၣ်သန့တဖၣ်အအိၣ်န့ၣ်လီၤ.
