လါစဲးပထ့ဘၢၣ်(၂၉)သီ,၂၀၂၅နံၣ်, အၣ်ထူၣ်ခ့ၣ်တၢ်ကစီၣ်
အမဲရကၤကီၫ်ခိၣ် Donald Trumpန့ၣ် ထံၣ်လိာ်တၢၣ်ပီၣ်တဲသကိးတၫ်ဒီးတူၣ်ရကံၣ်ကီၫ်ခိၣ် Recep Tayyip Erdogan၀ံၤကပတုာ်ကွံာ်တၫ်ပှ့ၤရ့ၣ်နီၣ်သိလၢရၢးရှၢၣ်အိၣ်အဂီၫ် ဃ့ထီၣ်၀ဲလီၤ.
Donald Trumpန့ၣ် ဒိးန့ၫ်တၫ်ပာ်ဖှိၣ်မၤသကိးတၫ်ဒီးတူၣ်ရကံၣ်အဖီခိၣ် လီၤဂာ်ကပညိၣ်၀ဲလၢ တၫ်ဘှါဆှဲ ရၢးရှၢၣ် အတၫ်နုာ်လီၤဒုးယူၣ်ကရ့အဂီၫ်န့ၣ်လီၤ.
ကီၫ်တူၣ်ရကံၣ်န့ၣ် မ့ၫ်NATOကရၢထံကီၫ်ဘၣ်ဆၣ် ဟီၣ်ခိၣ်၀ီၤတၫ်အိၣ်သးအဖီခိၣ် အိၣ်လၢရၢးရှၢၣ်ဒီးယူၣ်ကရ့ အကပၤဒီးအိၣ်ဒီးတၫ်ရ့လိာ်ဘၣ်ထွဲဘူးဘူးတံၫ်တံၫ်ဒီးထံကီၫ်ခံဘ့ၣ်လၢာ်န့ၣ်လီၤ.
Donald Trumpန့ၣ် ဖဲလါစဲးပထ့ဘၢၣ်(၂၅)သီအနံၤ လၢဟံၣ်၀ါအပူၤ ထံၣ်လိာ်သးဒီးတူၣ်ရကံၣ်ကီၫ်ခိၣ် Erdogan အကတီၫ် ဃ့ထီၣ်၀ဲဒ်သိးအံၤန့ၣ်လီၤ.
ရၢးရှၢၣ်န့ၣ်ဒုးကဒီး၀ဲယူၣ်ကရ့တပယူာ်ဃီအဃိ အဲၣ်ဒိးလၢကပတုာ်ကွံာ်တၫ်ပှ့ၤရ့ၣ်နီၣ်သိလၢရၢးရှၢၣ်အိၣ်အဂ့ၫ် Donald Trumpတဲဘၣ် Erdoganန့ၣ်လီၤ.
တရူးဒီးအ့ဒံယါန့ၣ် ပှ့ၤ၀ဲဒၣ်ရ့ၣ်နီၣ်သိလၢရၢးရှၢၣ်အိၣ်ဒံးအဂ့ၫ် လၢဘီမုၫ်စၢဖှိၣ်ကရၢတၫ်အိၣ်ဖှိၣ်အပူၤ Donald Trump တဲလီၤ၀ဲဒီးထံကီၫ်ခံဘ့ၣ်လၢာ်လၢဆီၣ်ထွဲမၤစၢၤတၫ်ဒုးအံၤ ပာ်ဒ့ၣ်ပာ်ကမၣ်၀ဲလီၤ.
NATOကရၢထံကီၫ်ဒၣ်လဲၣ် တီၣ်သွီနုာ်ဂံၫ်ဘါသဟီၣ်လၢရၢးရှၢၣ်အိၣ်တလီၤစှၤဘၣ်အဂ့ၫ် အ၀ဲတဲ၀ဲလီၤ.
Erdoganန့ၣ် ရၢးရှၢၣ်ကီၫ်ခိၣ် Vladimir Putinဒီးယူၣ်ကရ့ကီၫ်ခိၣ်Volodymyr Zelenskyyတဖၣ် ပာ်ကဲဘၣ်၀ဲဒိၣ်မး အဂ့ၫ် Donald Trumpတဲ၀ဲန့ၣ်လီၤ.
