လါစဲးပထ့ဘၢၣ် ၂၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ၀့ၢ်ရၤမတံကလံၤထံးတကပၤလၢ KNLAတီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်တဖၣ်ပၢဆှၢဃၥ် လ့က့ၣ်ကိၥ်၀့ၢ်အကပၤ ထံမဲၢ်၀ါခံသ၀ီအပူၤ ဖဲလါစဲးပထ့ဘၢၣ် ၂၃သီအနံၤ, ဂီၤအဆၢကတီၢ်န့ၣ် သုးကီၣ်မံးရှၢၣ်နီၤဖးလီၤ၀ဲ သုးကျိၤ၂ကျိၤ၀ံၤ ဟဲနုၥ်လီၤသုးကျိၤအဂ့ၢ် တၢ်မဲၥ်ညါဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
“သုးကီၣ်မံးရှၢၣ်န့ၣ် မၤန့ၢ်ဃၥ်၀ဲ လဲးခးကစၢၢ်လီၤ. မ့ၢ်န့ၢ်စ့ၢ်ကီး မဲၢ်၀ါခံန့ၣ် ထီၣ်၀ဲ လ့က့ၣ်ကိၥ်ကန့ၢ်တဘျီဃီလီၤ. တၢ်န့ၣ်အဃိ ဟဲထီၣ်ဒုးတၢ်ဖဲ မဲၢ်၀ါခံ”အဂ့ၢ် အ၀ဲတဲကဒီး၀ဲန့ၣ်လီၤ.
ထံမဲၢ်၀ါခံသ၀ီအံၤ KNUအစုတီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် KNLAဒီးတၢ်ပၢၢ်ဆၢသုးပၥ်ဖှိၣ်တဖၣ် ပၢဆှၢဃၥ်၀ဲ၀ံၤ အိၣ်စီၣ်စုၥ်ယံၤဒီး လ့က့ၣ်ကိၥ်၀့ၢ်သီထဲဒၣ် တမံၤလၤဘျဲၣ်န့ၣ်လီၤ.
သုးကီၣ်မံးရှၢၣ်အသုးန့ၣ် ဟဲဆီၣ်လီၤဃၥ် သုးကျိၤ၁ကျိၤ ဖဲ၀့ၢ်လ့က့ၣ်ကိၥ်အကပၤ၀ံၤ ခးလိၥ်သးလၢကျိဖးဒိၣ် ဒီးကညီတၢ်ပၢၢ်ဆၢသုးပၥ်ဖှိၣ်အဘၢၣ်စၢၤ၀ံၤ ကတဲၥ်ကတီၤဃၥ်၀ဲ ကဒုးတၢ်အဂ့ၢ်န့ၣ် ပှၤလၢသ့ၣ်ညါ၀ဲ ဟီၣ်ခိၣ်လိၤတၢ်အိၣ်သးတဂၤ စံး၀ဲန့ၣ်လီၤ.
“ဒုး၀ဲ ၀့ၢ်သီတန့ၢ်ဒံးဘၣ်. သုးကီၣ်မံးရှၢၣ်န့ၣ် မ့ၢ်ပညိၣ်မၤဒုးယၤရဲၣ်ကျဲၤလၢ လ့က့ၣ်ကိၥ်န့ၣ် ကဘၣ်ထီၣ်၀ဲဆူတၢ်လူၢ်ခိၣ်အဃိ သုးဂ့ၢ်၀ီတပၤတၢ်အိၣ်သးတဂ့ၤဘၣ်အဃိ ကပၢဆှၢဆိ၀ဲ ၀့ၢ်အဃၢၤ၀း၀း”အဂ့ၢ် အ၀ဲစံး၀ဲန့ၣ်လီၤ.
ဒ်န့ၣ်သိး တၢ်ပၢၢ်ဆၢသုးပၥ်ဖှိၣ်တဖၣ်ပၢဆှၢဃၥ် ၀့ၢ်ရၤမတံကလံၤထံးတပၤ စွဲၣ်တီၣ်ကိမျိၥ်သုးကလၢၤအံၤ စ့ၢ်ကီး သုးကီၣ်မံးရှၢၣ်တပၤ မၤ၀ဲတၢ်ထီၣ်ဒုးအဂ့ၢ် ဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
စွဲၣ်တီၣ်ကိကျိဖးဒိၣ်တၢ်တိၥ်ကူၣ်ကျဲၤသုးကလၢၤန့ၣ် မ့ၢ်သုးကလၢၤတဖၣ်လၢ ခးစၢၤ၀ဲကျိဖးဒိၣ်တဖၣ်ဆူ တၢ်ဒုးတဖၣ်လၢအကဲထီၣ်သးဖဲ ၀့ၢ်ရၤမတံအကပၤအသိး ဒ်သိးကဒုးမၤန့ၢ် သုးကလၢၤအံၤအဂီၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)ဒီး တၢ်ပၢၢ်ဆၢသုးပၥ်ဖှိၣ်တဖၣ် ဘၣ်ဒုး၀ဲတၢ်ဆၢကတီၢ်၃လါအတီၢ်ပူၤမး ဒုးမၤန့ၢ်၀ဲန့ၣ်လီၤ.
ဖဲ၂၀၂၄နံၣ် လါအီးကထိဘၢၣ်မး KNLAဒီးသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ သုးကလၢၤအံၤန့ၣ်လီၤ. သုးကီၣ်မံးရှၢၣ်တပၤတခီ ဘၣ်ထွဲးဒီး လ့က့ၣ်ကိၥ်၀့ၢ်သီတၢ်ဒုးတၢ်အိၣ်သးတဖၣ်အဖီခိၣ် ထုးထီၣ်ပၥ်ဖျါဃၥ်၀ဲတအိၣ်နီတမံၤဒံးဘၣ်.
