လါစဲးပထ့ဘၢၣ် ၂၆သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဒီကလုၥ်ဃူဖိးပဒိၣ်(NUG) ပတြီၥ်ကီၢ်ခိၣ် ဒူၣ်ဝၣ်လရှံၣ်လး ထံၣ်လိၣ်သးဒီး ကညီဒီကလုၥ်စၢဖှိၣ်ကရၢ(KNU) ကရၢခိၣ် ပဒိၣ်စီၤကွဲၤထူဝ့ ဒီး ကတိၤတၢၣ်ပီၣ်တဲသကိးတၢ်အဂ့ၢ် ပတြီၥ်ကီၢ်ခိၣ်ဒီးKNU လီၢ်ခၢၣ်သးထုးထီၣ်ပၥ်ဖျါဃၥ်၀ဲ တၢ်ကစီၣ်ဖဲ လါစဲးပထ့ဘၢၣ် ၂၅သီအနံၤ, ဟါလီၤခီအဆၢကတီၢ်န့ၣ်လီၤ.
ဖဲထံၣ်လိၣ်သးအခါ ကတိၤတၢၣ်ပီၣ်တဲသကိးတၢ်ဘၣ်ဃးဒီး တၢ်ပၢၢ်ဆၢ ကမၤနၢၤတၢ်အဆိအချ့ အဂ့ၢ်ဒီး တၢ်ပၢၢ်ဆၢ ကရူၢ်ကရၢ တခါဘၣ်တခါအဘၢၣ်စၢၤ ဖီၣ်လိၥ်စုပၥ်ဖှိၣ်မၤသကိးတၢ်အဂ့ၢ်သ့ၣ်တဖၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
တၢ်ပၢၢ်ဆၢ ကရူၢ်ကရၢတဖုဘၣ်တဖုအဘၣ်စၢၤ ကအိၣ်ဒီးတၢ်ဃူတၢ်ဖိးအါန့ၣ်အလီၢ်ဒီး ကီၢ်တဘ့ၣ်အံၤ ကထူၣ်ဖျဲးကွံၥ်လၢ သုးမီၤစိရိၤ စုဒုၣ်တီၤအဖီလၥ်, သုးမီၤစိရိၤ ဒီး ကယဲၢ်မ့ၢ် မီၤစိရိၤသနူခဲလၢၥ် ကလီၤမၢ်ကွံၥ်ဝဲအဂီၢ် ကမၤသကိးတၢ်န့ၣ်လီၤ. တၢ်သဘျ့ ,တၢ်မုၥ်တၢ်ခုၣ် ဒီး ကမျၢၢ်အိၣ်မုၥ်အိၣ်ခုၣ် အီၣ်ကူအီပှဲၤကအိၣ်အဂီၢ် ကဖီၣ်လိၣ် သးစုဂၢၤဂၢၤကျၢၤကျၢၤ ပၥ်ဖှိၣ်မၤသကိးတၢ်အဂ့ၢ် ခိၣ်နၢ်(၂)ဂၤ အၢၣ်လီၤတူၢ်လိၥ်သးအဂ့ၢ် စံ၀ဲန့ၣ်လီၤ.
KNU မ့ၢ် တၢ်ပၢၢ်ဆၢကရၢတဖုလၢ အထီဒါတ့ၢ်၀ဲ ပယီၤသုးမုၢ်ဒိၣ်ဟံးန့ၢ်ဆူၣ်ထံကီၢ်တၢ်စိတၢ်ကမီၤအဖီခိၣ် တဲၥ်တဲၥ်ဖျူဖျူ၀ံၤ ဟ့ၣ်၀ဲသုးတၢ်သိၣ်လိ ဆူပှၤသးစၢ်လၢ ကထီဒါသုးမီၤစိရိၤသုးတဖၣ် ဒီးဒီသဒၢန့ၢ်၀ဲ ပှၤလၢဘၣ်ထွဲဒီး ထံရူၢ်ကီၢ်သဲးဂ့ၢ်၀ီပှၤဘၣ်မူဘၣ်ဒါတဖၣ်ပၣ်ဃုၥ် ပှၤလၢဘၣ်ကွၢ်ဆၢၣ်မဲၥ်ဘၣ်ဒီး သုးကီၣ်မံးရှၢၣ်အတၢ်မၤပျံၤမၤဖုးတဖၣ်, ဖီၣ်လိၥ်စုမၤသကိးတၢ်ဒီး PDFသုးတဖၣ်၀ံၤ ဒုး၀ဲသုးကီၣ်မံးရှၢၣ်အသုးတဖၣ်န့ၣ်လီၤ.
NUG ဒီး KNUကရၢ ၂ဖုစလၢၥ်န့ၣ် ဘိးဘၣ်ရၤလီၤတ့ၢ်၀ဲလၢ ထီဒါ၀ဲတၢ်ဃုထၢအယီၤအဘျၣ်လၢ သုးကီၣ်မံးရှၢၣ်ကမၤ၀ဲအံၤ၀ံၤ ခီဖျိလၢတၢ်ဃုထၢအံၤအဃိ ထံရူၢ်ကီၢ်သဲးတၢ်ဂ့ၢ်ကီတဖၣ် ကဘံဘူအါထီၣ်ဒီး ကီၢ်ပယီၤဒီတဘ့ၣ် တၢ်သဘံၣ်သဘုၣ်တဖၣ် ကဆူၣ်ထီၣ်နးထီၣ်၀ဲအဂ့ၢ် ဘိးဘၣ်ရၤလီၤဃၥ်၀ဲလၢ အဖိးသဲစးန့ၣ်လီၤ.
မ့မ့ၢ်လၢ မီၤစိရိၤ သုးကီၣ်မံးရှၢၣ်တပၤတခီ ပှၤလၢအထီဒါတၢ်ဃုထၢအံၤတဂၤလၥ်လၥ်န့ၣ် ကဟံးန့ၢ်ဂ့ၢ်၀ီတုၤလီၤတီၤလီၤအဂ့ၢ် ဘိးဘၣ်ရၤလီၤဃၥ်၀ဲ၀ံၤ ဘိးဘၣ်ရၤလီၤ၀ဲ တၢ်ပၢၢ်ဆၢကရူၢ်ကရၢတဖၣ်ဒ် ကရၢတဖိးသဲစးတဖၣ်ဒီး လိၥ်ဘၢလိၥ်ကွီၢ်၀ဲတဖၣ် မၤ၀ဲတပယူၥ်ဃီန့ၣ်လီၤ.
