လါစဲးပထ့ဘၢၣ် ၂၆သီ, ၂၀၂၅နံၣ်, အၣ်ထူၣ်ခ့ၣ်တၢ်ကစီၣ်
သုးကီၣ်မံးရှၢၣ်ဒီးPNOသုးပၥ်ဖှိၣ်လၢ မၤပှၤဂံၢ်ဘါ လဲၤထီၣ်သုးကျိၤအဃိ ထံဖိကီၢ်ဖိကမျၢၢ်တဖၣ် သုတလ့ၤဟးထီၣ်ဘၣ်လၢ လွဲၢ်ကီၢ်-ဒံၣ်မီစိၤ-ဖရူၣ်ဆိၣ်-ဘဲလခဲကျဲမုၢ်ဖးဒိၣ်အဖီခိၣ်တဂ့ၤအဂီၢ် ကရ့ၣ်နံၣ်ဒီကလုၥ်တၢ်ဒီသဒၢသုးKNDF ဟ့ၣ်ပလီၢ်ထုးထီၣ်ဘိးဘၣ်ရၤလီၤဃၥ်၀ဲ ဖဲလါစဲးပထ့ဘၢၣ် ၂၄သီအနံၤန့ၣ်လီၤ.
စးထီၣ်လၢလါအီကူၥ်၂၀၂၅နံၣ်န့ၣ်သုးကီၣ်မံးရှၢၣ်သုးကျိၤတဖၣ်ဟဲထီၣ်လၢဒံၣ်မီစိၤဆူဖရူၣ်ဆိၣ်ကျဲမုၢ်ဖးဒိၣ်ဒီတကျိၤအဃိ တၢ်ဒုးတဖၣ်ကဲထီၣ်အသး တုၤခဲအံၤအနံၤ လါစဲးပထ့ဘၢၣ်အတီၢ်ပူၤအဂ့ၢ် အလံၥ်ဘိးဘၣ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး လါစဲးပထ့ဘၢၣ်အတီၢ်ပူၤ သုးကီၣ်မံးရှၢၣ်သိလ့ၣ်ကျိၤတနီၤန့ၣ် လဲၤနုၥ်လီၤ၀ဲဆူ ဖရူၣ်ဆိၣ်၀့ၢ်ပူၤန့ၢ်အဂ့ၢ် စံး၀ဲန့ၣ်လီၤ.
သုးကီၣ်မံးရှၢၣ်သုးကျိၤလၢအိၣ်ဖဲ ဖရူၣ်ဆိၣ်ကီၢ်ဆၣ်တဖၣ်အပူၤအံၤ မၤပှဲၤ၀ဲ တၢ်အီၣ်တၢ်အီ, ကျိချံပှၥ်သၣ်, သုးအဂံၢ်အဘါတဖၣ်၀ံၤ စးထီၣ်လၢလါစဲးပထ့ဘၢၣ်န့ၣ် ပညိၣ်ဟဲထီၣ်ဆူဘီလဲကျဲမုၢ်ဖဒိၣ်၀ံၤ ဟူးဂဲၤသုးဂ့ၢ်၀ီတဖၣ်အဃိ တၢ်ဘၣ်သဂၢၢ်ဒုးလိၥ်သးအိၣ်ထီၣ်၀ဲဒီး တၢ်ပၢၢ်ဆၢသုးပၥ်ဖှိၣ်အဘၢၣ်စၢၤအဂ့ၢ် စံး၀ဲန့ၣ်လီၤ.
ခီဖျိလၢ ဟီၣ်ခိၣ်လိၤသုးဂ့ၢ်၀ီတၢ်အိၣ်သးတဖၣ်အဃိ ဖရူၣ်ဆိၣ်-ထါလဲ-နါဖဲကျဲမုၢ်ဖးဒိၣ်ပၣ်ဃုၥ် ကျဲဖိလၢအလဲၤခီဆူကျဲမုၢ်ဖးဒိၣ်တဖၣ်ခဲလၢၥ် စးထီၣ်လၢလါစဲးပထ့ဘၢၣ် ၂၃သီ, ၂၀၂၅နံၣ်န့ၣ် တၢ်သုတလ့ၤလိၤဟးထီၣ်ဘၣ်အဂ့ၢ် ဟ့ၣ်ဒုးသ့ၣ်ညါဃၥ်၀ဲန့ၣ်လီၤ.
တကးဘၣ် သုးကီၣ်မံးရှၢၢ်အသုးဃုၥ်ဒီးPNOသုးပၥ်ဖှိၣ်တဖၣ် နီၤဖးလီၤ၀ဲသုးကျိၤ ၄ကျိၤ၀ံၤ ဟဲထီၣ်သုးကျိၤဆူ ဘီလခဲဟီၣ်က၀ီၤတကပၤအဂ့ၢ် ဂံၢ်ခီၣ်ထံးတၢ်ကစီၣ် လၢအိၣ်ဘူးဒီးကရ့ၣ်တၢ်ပၢၢ်ဆၢသုးစံး၀ဲန့ၣ်လီၤ.
“ခဲအံၤစှၤသီအတီၢ်ပူၤန့ၣ် သုးကီၣ်မံးရှၢၣ်ဒီး PNOတဖၣ်ပၥ်ဖှိၣ်ထီၣ်သး၀ံၤ ဟဲထီၣ်သုးကျိၤဆူ ဘီလခဲတပၤန့ၣ်လီၤ. ဖဲန့ၣ်အကျါ PNOအပှၤသုးဖိဂံၢ်ဘါ ပၣ်ဃုၥ်၀ဲ ၁၀,၀၀၀ဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ. လၢတပၤတခီ ဟးဒီၣ်တဲၥ်ကွံၥ်အသုးကျိၤတဖၣ်လီၤ. ဘၣ်ဆၣ်တၢ်ဘၣ်သဂၢၢ်လိၥ်သးတခီတအိၣ်ဒံးဘၣ်” အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
