လါအီးကထိဘၢၣ်(၇)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၫ်တၫ်စိတၫ်ကမီၤ၀ံၤအလီၫ်ခံ လၢတၫ်ကီတၫ်ခဲဒီးသးသမူတၫ်တၤတၫ်အကျါ ကၠိသရၣ်/သရၣ်မုၣ် လၢတူၫ်နး တူၫ်ဖီၣ်အသးဒီးမၤလိန့ၫ်ဖိသၣ်တၫ်ကူၣ်ဘၣ်ကူၣ်သ့တဖၣ် ပာ်လုၫ်ပာ်ပှ့ၤမၤလၤမၤကပီၤဘၣ်၀ဲအဂ့ၫ် ကညီဒီကလုာ် စၢဖှိၣ်ကရၢ(KNU)တဲ၀ဲလီၤ.
ဖဲလါအီးကထိဘၢၣ်(၅)သီနံၤ လီၤဘၣ်(၃၁)နံၣ်ပှဲၤထီၣ် ဟီၣ်ခိၣ်ဒီဖျၢၣ်သရၣ်တဖၣ်အမုၫ်နံၤန့ၣ် ထုးထီၣ်ဘိးဘၣ်ရၤ လီၤလံာ်တဘ့ၣ်ဒီးမၤလၤကပီၤ၀ဲလီၤ.
တၫ်ထုးထီၣ်ဘိးဘၣ်ရၤလီၤအပူၤ သုးတပၤ ဟံးန့ၫ်ထံကီၫ်တၫ်စိတၫ်ကမီၤ၀ံၤအလီၫ်ခံ ကီၫ်သူလ့ၤတၫ်ပၢဟီၣ်က၀ီၤ တဖၣ်အပူၤ လၢကမၤဟးဂီၤတၫ်ကူၣ်ဘၣ်ကူၣ်သ့အဂီၫ် လၢတၫ်ပညိၣ်အိၣ်အပူၤဒုးခးလီၤ၀ဲ တၫ်သိၣ်လိကၠိတဖၣ် လၢကျိဖးဒိၣ်ဒီးကလံၤကျါတဖၣ် မၤကမၣ်၀ဲတပယူာ်ဃီအဂ့ၫ် ပာ်ဖျါ၀ဲလီၤ.
အတၫ်ဒုးဃီၤတဖၣ်အဃိ တၫ်သိၣ်လိကၠိ ဘၣ်ဟးဂီၤကွံာ်အါမးဒီးကၠိဖိမုၣ်/ခွါဒီးသရၣ်/သရၣ်မုၣ်တဖၣ် ဘၣ်သိၣ် လိမၤလိတၫ်လၢ တၫ်ပျံၤတၫ်ဖုးပူၤအဂ့ၫ်KNUတဲ၀ဲလီၤ.
၂၀၂၅-၂၀၂၆ နံၣ် တၫ်မၤလိအပူၤ ကညီကူၣ်သ့ဆဲးလၤ၀ဲၤကျိၤ(KECD)တီခိၣ်ရိၣ်မဲ၀ဲ၀ံၤ ကီၫ်သူလ့ၤတၫ်ပၢဟီၣ်က၀ီၤ အပူၤ အိးထီၣ်ဃာ်၀ဲ ကၠိခဲလၢာ် ၁,၇၃၈ကၠိဒီးလၢကၠိဖိမုၣ်/ခွါတဖၣ်အဂီၫ် ပာ်လီၤန့ၫ်၀ဲ သရၣ်/သရၣ်မုၣ် ၁၁,၉၃၉ဂၤ ဃၣ်ဃၣ်ဒီးသိၣ်လိန့ၫ်၀ဲလံာ်န့ၣ်လီၤ.
KNUတခီ လၢတၫ်ကီတၫ်ခဲအကျါ သရၣ်/သရၣ်မုၣ်တဂၤစုာ်စုာ်လၢသိလိန့ၫ်တၫ်တဖၣ် ပာ်လုၫ်ပာ်ပှ့ၤကဒီးဘၣ်၀ဲဒီး မၤလၤကပီၤဘၣ်၀ဲအဂ့ၫ် ပာ်ဖျါ၀ဲလီၤ.
သုးခီၫ်မံးရှၢၣ်တကပၤ ပညိၣ်ဒုးခးလီၤတၫ်သိၣ်လိကၠိတဖၣ်တပယူာ်ဃီအဃိ ၂၀၂၅နံၣ်,လါယနူၤအါရံၤ တုၤ လါစဲးပထ့ဘၢၣ်(၉)သီနံၤအတီၫ်ပူၤ ကညီကီၫ်စဲၣ်ပူၤ တၫ်သိၣ်လိကၠိ(၁၈)ဖျၢၣ်ဘၣ်ဟးဂီၤ၀ံၤ ကၠိဖိမုၣ်/ခွါ ဘၣ်ဒိ၀ဲ(၃၆)ဂၤအဂ့ၫ် တၫ်သ့ၣ်ညါဘၣ်လီၤ.တကးဘၣ်ကၠိသရၣ်/သရၣ်မုၣ် ဘၣ်ဒိ(၂)ဂၤဒီးကၠိဖိမုၣ်/ခွါ ဘၣ်သံ(၁၅)ဂၤအဂ့ၫ် KNUအတၫ်ထုးထီၣ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
တၫ်န့ၣ်အဃိ ကီၫ်သူလ့ၤတၫ်ပၢဟီၣ်က၀ီၤအပူၤ ကၠိသရၣ်/သရၣ်မုၣ်ဒီးကၠိဖိမုၣ်/ခွါတဖၣ် ကမၤလိဘၣ်တၫ် လၢတၫ် သဘျ့ခွဲးယာ်အပူၤဒီးကပူၤဖျဲးဒီးသးသမူတၫ်လီၤဘၣ်ယိၣ်တဖၣ်န့ၣ် တၫ်ကမၤစၢၤဘၣ်အဂီၫ်ဒီးသုးကရူၫ်လၢ မၤကမၣ် တ့ၫ်တၫ်တဖၣ်အံၤ အတၫ်ကမၣ်အဂီၫ် တၫ်ကဟ့ၣ်တၫ်ဆီၣ်သနံးဟံးန့ၫ်ဂ့ၫ်၀ီအဂီၫ် ထံဂုၤကီၫ်ဂၤတၫ်ကရၢ ကရိတဖၣ် ဒီးကမျၢၫ်တၫ်ကရၢကရိတဖၣ်တဖၣ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ တဲဆီၣ်တခူထီၣ်ဃာ်၀ဲလီၤ.
