လါစဲးပထ့ဘၢၣ် ၃၀သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၣ်မံးရှၢၣ်အသုး ကဘီယူၤ လဲၤတ့ၢ်လီၤမ့ၣ်ပိၢ်ဆူ ခၠီကီၢ်စဲၣ်, ပလဲး၀း၀့ၢ်အပူၤအဃိ ကမျၢၢ်ဘၣ်သံ၀ဲ၂ဂၤ၀ံၤ ဘၣ်ဒိ၀ဲ၂၀ဂၤဃၣ်ဃၣ်အဂ့ၢ် ပလဲး၀းကီၣ်ကး ခၠီကီၢ် ပှၤဘၣ်မူဘၣ်ဒါတဂၤ စံး၀ဲန့ၣ်လီၤ.
လါစဲးပထ့ဘၢၣ် ၂၉သီအနံၤ, မုၢ်ထူၣ် (၁၂း၃၀)နၣ်ရံၣ်အဆၢကတီၢ် သုးကီၣ်မံးရှၢၣ်အသုး အကဘီယူၤဒုးသုး Jet Fighter လဲၤဒုးတ့ၢ်လီၤ၀ဲ ပီၣ် ၅၀၀အိၣ် မ့ၣ်ပိၢ် ၃ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်မံးရှၢၣ်အသုး လဲၤဒုးတ့ၢ်လီၤမ့ၣ်ပိၢ်အပူၤ သးနံၣ် ၄၀နံၣ်အိၣ် ဒီၣ်သူၣ်စၣ်ဝ့(ကိး) ဘိးဘိးဒီး သးနံၣ် (၁၈)နံၣ်အိၣ် မမၠးမၠးခ့ၣ်တဖၣ်သံ၀ဲ၀ံၤ ၂၀ဂၤဃၣ်ဃၣ် ဘၣ်ဒိ၀ဲဒီး တၢ်သူၣ်ထီၣ်တဖၣ်စ့ၢ်ကီး ဟးဂူၥ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“လဲၤတ့ၢ်လီၤမ့ၣ်ပိၢ်န့ၣ် ပပၥ်ဂၢၢ်ပၥ်ကျၢၢ်သ့လီၤ. လဲၤတ့ၢ်၀ဲလၢ ၀့ၢ်ပူၤ, တၢ်ဆါဟံၣ်အကပၤန့ၣ်လီၤ. တၢ်ဘၣ်ဒိဘၣ်ထံးဒီးတၢ်သံတၢ်ပှၢ်နီၣ်ဂံၢ်စရီလီၤတံၢ်တခီ တသ့ၣ်ညါဘၣ်ဒံးဘၣ်. ဟံၣ်ဃီ, တၢ်သူၣ်ထီၣ်တၢ်ဟးဂူၥ်ဟးဂီၤတဖၣ်တခီ အိၣ်၀ဲလီၤ”အဂ့ၢ် ပလဲး၀းကီၣ်ကး ခၠီကီၢ် ပှၤဘၣ်မူဘၣ်ဒါ စံး၀ဲန့ၣ်လီၤ.
သုးကီၣ်မံးရှၢၣ်လဲၤဒုးတ့ၢ်လီၤမ့ၣ်ပိၢ်အပူၤ ပှၤဘၣ်ဒိဘၣ်ထံးတဖၣ်အကျါ သးသမူတၢ်လီၤဘၣ်ယိၣ်အိၣ်တဖၣ်စ့ၢ်ကီးပၣ်ဃုၥ်၀ဲအဂ့ၢ်, ၂၀၂၄နံၣ်, လါယနူၤအါရံၤ ၁၄သီအနံၤန့ၣ် ရၢၢ်ခၢၣ်သုးမုၢ်ဒိၣ် AA ပၢဆှၢန့ၢ်၀ဲ ပလဲး၀းကီၢ်ဆၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ရၢၢ်ခၢၣ်ကီၢ်စဲၣ်အပူၤ ဟီၣ်က၀ီၤတဖၣ်လၢ ရၢၢ်ခၢၣ်သုးမုၢ်ဒိၣ် AAပၢဆှၢဃၥ်၀ဲဒီး တၢ်ဒုးကဲထီၣ်သးတအိၣ် လၢ၀့ၢ်, ဒူသ၀ီအပူအိၣ် တၢ်သိၣ်လိကၠိ, ဖၠၣ်(ကျး),တၢ်ဆါဟံၣ်, တၢ်ဟ့ၣ်ကသံၣ်ဒၢးဒီး သီခါဖၠၣ်တဖၣ်လၢ ပှၤရိဖှိၣ်အါအါတဖၣ်အပူၤ သုးကီၣ်မံးရှၢၣ်အသုး လဲၤဒုးတၢ်လၢ ကလံၤကျါ, ထံကျါဒီး ကျိဖးဒိၣ်တဖၣ်အိၣ်ထီၣ်၀ဲတပယူၥ်ဃီအဃိ ထံဖိကီၢ်ဖိကမျၢၢ်တဖၣ် ကပလီၢ်သူၣ်ပလီၢ်သးလၢလၢပှဲၤပှဲၤအဂီၢ် ရၢၢ်ခၢၣ်ဒီကလုၥ်ကရၢ ULA/AA ဆီၣ်တခုထီၣ်ဃၥ်၀ဲန့ၣ်လီၤ.
