လါစဲးပထ့ဘၢၣ် ၁၂သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဘၣ်ထွဲဒီး သုးမီၤစိရိၤ, သုးကီၣ်မံးရှၢၣ်ဘိးဘၣ်ရၤလီၤ၀ဲ တခီတၢၤလၢကမၤတၢ်ဃုထၢအဖီခိၣ် ဒ်ခ့ၣ်အဲၣ်ယူၣ်-လီၢ်ခၢၣ်သးပၢဆှၢတၢ်ကမံးတံၥ် အလံၥ်ဘိးဘၣ်ရၤဒီးအတၢ်နဲၣ်ကျဲအသိး ကလူၤပိၥ်မၤထွဲ၀ဲ၀ံၤ ပှၤလၢဟ့ၣ်ဂံၢ်ဟ့ၣ်ဘါ ဆီၣ်ထွဲမၤစၢၤ၀ဲ တၢ်ဃုထၢအံၤတဖၣ် တၢ်ကဟံးန့ၢ်ဂ့ၢ်၀ီအဂ့ၢ် ကီၢ်ရ့ၣ်ချၢၣ်လွံၢ်ထူၣ်/ သုးက့နီၣ်ဂံၢ်(၃) ဘိးဘၣ်ရၤလီၤ လံၥ်ဘိးဘၣ်ရၤလီၤတဘ့ၣ် ဖဲလါစဲးပထ့ဘၢၣ်(၁၁)သီအနံၤန့ၣ်လီၤ.
တၢ်ဃုထၢလၢသုးကရူၢ်အံၤကရဲၣ်ကျဲၤမၤ၀ဲအံၤန့ၣ်လ့ၤတက့ၤတတူၢ်လိၥ်ဘၣ်အဂ့ၢ်KNUလီၢ်ခၢၣ်သးထုးထီၣ်ပၥ်ဖျါ ဃၥ်၀ဲ၀ံၤတၢ်ဃုထၢအံၤမ့ၢ်ဒ်သိးသုးမိၤစိရိၤအသးသမူကအိၣ်ကၢအိၣ်ခိးဖိးသဲစးလၢကီၢ်တဘ့ၣ်အံၤအပူၤလၢကဟၢၣ်တံၣ်စှီၤတံၣ်ဆူးသွံၣ်အီၣ်ညၣ်ကမျၢၢ်ထံဖိကီၢ်ဖိဒီးကလုၥ်ဒူၣ်ခဲလၢၥ်လၢအအိၣ်လၢကီၢ်အပူၤမ့ၢ်ဒ်သိးကကဲထီၣ်ပှၤ“သံလၢအမူဒံး”လၢကီၢ်တဘ့ၣ်အံၤအပူၤအဂ့ၢ်ပၥ်ဖျါဃၥ်၀ဲလၢလံၥ်ဘိးဘၣ်ရၤလီၤအပူၤန့ၣ်လီၤ.
ကီၢ်ရ့ၣ်ချၢၣ်လွံၢ်ထူၣ်/ သုးက့နီၣ်ဂံၢ်(၃) အလံၥ်ဘိးဘၣ်ရၤလီၤအပူၤ ကညီဒီကလုၥ်စၢဖှိၣ်ကရၢ အတၢ်ပညိၣ်အိၣ်လီၤတံၢ်လၢကသူၣ်ထီၣ်ကီၢ်စဲၣ်ပၥ်ဖှိၣ်ဖဲၣ်ဒရၢၣ်ကီၢ်စၢဖှိၣ်လၢအအိၣ်ဒီးဒံၣ်မိၣ်ကရ့ၣ်စံၣ်ဒီးနီၢ်ကစၢ်တၢ်စံၣ်ညီၣ်ပၢလီၤသးခွဲးယၥ်အသိးအဂ့ၢ်, တၢ်ဃုထၢလၢ သုးကရူၢ်အံၤကမၤ၀ဲန့ၣ် မ့ၢ်ဒၣ်အယီၤအဘျၣ်လီၤဒီး မ့ၢ်တၢ်ဆီၣ်လီၤအုးကွံၥ်ထံကီၢ်အံၤဒီးထံဖိကီၢ်ဖိကမျၢၢ်တဖၣ်ဆူလၢၢ်ရၥ်အပူၤအဂ့ၢ် ပၥ်ဖျါဃၥ်၀ဲန့ၣ်လီၤ.
