ကီၢ်ကၠီၣ်တဲၣ်ပူၤ စးထီၣ်လၢလါအီးကထိဘၢၣ်၁သီန့ၣ် တၢ်ကပျဲ ပှၤဘၣ်ကီဘၣ်ခဲဖိတဖၣ် ကဖံးမၤတၢ်အဂီၢ်

လါစဲးပထ့ဘၢၣ်(၁၁)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်

ပှၤဘၣ်ကီဘၣ်ခဲဖိလၢအိၣ်ဖဲကၠီၣ်တဲၣ်ပယီၤကီၢ်ဆၢဘၣ်ကီဘၣ်ခဲဒဲက၀ီၤပူၤတဖၣ်စးထီၣ်လၢလါအီးကထိဘၢၣ်၁သီန့ၣ် တၢ်ကပျဲဖံးမၤတၢ်လၢအဖိးသဲစးအဂ့ၢ် ကၠီၣ်တဲၣ်ထံလီၢ်ကီၢ်ပူၤကိတိၥ်ခိၣ်ကျၢၢ် ၂ Theerarat Samrejvanichတဲလီၤ၀ဲအဖီခိၣ် ကၠီၣ်တဲၣ်တၢ်ကစီၣ်သန့တဖၣ် ကွဲးပၥ်ဖျါဃၥ်၀ဲန့ၣ်လီၤ.

တၢ်ပၥ်ဂၢၢ်ပၥ်ကျၢၢ်တ့ၢ် တၢ်တိၥ်ကျဲၤအံၤ ဖဲအပူၤကွံၥ် လါအီကူၥ်၂၆သီအနံၤ ဖဲကၠီၣ်တဲၣ်ပဒိၣ်တၢ်အိၣ်ဖှိၣ်အပူၤ၀ံၤ ဘၣ်ကီဘၣ်ခဲဒဲက၀ီၤ(၉)ဘ့ၣ်လၢအိၣ်ဖဲ ကၠီၣ်တဲၣ်-ပယီၤကီၢ်ဆၢ မဲၢ်ဟီၣ်စီၣ်, တး, ကၣ်ခၠးနဘူၣ်ရံၣ်ဒီး ရဲးခၠးဘူၣ်ရံၣ်ကီၢ်ရ့ၣ်(၄)ဘ့ၣ်အပူၤတဖၣ် စးထီၣ်လၢလါအီးကထိဘၢၣ်၁သီတုၤ(၁)နံၣ်အတီၢ်ပူၤ တၢ်ကပျဲဖံးမၤတၢ်လၢအဖိးသဲစးအဂ့ၢ် ကၠီၣ်တဲၣ်တၢ်ကစီၣ်သန့ လၢအမ့ၢ် Khaosodကွဲးပၥ်ဖျါဃၥ်၀ဲန့ၣ်လီၤ.

ပှၤလၢကဖံးမၤတၢ်တဖၣ်တခီဒဲက၀ီၤလၢအအိၣ်၀ဲတဘ့ၣ်စုၥ်စုၥ်အပူၤတၢ်ကဘၣ်ပတံထီၣ်တၢ်ဟးထီၣ်တၢ်ပျဲဒီးကဖံးမၤတၢ်အဂီၢ်တၢ်ပျဲလံၥ်ပတံထီၣ်၂ဘ့ၣ်၀ံၤတကးဘၣ်ကဘၣ်ဟ့ၣ်ထီၣ်ကီၢ်ချၢပှၤမၤတၢ်ဖိအဆူၣ်ချ့လံၥ်အုၣ်သးပၣ်ဃုၥ်လံၥ်တၢ်မၤနီၣ်မၤဃါတဖၣ်ဆူ ကမျၢၢ်ဆူၣ်ချ့ကိတိၥ်၀ဲၤကျိၤအအိၣ်၀ံၤ ပှၤမၤတၢ်ဖိသဲစးတၢ်ဘျၢအဖီခိၣ် ကဘၣ်ဟ့ၣ်ထီၣ်၀ဲစ့ၢ်ကီး လံၥ်ပတံထီၣ်ဒီးကဖံးမၤတၢ်လံၥ်တၢ်ပျဲ(Work Premit)တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.

ဘၣ်ဆၣ် အဆိကတၢၢ်ကဖံးမၤတၢ်ပျဲ လံၥ်ပတံထီၣ်အဂီၢ် ကမၤစှၤလီၤန့ၢ် ပှၤမၤတၢ်ဖိကျိၥ်စ့တၢ်ကီတၢ်ခဲအဂီၢ် တၢ်ကဟ့ၣ်ပူၤဖျဲး၀ဲ ကဖံးမၤတၢ်ပျဲ(Work Premit)အလဲကျိၥ်စ့အဂီၢ်အဂ့ၢ် စံး၀ဲန့ၣ်လီၤ.

ကတီၢ်ခဲအံၤန့ၣ် ကီၢ်ချၢပှၤမၤတၢ်ဖိတဖၣ်တခီ နုၥ်လီၤဖံးမၤတၢ်လၢ ကၠီၣ်တဲၣ်တၢ်တ့ထုးထီၣ်တၢ်ဖံးတၢ်မၤဒီး Serviceအသနၢၣ်တဖၣ်အပူၤဘၣ်ဆၣ်ပှၤမၤတၢ်ဖိကိတိၥ်၀ဲၤကျိၤတခီတသမံသမိးကီၢ်ချၢပှၤမၤတၢ်ဖိတဖၣ်တအိၣ်ဘၣ်ဒီး တၢ်ပျဲဖံးမၤတၢ်ဖံးတၢ်မၤတန့ၢ်ဘၣ်အဂ့ၢ် Theerarat Samrejvanich စံး၀ဲန့ၣ်လီၤ.

ကၠီၣ်တဲၣ်တၢ်ဘျၢသဲစးအဖီခိၣ် ကီၢ်ချၢပှၤမၤတၢ်ဖိတဖၣ်န့ၣ် မ့ၢ်မၤတလၢကွံၥ် တၢ်ဖံးတၢ်မၤလၢမၤ၀ဲတန့ၢ်တသ့ဒီး တၢ်ပျဲတအိၣ်န့ၣ် တၢ်ကဘၣ်ဟ့ၣ်လိးအီၣ်စ့ယိၤ ၅,၀၀၀ တုၤ ၅၀,၀၀၀ဘးအသိး တၢ်ကပျဲဟးထီၣ်ကွံၥ်လၢ ကီၢ်ပူၤအဂ့ၢ် တၢ်သ့ၣ်ညါဘၣ်န့ၣ်လီၤ.