လါစဲးပထ့ဘၢၣ်(၁၁)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
မကွ့ကီၫ်ခီ,ငဖဲကီၫ်ဆၣ်,စိၣ်တဲးသ၀ီအကပၤ တၫ်ဒုးကဲထီၣ်တ့ၫ်အပူၤ ဒုၣ်ဒါအစိၣ်(၆၀)ဘျဲၣ်ဒီးသုးတၫ်ပီးတၫ်လီတဖၣ်,စုက၀ဲၤကျိချံပှာ်သၣ်တဖၣ် ရၢၫ်ခၢၣ်သုးမုၫ်ဒိၣ်(AA)မၤန့ၫ်၀ဲအဂ့ၫ် ဖဲလါစဲးပထ့ဘၢၣ်(၁၀)သီနံၤန့ၣ် ထုးထီၣ် ဘိးဘၣ်ရၤလီၤတၫ်ကစီၣ်လီၤ.
တၫ်ဒုးအံၤ ဖဲလါစဲးပထ့ဘၢၣ်(၇)သီ,ဂီၤ(၁၁း၁၅)နၣ်ရံၣ်အကတီၫ် ဒ်သုးကျိၤ(၂)ဘိတဘိအသိး ဟဲထီၣ်ဒုးဃီၤတၫ်လၢ အမ့ၫ် စကခ(၁၇)အစုတီၤဖီလာ်, လၢအိၣ်သူၣ်ဆီလီၤအသးဖဲယိၤဒိၣ်ကီၫ်စဲၣ်မုၫ်ထီၣ်,မဲပၣ်အ ခလရ(၂၉၅)လၢသုးခိၣ် ဒိၣ်ဂီၫ်ဂ့ၫ်ပၠံးဖၠိအီၣ်တီခိၣ်ရိၣ်မဲသုးရ့ၣ်အဘၢၣ်စၢၤတၫ်ဒုးကဲထီၣ်၀ဲအဂ့ၫ် တၫ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
တၫ်ဒုးအံၤယံာ်၀ဲ(၈)နၣ်ရံၣ်ဃၣ်ဃၣ်ဒီးသုးခီၣ်မံးရှၢၣ်သုးဖိအစိၣ်(၆၀)ဘျဲၣ်ဒီးသုးတၫ်ပီးတၫ်လီတဖၣ်,ကျိချံပှာ်သၣ်တဖၣ် ရၢၫ်ခၢၣ်သုးမုၫ်ဒိၣ်ပာ်ဖျါ၀ဲလီၤ.
တၫ်ဒုးအဂၤတခါလၢကဲထီၣ်အသးဖဲမကွ့ကီၫ်ခီ,ငဖဲကီၫ်ဆၣ်,စိၣ်တဲးသ၀ီအမုၫ်ထီၣ်ကလံၤစိး မံထၢၣ်(၂၀၀)ဃၣ်ဃၣ် ဖဲနးယ့ၣ်ကၣ်အကလံၤစိး ၀့ၣ်လူး၀ိၣ်ကၠိတကပၤလီၤ.
သုးခီၣ်မံးရှၢၣ်အသုးန့ၣ် ဖဲလါစဲးပထ့ဘၢၣ်(၇)သီ,ဟါ(၅း၂၀)နၣ်ရံၣ်အကတီၫ် ဒ်သုးကျိၤ(၃)ဘိတဘိအသိး ဟဲထီၣ် ဒုးဃီၤရၢၫ်ခၢၣ်သုးမုၫ်ဒိၣ်အဃိ ဖဲတၫ်လီၫ်၀ဲအံၤ တၫ်ဒုးကဲထီၣ်ယံာ်(၃)နၣ်ရံၣ်ဃၣ်ဃၣ်အဂ့ၫ် ပာ်ဖျါ၀ဲလီၤ.တၫ်ဒုးအံၤ အပူၤ ဒ်အပူၤကွံာ်တၫ်ဒုးအသိး သုးခီၣ်မံးရှၢၣ်အသုးဖိတဖၣ်ဘၣ်ဂုၤက့ၤအခံန့ၣ်လီၤ.
သုးကျိၤ(၃)ဘိတဘိအတၫ်ထီၣ်ဒုးအပူၤ တၫ်ထံၣ်န့ၫ်သုးခီၣ်မံးရှၢၣ်အသုးဖိအစိၣ်(၁၀)ဃၣ်ဃၣ်ဒီးဘၣ်ဒိဘၣ်ထံးအါ အါဂီၫ်ဂီၫ်အသိး တၫ်မၤန့ၫ်စ့ၫ်ကီး ကျိချံတၫ်စုက၀ဲၤတဖၣ်ဒံးန့ၣ်လီၤ.
