လါစဲးပထ့ဘၢၣ်၁၆သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ဒီကလုၥ်ထံတၢ်အိၣ်ယၢၤ၀ဲၤဒၢး(ONWR) အနဲၣ်ရွဲၣ်ခိၣ်ကျၢၢ် Surasee Kittimonthonန့ၣ် ခါလၢကဟဲမုၢ်နံၤမုၢ်သီတဖၣ်အပူၤမူခိၣ်ကစူၤဒိၣ်၀ဲအဃိကဘှါရှဲ၀ဲအဂီၢ်,ကရဲၣ်လီၤကျဲၤလီၤတၢ်ရဲၣ်တၢ်ကျဲၤတဖၣ်အဂီၢ်ဒီးကသမံသမိးထံတၢ်အိၣ်သးတဖၣ်အဂီၢ်လါစဲးပထ့ဘၢၣ်၁၃သီအနံၤန့ၣ်တၢ်ပၢဆှၢရဲၣ်ကျဲၤထံတၢ်အိၣ်ယၢၤဆဲးကမံးတံၥ်တၢ်အိၣ်ဖှိၣ်အပူၤဟံးမူဒါဒ်ပှၤပၢၤလီၢ်ဆ့ၣ်နီၤတဂၤအသိး၀ံၤအ့ၣ်ကၠံၣ်စံၣ်ဘၣ်ထွဲပှၤကူၣ်သ့ကူၣ်ဘၣ်အခၢၣ်စးတဖၣ်စ့ၢ်ကီး ဟဲထီၣ်၀ဲန့ၣ်လီၤ.
တၢ်အိၣ်ဖှိၣ်အပူၤ Suraseeအတၢ်တဲလီၤအပူၤ မူခိၣ်ကလံၤသီၣ်ဂီၤ၀ဲၤကျိၤ အထံတၢ်ဂ့ၢ်တၢ်ကျိၤ ဖၠၣ်စိမိၤတဖၣ် အတၢ်တယၥ်အဖီခိၣ် ဖဲလါစဲးပထ့ဘၢၣ်၁၅သီဒီး၁၆သီအတီၢ်ပူၤ မိးသိၣ်ကလံၤမုၢ်န့ၣ် ကလဲၤခီဂၥ်၀ဲဖဲ ကလံၤစိးထးခီ, တၢ်ခၢၣ်သး, မုၢ်ထီၣ်ဒီးမုၢ်ထီၣ်ကလံၤစိး ထးခီဟီၣ်က၀ီၤတဖၣ်အပူၤ၀ံၤ တၢ်လီၢ်တနီၤအပူၤတခီ မူခိၣ်ကစူၤဒိၣ်၀ဲအဂ့ၢ်န့ၣ်လီၤ.
ဖဲလါစဲးပထ့ဘၢၣ်၁၇သီတုၤ၂၁သီအနံၤတခီ ကလံၤမုၢ် ကလဲၤသုးအသးဆူ ကလံၤထံးတပၤအဂ့ၢ်, ဘီကီၥ်ဒီးအကပိၥ်ကပၤပၣ်ဃုၥ် လီၢ်က၀ီၤအါတက့ၢ်အပူၤ မူခိၣ်ကစူၤဒိၣ်ဒီးကစူၤဒိၣ်ထီၣ်၀ဲဒိၣ်ဒိၣ်မုၢ်မုၢ်အဂ့ၢ် တယၥ်ဃၥ်၀ဲန့ၣ်လီၤ.
လါစဲးပထ့ဘၢၣ်အလၢၥ်ဒီးလါအီးကထိဘၢၣ်အတီၢ်ပူၤ တၢ်ကိၢ်ကလံၤမုၢ်တခါမ့တမ့ၢ် ခံခါကဟဲနုၥ်လီၤသ့၀ံၤ တၢ်၀ဲအံၤန့ၣ် ကမၤထီထီၣ်၀ဲမူခိၣ်ထံတဖၣ်အဂ့ၢ် အ၀ဲတဲအါထီၣ်ကဒီး၀ဲန့ၣ်လီၤ.
