လါစဲးပထ့ဘၢၣ် ၁၁သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးကီၣ်မံးရှၢၣ်ဒီး ရၢၢ်ခၢၣ်သုးမုၢ်ဒိၣ်(AA)အဘၢၣ်စၢၤ တၢ်ဒုးဆူၣ်လၢ ရၢၢ်ခၢၣ်ကီၢ်စဲၣ်, ကၠီးဖၠူၣ်ကီၢ်ဆၣ်အပူၤ လါစဲးပထ့ဘၢၣ်အတီၢ်ပူၤ လီၢ်က၀ီၤဖိဒီးပှၤလီၢ်အိၣ်ကမှံဖိတဖၣ် ဘၣ်တၢ်ဖီၣ်န့ၢ်ဆူၣ်အီၤတဖၣ်ဒီး ဘၣ်တၢ်မၤသံအီၤတဖၣ်ဟဲအိၣ်ထီၣ်တပယူၥ်ဃီအဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ဖဲလါစဲးပထ့ဘၢၣ် ၅သီအနံၤန့ၣ် သုးကီၣ်မံးရှၢၣ်အသုး ခးသံ ကၠီးဖၠူၣ်ကီၢ်ဆၣ်, သပၠူၣ်တီၣ်သ၀ီဖိတဂၤအိၣ်အသိး ဖဲလါစဲးပထ့ဘၢၣ် ၃သီအနံၤစ့ၢ်ကီး သုးကီၣ်မံးရှၢၣ်ဖီၣ် ကၠၣ်ခၠဲၣ်သ၀ီ ပှၤလီၢ်အိၣ်ကမှံဖိ ၂ဂၤ၀ံၤအလီၢ်ခံဒီးတုၤခဲအံၤန့ၣ် တၢ်ဆဲးကျိးအီၤတန့ၢ်ဒံဒီးဘၣ်အဂ့ၢ် ကၠီးဖၠူၣ်လီၢ်က၀ီၤဖိ ပိၥ်ခွါတဂၤ စံး၀ဲန့ၣ်လီၤ.
ခီဖျိသုးကီၣ်မံးခး၀ဲအဃိ ကၠီးဖၠူၣ်ကီၢ်ဆၣ်, သပၠူၣ်တီၣ်သ၀ီ အူမီၣ်သါယံၣ်(၄၁)နံၣ်ဘၣ်သံ၀ဲၤ၀ံၤ ပှၤလၢက့ၤဖီၣ်၀ဲတဖၣ်တခီ ကၠၣ်ခၠဲၣ်သ၀ီဖိ အူဟၣ်သ့ဖၠူၣ်(၆၅)နံၣ်ဒီး မီၣ်၀့ၣ်တ့ၣ်အီၣ်(၁၆)နံၣ်တဖၣ်န့ၣ်လီၤ.
စးထီၣ်လၢလါအီကူၥ်န့ၣ် သုးကီၣ်မံးရှၢၣ်အသုးဒီး AAအဘၢၣ်စၢၤ တၢ်ဒုးဆူၣ်ဖဲ ကၠီးဖၠူၣ်ကီၢ်ဆၣ်အပူၤ နီၣ်ဂံၢ် ၃၂ပၢၤကီၢ်သုးရ့ၣ်ဒီး ဒညး၀တံၣ်ထံသုးအကပၤ၀ံၤ သုးကီၣ်မံးရှၢၣ်တကပၤ မၤဒုးယၤရဲၣ်ကျဲၤဟဲထီၣ်ဒုးတၢ်အဂ့ၢ် လီၢ်က၀ီၤပူၤ သုးဂ့ၢ်၀ီဂံၢ်ခီၣ်ထံးတၢ်ကစီၣ်တဖၣ် စံး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်မံးရှၢၣ်ဒီး AA အဘၢၣ်စၢၤတၢ်ဒုးဆူၣ်ဖဲ နီၣ်ဂံၢ်၃၂ပၢၤကီၢ်သုးရ့ၣ်အကပၤ ပၠဲစ့းက့ၣ်ဒီမ့တဲးကစၢၢ်အကပၤ၀ံၤ သုးကီၣ်မံးရှၢၣ်တပၤ မၤပှဲၤသုးအဂံၢ်အဘါလၢ ထံကျဲတဆီအဂ့ၢ် သုးဂ့ၢ်၀ီဂံၢ်ခီၣ်ထံးတၢ်ကစီၣ်တဂၤ စံး၀ဲန့ၣ်လီၤ.
“ကၠီးဖၠူၣ်တၢ်ဒုးန့ၣ်ကဲထီၣ်သးကိးမုၢ်နံၤလီၤ. အခဲအံၤစ့ၢ်ကီး ပၠဲစ့းက့ၣ်သ၀ီအကပၤဒီးမ့တဲးကစၢၢ်တဖၣ်အပူၤ တၢ်ဒုးဆူၣ်၀ဲလီၤ. သုးကီၣ်မံးရှၢၣ်တပၤ တၢ်လီၢ်လၢအ၀ဲသ့ၣ်ဘၣ်ပျၢ်ကွံၥ်၀ဲတဖၣ် က့ၤထီၣ်ဒုးတၢ်အဃိ တၢ်ဒုးဆူၣ်၀ဲလီၤ. တကးဘၣ် မၤပှဲၤသုးအဂံၢ်အဘါလၢ ထံကျဲတဆီအိၣ်၀ံၤ မၤပှဲၤသုးအဂံၢ်အဘါ ဖဲ၃၂ပၢၤကီၢ်သုးရ့ၣ်န့ၣ်လီၤ. တၢ်ဒုးန့ၣ် ဆူၣ်ဖးဒိၣ်ညါ”အဂ့ၢ် စံး၀ဲန့ၣ်လီၤ.
ကၠီးဖၠူၣ်ကီၢ်ဆၣ်အပူၤ ၂၀၂၅နံၣ်, လါဖ့ၤဘြူၤအါရံၤလံၤလံၤန့ၣ် သုးကီၣ်မံးရှၢၣ်အသုးဒီး ရၢၢ်ခၢၣ်သုးမုၢ်ဒိၣ် AAအဘၢၣ်စၢၤ ခံခီခံကပၤတၢ်ဒုးဆူၣ်၀ဲ၀ံၤ AAထီၣ်ဒုးမၤန့ၢ်ဃၥ်၀ဲ သုးကီၣ်မံးရှၢၣ် သုးလကၢၤဒီသဒၢတဖၣ်အါအါဂီၢ်ဂီၢ်န့ၣ်လီၤ.