လၢတၢ်န့ၣ်အဃိ ကီၢ်ရ့ၣ်ချၢၣ်လွံၢ်ထူၣ်/သုးက့(၃)တၢ်ပၢဆှၢဟီၣ်က၀ီၤပူၤ ထံဖိကီၢ်ဖိကမျၢၢ်တဖၣ်, ပှၤဂ့ၢ်၀ီကရူၢ်ကရၢတဖၣ်, ပၣ်တံၣ်တၢ်ကရၢကရိတဖၣ်, တၢ်ဘူၣ်တၢ်ဘါကရူၢ်ကရၢခိၣ်နၢ်တဖၣ်ဒီးပှၤနီၢ်တဂၤပှၤတဖၣ် တၢ်သုတနုၥ်လီၤမၤဘၣ်ထွဲဟ့ၣ်ဂံၢ်ဟ့ၣ်ဘါပၣ်ဃုၥ်ပၣ်ဂီၢ်လၢသုးမီၤစိရိၤအတခီတၢၤတၢ်ဃုထၢတၢ်ရဲၣ်တၢ်ကျဲၤအပူၤတဂ့ၤအဂီၢ် ဟ့ၣ်ဒုးသ့ၣ်ညါဃၥ်၀ဲန့ၣ်လီၤ.
တၢ်ဃုထၢလၢ သုးကီၣ်မံးရှၢၣ်ကရဲၣ်ကျဲၤမၤ၀ဲအံၤတၢ်အဘျူးလၢအပိၥ်ထွဲထီၣ်အခံန့ၣ် မ့ၢ်ဒၣ်ထဲ သုးမီၤစိရိၤ, သုးကီၣ်မံးရှၢၣ်အခိၣ်အနၢ်, အဒူၣ်ဖိထၢဖိဒီးပၣ်တံၣ်တဖၣ်လၢအလီၤအုးတ့ၢ်ဃၥ်လၢ သုးမီၤစိရိၤ, သုးကီၣ်မံးရှၢၣ်အစုအပျၢ်အပူၤတဖၣ်အဃိ တၢ်သုတပၣ်ဃုၥ်ပၣ်ဂီၢ်မၤစၢၤတၢ်လၢ တၢ်ဃုထၢအံၤအပူၤတဂ့ၤအဂီၢ် ဟ့ၣ်သဆၣ်ထီၣ်ဃၥ်၀ဲန့ၣ်လီၤ.
တၢ်ဃုထၢအယီၤအဘျၣ်လၢ မီၤစိရိၤသုး သုးကီၣ်မံးရှၢၣ်ကရဲၣ်ကျဲၤမၤ၀ဲအံၤအပူၤ ပှၤလၢနုၥ်လီၤပၣ်ဃုၥ်ပၣ်ဂီၢ်လၢ တၢ်မၤအပူၤကိးသနၢၣ်ဒဲးန့ၣ် ခ့ၣ်အဲၣ်ယူၣ်-ကီၢ်ရ့ၣ်ချၢၣ်လွံၢ်ထူၣ်အိၣ်ဒီးတၢ်အိၣ်ခိးကွၢ်အမဲၥ်ညါ ဒ်အလီၢ်အိၣ်အသိး ကဟံးန့ၢ်ဂ့ၢ်၀ီဒ်သဲစးတၢ်ဘျၢအိၣ်အသိးအဂ့ၢ် ဟ့ၣ်ပလီၢ်ဃၥ်၀ဲန့ၣ်လီၤ.
ဒ်သိး ခ့ၣ်အဲၣ်ယူၣ်-ကီၢ်ရ့ၣ်ချၢၣ်လွံၢ်ထူၣ်/သုးက့နီၣ်ဂံၢ်(၃)အသိး ကီၢ်ရ့ၣ်/သုးက့အဂၤတဖၣ်စ့ၢ်ကီး တတူၢ်လိၥ်၀ဲ သုးကရူၢ်အံၤအတၢ်ဃုထၢဘၣ်အဂ့ၢ်န့ၣ် ဘိးဘၣ်ရၤလီၤဃၥ်၀ဲ လံၥ်ဘိးဘၣ်ရၤလီၤတဖၣ်န့ၣ်လီၤ.
