လါစဲးပထ့ဘၢၣ် ၂၅သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီဒီကလုၥ်စၢဖှိၣ်ကရၢ-KNU ကရၢခိၣ် ပဒိၣ်စီၤကွဲၤထူ၀့န့ၣ် ခီဖျိလၢ တဲဆီၣ်တခုထီၣ် တဲဟးဂူၥ်ဟးဂီၤ တၢ်ဃုထၢလၢကမၤ၀ဲအံၤအဃိ ဖဲလါအီကူၥ် ၂၉သီအနံၤန့ၣ် သုးကီၣ်မံးရှၢၣ် လိၥ်ဘၢလိၥ်ကွီၢ်၀ဲလၢ တၢ်ဃုထၢသဲစးတၢ်ဘျၢ (ပ)၃၀/၂၀၂၅ ဖဲ၀့ၢ်လူပျဲၢ် ပၢၤကီၢ်သုးကလၢၤအပူၤအဂ့ၢ် MRTV ထုးထီၣ်ပၥ်ဖျါဃၥ်၀ဲ တၢ်ကစီၣ် ဖဲမဟါအနံၤန့ၣ်လီၤ.
တကးဘၣ် ဖဲလါစဲးပထ့ဘၢၣ်အပူၤန့ၣ် လိၥ်ဘၢလိၥ်ကွီၢ်ဃၥ်၀ဲ KNUခိၣ်နၢ်တဖၣ်လၢအမ့ၢ် ပဒိၣ်စီၤဆၢဂ့ၤ, ပဒိၣ်စီၤတၢ်ဒိၣ်မူ, ပဒိၣ်စီၤသီသံၣ်ပှဲၤ, ပဒိၣ်စီၤလးထိ, စီၤကၠီၣ်နံၣ်, စီၤတၢ်မျၢ်သီ, ပဒိၣ်စီၤလီၤအဲၣ်မူ, ပဒိၣ်စီၤအဲၣ်ကလုၢ်စ့, ပဒိၣ်နီၢ်ဒါဒါဒီး ပဒိၣ်စီၤတီနံဒီး စီၤဆၣ်ပလဲဒံၣ်၀ါတဖၣ် ဖဲလူပျဲၢ်၀့ၢ်ပၢၤကီၢ်သုးကလၢၤဒီး ကြုၢ်တုဟီၣ်က၀ီၤပၢၤကီၢ်သုးကလၢၤတဖၣ်အပူၤအဂ့ၢ် ပၥ်ဖျါဃၥ်၀ဲန့ၣ်လီၤ.
ဒ်န့ၣ်အသိး ဖဲလါစဲးပထ့ဘၢၣ် ၄သီအနံၤန့ၣ် သုးကီၣ်မံးရှၢၣ် လိၥ်ဘၢလိၥ်ကွီၢ်၀ဲစ့ၢ်ကီး ခၠီကီၢ်စဲၣ် Chinlandပဒိၣ်ကရၢဖိတဖၣ်လၢအမ့ၢ် အူပၣ်ထါ, ဒီးကထၢၣ် ရွ့ၣ်ခါ, အူထီၣ်စလျၣ်, အူရိၣ်ဘ့ၣ်, အူစ့ၣ်အီၣ်, ဆလဲခရီၣ်ထါ, ဒီးကထၢၣ် ရှရိၣ်ပၣ်, အူဆလဲမနါကံ, ဆလဲကၠိဆဲး လါရါလီၤမၣ်, ဒီၣ်နံၣ်ဆွံၣ်လျၣ်, အူမၣ်အိးခၣ်, အူထၣ်ကါလျၣ်, အူမီၣ်အူ, အူဟၣ်မိၣ်ယိလျၣ်, အူစလဲစထီ, ဒီးကထၢၣ် တံးန့ဒီး အူစ့ကၠိ ခဲလၢၥ် (၁၇)ဂၤတဖၣ် ဖဲ ဟၣ်ခါ၀့ၢ်ပၢၤကီၢ်သုးကလၢၤအဂ့ၢ် စံး၀ဲန့ၣ်လီၤ.
ဖဲလါအီကူၥ် ၂၇သီအနံၤ အ့ၣ်ယၣ်၀တံၣ်ကီၢ်ခီ, ယ့ဆဲးသ၀ီသီခါဖၠၣ်အပူၤ တၢ်ဟ့ၣ်တၢ်သိၣ်လိဘၣ်ဃး တၢ်ဟ့ၣ်တၢ်ဖးအဆၢကတီၢ် ရၢၢ်ခၢၣ်သုးမုၢ်ဒိၣ် AA ဒီး PDFကရၢလၢ ဟဲတ့ၢ်လီၤဒြိမ့ၣ်ပိၢ်တဖၣ်စ့ၢ်ကီး လိၥ်ဘၢလိၥ်ကွီၢ်ဃၥ်၀ဲ ဖဲ လ့မၠဲးနၣ်ကီၢ်ဆၣ်, အဲၣ်သပၠူၣ်ဟီၣ်က၀ီၤပၢၤကီၢ်သုးကလၢၤအပူၤန့ၣ်လီၤ.
လၢန့ၣ်အမဲၥ်ညါ “Khit Thit Media”တၢ်ကစီၣ်သန့ Telegram အပှၤဘၣ်မူဘၣ်ဒါတဖၣ်ဒီး ပှၤနီၢ်တဂၤစုၥ်စုၥ်လၢ အကွဲးထီဒါ တၢ်ဃုထၢအံၤလၢ Social Mediaပူၤတဖၣ်အါအါဂီၢ်ဂီၢ်စ့ၢ်ကီး လိၥ်ဘၢလိၥ်ကွီၢ်ဃၥ်၀ဲအဂ့ၢ်န့ၣ် ထုးထီၣ်ပၥ်ဖျါဃၥ်၀ဲတၢ်ကစီၣ်န့ၣ်လီၤ.
