လါစဲးပထ့ဘၢၣ် ၁၆သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ပၢၢ်ဆၢသုးတဖၣ် နုၥ်လီၤခး၀ဲ ဒ၀ဲၢ်-ထံခံကျဲမုၢ်အဖီခိၣ်အိၣ် ဒ၀ဲၢ်ကီၢ်ဆၣ်, ပကၣ်ရံၤသ၀ီဟီၣ်က၀ီၤ ပၢၤကီၢ်သုးကလၢၤဒီးသုးကီၣ်မံးရှၢၣ်အသုး အိၣ်ဆီလီၤဃၥ်သးတၢ်လီၢ်တဖၣ်အဃိ တၢ်ဒုးဆူၣ်၀ဲအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
မဟါ ဟါလီၤခီ ၄နၣ်ရံၣ်ဃၣ်ဃၣ်အဆၢကတီၢ်န့ၣ် တၢ်ပၢၢ်ဆၢသုးပၥ်ဖှိၣ်တဖၣ် နုၥ်လီၤခး၀ဲ သုးကီၣ်မံးရှၢၣ်အပှၤသုးဖိဂံၢ်ဘါ၁၀၀ဃၣ်ဃၣ်လၢ အိၣ်ဆီလီၤဃၥ်သး ဖဲပကၣ်ရံၤသီခါဖၠၣ်ပူၤတဖၣ်အဃိ တၢ်ဒုးဆူၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
၀ံၤအလီၢ်ခံ မဟါဂီၤအဆၢကတီၢ်စ့ၢ်ကီး ခံခီခံကပၤ တၢ်ဒုးဆူၣ်၀ဲဒၣ် ဖဲပကၣ်ရံၤပၢၤကီၢ်သုးကလၢၤအဂ့ၢ် စံး၀ဲန့ၣ်လီၤ.
“မဟါအနံၤစ့ၢ်ကီး တၢ်ဒုးဆူၣ်ထီၣ်တုၤဟါလီၤခီလီၤ. တဂီၤအံၤစ့ၢ်ကီး ကဲထီၣ်၀ဲလီၤ. ပှၤဒူသ၀ီဖိတဖၣ်တခီ စးထီၣ်လၢမဟါလံၤလံၤန့ၣ်ဃ့ၢ်ပူၤဖျဲးသးလံ. တနီၤတခီအိၣ်တ့ၢ်ဒံးလၢသ၀ီပူၤ”အဂ့ၢ် လီၢ်က၀ီၤပိၥ်ခွါတဂၤစံး၀ဲန့ၣ်လီၤ.
တၢ်ပၢၢ်ဆၢသုးပၥ်ဖှိၣ် နုၥ်လီၤဒုး သုးကီၣ်မံးရှၢၣ်အပှၤသုးဖိလၢ အိၣ်ဖဲပကၣ်ရံၤသ၀ီပူၤ လၢတၢ်တတိၥ်ပၥ်သးအပူၤဘၣ်အဃိ အပှၤဘၣ်ဒိဒီးသံအိၣ်အါထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် တနံၤအံၤမုၢ်ထူၣ်အဆၢကတီၢ် သုးကီၣ်မံးရှၢၣ် အဘီယူၤဒုးသုး ဟဲတ့ၢ်လီၤမ့ၣ်ပိၢ် ဖဲပကၣ်ရံၤသ၀ီအခိၣ်အဃၢၤန့ၣ်လီၤ.
တၢ်ဒုးအပူၤ သုးကီၣ်မံးရှၢၣ်အသုးခးလီၤကျိဖးဒိၣ်တဖျၢၣ်န့ၣ် လဲၤလီၤတဲၥ်ပိၢ်ဖးထီၣ်၀ဲဒၣ်ဖဲ ပကၣ်ရံၤသ၀ီ, ယ့ၣ်လဲၢ်အ့သ၀ီ ဟံၣ်တဖျၢၣ်အဖီခိၣ်အဃိ မ့ၣ်အူအီၣ်ဟးဂီၤကွံၥ်၀ဲ၀ံၤ ပိၥ်မုၣ်တဂၤစ့ၢ်ကီး ဘၣ်၀ဲဒီး ကျိဖးဒိၣ်အက့အဂ့ၢ် တၢ်သ့ၣ်ညါဘၣ်န့ၣ်လီၤ.
ပိၥ်မုၣ်လၢကျိဖးဒိၣ်ဘၣ်အီၤအံၤ သံလံအဂ့ၢ်န့ၣ် လီၢ်က၀ီၤဖိတနီၤစံး၀ဲဘၣ်ဆၣ် တၢ်ပၥ်ဂၢၢ်ပၥ်ကျၢၢ်အီၤတန့ၢ်ဒံးဘၣ်အဂ့ၢ်န့ၣ်လီၤ.
တၢ်ဒုးကဲထီၣ်အဆၢကတီၢ်တကတီၢ်ဃီ မဟါဂီၤအဆၢကတီၢ် သုးကီၣ်မံးရှၢၣ်အသုးမၤစၢၤ ဂံၢ်ဘါ၁၀၀ဃၣ်ဃၣ်တဖၣ် လဲၤလီၤသုးကျိၤဆူ ပကၣ်ရံၤသ၀ီတပၤအသိး စဟၣ်သ၀ီအိၣ်သူၣ်လီၤ အမတ(၃၀၂)မျိၥ်သုးတဖၣ်စ့ၢ်ကီး ခးလီၤ၀ဲကျိဖးဒိၣ်တဖၣ်ဆူ ပကၣ်ရံၤသ၀ီတပၤအဂ့ၢ် တၢ်ပၢၢ်ဆၢသုးတပၤ စံး၀ဲန့ၣ်လီၤ.
ဒ၀ဲၢ်ကီၢ်ဆၣ်မုၢ်ထီၣ်တပၤ ဟီၣ်က၀ီၤလၢစဲးဘူးလိၥ်သးဒီးကၠီၣ်တဲၣ်အပူၤအိၣ် ထံခံကီၢ်ဆၢသုးကလၢၤပၣ်ဃုၥ် ကီၢ်ဆၢသုးကလၢၤခဲလၢၥ်ဃၣ်ဃၣ် သုးကီၣ်မံးရှၢၣ်ဘၣ်ပျၢ်ကွံၥ်၀ဲ၀ံၤ စးထီၣ်ဖဲအပူၤကွံၥ် လါအီကူၥ်န့ၣ် သုးကီၣ်မံးရှၢၣ်တပၤ မၤပှဲၤက့ၤသုးအဂံၢ်အဘါဒီး မၤဒုးယၤရဲၣ်ကျဲၤတဖၣ် ဖဲဒ၀ဲၢ်-ထံခံကျဲမုၢ်အဖီခိၣ်န့ၣ်လီၤ.
သုးကီၣ်မံးရှၢၣ်န့ၣ် သုးကလၢၤတဖၣ်လၢဘၣ်ပျၢ်ကွံၥ်၀ဲတဖၣ် ကဒုးမၤန့ၢ်က့ၤအဂီၢ်ဒီး သုးကလၢၤတဖၣ်လၢဆီလီၤဃၥ်အသးဖဲ ပကၣ်ရံၤ, ကၠီးမဲတီၣ်ဒီး ၀့ၢ်မတါတဖၣ် သုးတလီၤကဒီးအဂီၢ် မၤဒုးယၤရဲၣ်ကျဲၤတဖၣ်အဂ့ၢ် တၢ်ပၢၢ်ဆၢသုးတပၤ ပဲၥ်ထံနီၤဖး၀ဲန့ၣ်လီၤ.
