လါစဲးပထ့ဘၢၣ် ၁၈သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ၀ီၢ်လ့ၢ်ဟီၣ်က၀ီၤအပူၤ မူခိၣ်စူၤဒိၣ်၀ံၤ သူမွဲကျိထံဒိၣ်ထီၣ်အဃိ ပှၤလီၢ်အိၣ်ကမှံဖိဟံၣ်ဒုၣ် ၃၀ဃၣ်ဃၣ်လၢအိၣ်ဖဲ ထံကျိကၢၢ်နံၤတဖၣ် ဘၣ်ကွၢ်ဆၢၣ်မဲၥ်ဘၣ်ကဒီး ထံတၢ်လီၤဘၣ်ယိၣ်အဂ့ၢ် တၢ်သ့ၣ်ညါဘၣ်လၢ ပှၤလၢမၤစၢၤပှၤစံၣ်သုးပှၤလီၢ်အိၣ်ကမှံဖိတဖၣ်အအိၣ်န့ၣ်လီၤ.
“တနီၤန့ၣ် ထံဟဲထီၣ်တဘျီဃီအဃိ တပၢၤတဖၣ်, ခွးတဖၣ်, တၢ်ကူတၢ်သိးတဖၣ်, ယၣ်ဒီးပ့ၢ်ပီၣ်တဖၣ်စ့ၢ်ကီး လီၤထွံလၢထံအဃိ ကတီၢ်ခဲအံၤ ဘၣ်အိၣ်၀ဲဒၣ်ဒီးတၢ်ဒီသဒၢမူခိၣ်ထံတၢ်ပီးတၢ်လီ ဖဲ၀ီၢ်လ့ၢ်ထံကျိကၢၢ်နံၤအကပၤ”အဂ့ၢ် ပှၤမၤစၢၤပှၤလီၢ်အိၣ်ကမှံဖိလၢအမ့ၢ် မယံၣ်ယံၣ်စံး၀ဲန့ၣ်လီၤ.
ပှၤစံၣ်သုးပှၤလီၢ်အိၣ်ကမှံဖိတဖၣ်န့ၣ် အပူၤကွံၥ်အိၣ်၀ဲဒၣ်ဖဲ ၀ီၢ်လ့ၢ်ထးခီတပၤ၀ံၤ ခဲအံၤတၢ်ဒုးလၢအကဲထီၣ်သးတဖၣ်အဃိ ကတီၢ်ခဲအံၤန့ၣ် ဘၣ်အိၣ်၀ဲဒၣ်လၢ ဟံၣ်လၢအကစၢ်တအိၣ်၀ဲတဖၣ်အပူၤ ဖဲထံကျိကၢၢ်နံၤန့ၣ်လီၤ.
“ကၠီၣ်တဲၣ်တပၤစ့ၢ်ကီး တတူၢ်လိၥ်၀ဲဘၣ်အဃိ ဘၣ်အိၣ်၀ဲဒၣ်လၢတၢ်လီၢ်လၢအိၣ်န့ၢ်အိၣ်သ့အလီၢ်တဖၣ်ဒီး မဟါအနံၤမူခိၣ်စူၤ၀ဲအဃိ ကတီၢ်ခဲအံၤန့ၣ် ဘၣ်အိၣ်၀ဲဒၣ်လၢ တၢ်အဒူၣ်ဖိတဖၣ်ဒီး တၢ်ဒီသဒၢမူခိၣ်ထံတၢ်ပီတၢ်လီတဖၣ်”အဂ့ၢ် မယံၣ်ယံၣ်စံး၀ဲန့ၣ်လီၤ.
ကတီၢ်ခဲအံၤ စံၣ်သုးအဆၢကတီၢ်ဒီး ဘၣ်ကွၢ်ဆၢၣ်မဲၥ်ဘၣ်ဒီးထံတၢ်လီၤဘၣ်ယိၣ်တဖၣ်အဂီၢ် လိၣ်ဘၣ်၀ဲ တၢ်ကူတၢ်သိး, တပၢၤလီခီတဖၣ်ဒီး ဂ့ၢ်ဂီၤအူတၢ်အီၣ်တၢ်အီတဖၣ်၀ံၤ ဒ်သိးကမၤစၢၤ၀ဲအဂ့ၢ် ရဲၣ်ကျဲၤ၀ဲအဂ့ၢ် အ၀ဲစံး၀ဲန့ၣ်လီၤ.