Chi-Mun ထံကျိၤအခီၣ်ထံး Ubol Ratanaတမၢၣ်န့ၣ် ကတီၢ်ခဲအံၤ အပၥ်ကီၤဃၥ်၀ဲ ထံ ၆၇မျးကယၤဃၣ်ဃၣ်န့ၣ်လီၤ.
တၢ်အိၣ်ဖှိၣ်အပူၤ ထံတၢ်အီလၥ်ဟီၣ်က၀ီၤအပူၤ တၢ်အိၣ်သးသုတအၢနးနးကျံးကျံးအဂီၢ် ကမၤ၀ဲန့ၣ်လီၤ. မူခိၣ်စူၤထံအဂီၢ် ကဒၢဃၥ်၀ဲထံယံၤယံၤထၢထၢအဂီၢ် တနံၤန့ၣ် ကပျၢ်လီၤ၀ဲထံ ကုးဘးမံထၢၣ် ၁၈ကကွဲၢ်တုၤ ကုးဘးမံထၢၣ် ၂၀ကကွဲၢ်အဂ့ၢ် ဆၢတဲၥ်လီၤ၀ဲန့ၣ်လီၤ.
ကၠီၣ်တဲၣ်စီၤပၤ တၢ်ဘှီထီၣ်ထံကျိၤဘိ၀ဲၤကျိၤတခီ ကမၤရှဲပျီကွံၥ် တၢ်နိးတၢ်ဘျးတဖၣ်, ထံလီၤဆှုကချ့အဂီၢ် ကရၤလီၤဃၥ်၀ဲ စဲးဖီကဟၣ်တဖၣ်, တၢ်ဘှီထီၣ်ထံကျိၤဘိတဖၣ်တဆီပၣ်ဃုၥ် မုၢ်နုၥ်ဒီးမုၣ်ထီၣ်တပၤ ကပျၢ်လီၤ၀ဲထံကန့ၢ်ချ့ချ့အဂီၢ် တၢ်အိၣ်ဖှိၣ်အပူၤ ဆၢတဲၥ်လီၤ၀ဲန့ၣ်လီၤ.
ကၠီးဖယါထံတမၢၣ်တဆီ ကပျၢ်လီၤထံ တစဲးကးန့ၣ် ကတလၢကွံၥ် ကုးဘးမံထၢၣ် ၂,၀၀၀ဘျဲၣ်အဂီၢ် မ့ၢ်လိၣ်န့ၣ် ကဘၣ်ဟံးန့ၢ်တၢ်ပျဲဆိလၢ ဒီကလုၥ်ထံတၢ်အိၣ်ယၢၤကမံးတံၥ် (NWRC)ပှၤပၢၤလီၢ်ဆ့ၣ်နီၤအအိၣ်သၢသီ၀ံၤ ၀ဲၤကျိၤ၀ဲၤဒ့တဖၣ်တခီ ကဘၣ်ဟ့ၣ်ပလီၢ်ဒုးသ့ၣ်ညါတဘျီဃီလၢ ပှၤလၢအိၣ်လၢ ထံကျိၤကၢၢ်နံၤတဖၣ်န့ၣ်လီၤ.
တၢ်ဒၢထံတမၢၣ်ဒီး ထံကျိၤထံမ့ၢ်ထီၣ်တဘီယူၥ်ဃီဒီး တၢ်ပျၢ်လီၤထံလၢကၠီးဖယါထံတမၢၣ်ပူၤတဖၣ် ကဒိၣ်ထီၣ်၀ဲအဃိ ကဒုးအိၣ်ထီၣ် ဒီကလုၥ်တၢ်ပၢဆှၢရဲၣ်ကျဲၤထံစ့ၣ်ထၢၣ်တခါအဂီၢ် တၢ်အိၣ်ဖှိၣ်အပူၤ အၢၣ်လီၤတူၢ်လိၥ်၀ဲန့ၣ်လီၤ.
Ref : Nation Thailand
