လါစဲးပထ့ဘၢၣ်(၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ဒီၣ်အီၣ်ဆါစူးကၠံၣ်တၢ်အိၣ်ဆူၣ်ချ့တၢ်အိၣ်သးနးထီၣ်အဃိ တၢ်ကပျဲဒိးကူစါယါဘါအသးလၢတၢ်သဘျ့အပူၤဒီး ကထူၣ်ဖျဲးထီၣ်က့ၤအဆိအချ့အဂီၢ် ဒီကလုၥ်ဒံၣ်မိၣ်ကရ့ၣ်စံၣ်ကရၢခိၣ်ကျၢၢ် (NLD)ဃ့ထီၣ်တၢ်မၤစၢၤဆူ ဘီမုၢ်စၢဖှိၣ်ကရၢပၣ်ဃုၥ် အၣ်စံၣ်ယၣ်ထံကီၢ်တဖၣ်အအိၣ် ဖဲလါစဲးပထ့ဘၢၣ်(၇)သီအနံၤန့ၣ်လီၤ.
ဒီၣ်အီၣ်ဆါစူးကၠံၣ်လၢ အသးနံၣ်အိၣ်(၈၀)ဘျဲၣ်အံၤ မီၤစိရိၤဟံးန့ၢ်ဆူၣ်ထံကီၢ်တၢ်စိတၢ်ကမီၤအသုး ဖီၣ်ဃၥ်၀ဲအိၣ်ထီၣ်လံ (၄)နံၣ်ဒီး(၈)လါဘျဲၣ်၀ံၤ ကတီၢ်ခဲအံၤန့ၣ် သးတၢ်ဆါတၢ်အိၣ်သးဟဲနးထီၣ်၀ံၤ သးသမူတၢ်လီၤဘၣ်ယိၣ်အိၣ်အဂ့ၢ် NLDထုးထီၣ်ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤ ဒီၣ်အီၣ်ဆါစူးကၠံၣ်န့ၣ် ခီဖျိတဒိးန့ၢ်ခွဲးယၥ်လၢ ကဒိးယါဘျါအသးလၢလၢပှဲၤပှဲၤဘၣ်အဃိ ကဒိးယါဘျါအသးဒီးကထူၣ်ဖျဲးထီၣ်က့ၤအဂီၢ် (NLD)ဃ့ထီၣ်တၢ်မၤစၢၤဆူ ဘီမုၢ်စၢဖှိၣ်ကရၢပၣ်ဃုၥ် အၣ်စံၣ်ယၣ်ထံကီၢ်တဖၣ်အအိၣ်န့ၣ်လီၤ.
ဒီၣ်အီၣ်ဆါစူးကၠံၣ် အသးတၢ်ဆါဂ့ၢ်၀ီ တၢ်အိၣ်ဆူၣ်ချ့တၢ်အိၣ်သးဟဲနးထီၣ်အဂ့ၢ် အဖိခွါဆံးလၢအမ့ၢ် ကိၣ်ထ့ၣ်လ့စ့ၢ်ကီး တဲဖျါဃၥ်၀ဲဖဲ စှၤသီအတီၢ်ပူၤန့ၣ်လီၤ.
တၢ်သံကွၢ် ပှၤလၢအိၣ်ဘူးဒီးဟီၣ်ခိၣ်လိၤဃိၥ်တဖၣ်လၢ ဘၣ်ထွဲဒီးဒီၣ်အီၣ်ဆါစူးကၠံၣ်အဂ့ၢ်ဘၣ်ဆၣ် တဒိးန့ၢ်တၢ်ကစီၣ်နီတမံၤဘၣ်ဒီး တၢ်ဆဲးကျိးအစၢတဲၥ်၀ဲအဂ့ၢ် စံး၀ဲန့ၣ်လီၤ.
တၢ်ကစီၣ်တဖၣ်ဟးထီၣ်လၢ ဘၣ်ထွဲဒီးဒီၣ်အီၣ်ဆါစူးကၠံၣ် သးတၢ်ဆါနးထီၣ်အဃိ တၢ်တဟ့ၣ်ခွဲးလၢ ကဒိးယါဘျါအသးလၢကသံၣ်သရၣ်ဖးဒိၣ်တဖၣ်အဖီခိၣ်ဘၣ်ဆၣ် မ့မ့ၢ်လၢ သုးကီၣ်မံးရှၢၣ်တပၤတခီ တၢ်အံၤတမ့ၢ် တၢ်အမ့ၢ်အတီဘၣ်အဂ့ၢ် ဂ့ၢ်လိၥ်ဃၥ်၀ဲန့ၣ်လီၤ.