သုးကီၣ်မံးရှၢၣ် က့ၤမၤန့ၢ်က့ၤ အ့ရှၢကျဲမုၢ်၀ံၤအလီၢ်ခံ တၢ်ဒုးကဲထီၣ်သးတဖၣ်အဃိ လီၢ်က၀ီၤကမျၢၢ် ၂၇၀၀ဘျဲၣ်လၢ အိၣ်ဖဲတီနီၢ်ကစၢၢ်ဒီတကျိၤတဖၣ် ဘၣ်စံၣ်သုးဃ့ၢ်ပူၤဖျဲးအသးန့ၣ်လီၤ.
ပှၤစံၣ်သုးပှၤလီၢ်အိၣ်ကမှံဖိ သုးကလၢၤတနီၤအပူၤ တၢ်သူၣ်ထီၣ်၀ဲ ဟံၣ်တဖၣ်လၢသ့ၣ်တဖၣ်ဘၣ်ဆၣ် အါတက့ၢ်န့ၣ် ဘၣ်အိၣ်၀ဲဒၣ်လၢ ဒၢဖိတဖၣ်အဖီလၥ်န့ၣ်လီၤ.
ကတီၢ်ခဲအံၤ ပလီတပိးပှၤလီၢ်အိၣ်ကမှံဖိတဖၣ်လၢ လဲၤအိၣ်ကဒု၀ဲဒၣ်ဖဲ သူမွဲကျိန့ၤတဖၣ်စ့ၢ်ကီး ဘၣ်ကွၢ်ဆၢၣ်မဲၥ်ဘၣ်ဒီး ထံတၢ်လီၤဘၣ်ယိၣ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ခီဖျိတၢ်ဒုးကဲထီၣ်သးကဒီးအဃိ ကမျၢၢ်ဖိလၢဘၣ်စံၣ်သုးတဖၣ်န့ၣ် ဂ့ၢ်ဂီၤအူလိၣ်ဘၣ်၀ဲ တၢ်အီၣ်တၢ်အီ, ဟုသးဒီး ဟံၣ်လၢအဘံၣ်အဘၢတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“ဂ့ၢ်ဂီၤအူ တၢ်အီၣ်တၢ်အီ, ဟုသး,သိအီၣ်, အံသၣ်တဖၣ် အဲၣ်ဒိးလၢကမၤစၢၤအီၤလီၤ. ဟုသးမ့ၢ်အိၣ်န့ၣ် တၢ်လၢအဂၤ ကွၢ်အီၣ်သ့လီၤ. ဟံၣ်အဒုၣ် အိၣ် ၁၀၀/၅၀အဃိ မၤစၢၤန့ၢ်လီၤ. အရ့ဒိၣ်ကတၢၢ်န့ၣ် မ့ၢ်တၢ်အီၣ်တၢ်အီလီၤ. ကသံၣ်ကသီတဖၣ်စ့ၢ်ကီးလိၣ်၀ဲလီၤ. တၢ်အိၣ်ဆူၣ်ချ့န့ၣ်ဂ့ၤလီၤ”အဂ့ၢ် မယံၣ်ယံၣ် စံး၀ဲန့ၣ်လီၤ.
ကီၢ်ပယီၤပူၤ သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံဒီး တုၤခဲကနံၣ်အံၤအတီၢ်ပူၤ ခီဖျိတၢ်ဒုးတၢ်ယၤတဖၣ်အဃိ ပှၤလၢပၥ်တ့ၢ်အိၣ်ဆိးလီၢ်ကျဲဃ့ၢ်ပူၤဖျဲးသးအိၣ်ထီၣ်၀ဲ (၃.၅)ကကွဲၢ်လံအဂ့ၢ် ဘီမုၢ်စၢဖှိၣ်ကရၢ အလံၥ်ဘိးဘၣ်ရၤလီၤအဖီခိၣ် တၢ်သ့ၣ်ညါဘၣ်န့ၣ်လီၤ.
