လါအီကူာ်(၂၆)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၫ်စဲၣ်,၀့ၫ်ရၤမတံအပူၤ ပယီၤ-ကၠီၣ်တဲၣ် နီၫ်ဂံၫ်(၂)တိၤတၫ်ရ့လိာ်အက၀ီၤပူၤ ဖဲမဟါနံၤ လါအီကူာ်(၂၄)သီ မုၫ်နၤအကတီၫ် သုးခီၣ်မံးရှၢၣ်အသုးဂံၫ်ဘါ(၃၀၀)ဂၤဃၣ်ဃၣ် စးထီၣ်ဟဲဆီလီၤအသးအဂ့ၫ် ကညီသုးဂ့ၫ်၀ီဂံၢ်ခီၣ်ထံးတၫ်ကစီၣ်တဖၣ်တဲ၀ဲလီၤ. ဒီးမ့ၫ်၀ဲ၀့ၫ်ရၤမတံ နီၫ်ဂံၫ်(၂၇၅)ခီၣ်ချ့သုးရ့ၣ်အသုးဖိတဖၣ်လၢဟံဆီလီၤအသးန့ၣ်လီၤ.
ပယီၤ-ကၠီၣ်တဲၣ်တၫ်ကူၣ်လဲၫ်မၤကၤအပူၤ နီၫ်ဂံၫ်(၂)တိၤလၢအရ့ဒိၣ်အံၤ ဖဲလါအီကူာ်(၁၈)သီအနံၤန့ၣ် သုးခီၣ်မံးရှၢၣ်ကး တံာ်ကွံာ်၀ဲသတူာ်ကလာ်၀ံၤအလီၫ်ခံ ယံာ်(၁)နွံ ဟဲဆီလီၤအသုးဖိလၢဂံၫ်ဘါအါအါဂီၫ်ဂီၫ် ဖဲတိၤန့ၣ်လီၤ.
ခလရ(၂၇၅)လၢဟဲဆီလီၤအသုးအံၤ ဖဲKNUထီၣ်ဒုး ကၠီၣ်တဲၣ်-ပယီၤဒီတကျိၤ သုးကီၣ်ကးအသုးကလၢၤအကတီၫ် မ့ၫ်သုးကလၢၤတဖျၢၣ်လၢသုးကီၣ်ကးသုးဖိလၢဃ့ၫ်ဖျိးတဖၣ် ဟဲပာ်ဖှိၣ်ထီၣ်သးအလီၫ်န့ၣ်လီၤ.
ကညီကီၫ်စဲၣ်ပူၤ ကီၫ်ဆၢသုးကလၢၤတဖၣ် တၫ်ဒုးအီၤအကတီၫ် သုးကီၣ်ကးအသုးဖိတဖၣ်န့ၣ် ခီဂာ်၀ဲသူမွဲကျိဒီး ဃ့ၫ်ဆူကၠီၣ်တဲၣ်တကပၤန့ၣ်လီၤ. သုးဖိလၢဃ့ၫ်ဖျိးတဖၣ်န့ၣ် ကၠီၣ်တဲၣ်ပဒိၣ်တဖၣ် ဆှၢဟ့ၣ်က့ၤသုးကီၣ်ကးန့ၣ်လီၤ.
တၫ်အဃိ ခလရ(၂၇၅)အပူၤ သုးကီၣ်ကးအသုးဖိဂံၫ်ဘါအိၣ်လၢအကယၤဂၤဒီးလၢအကျါဂံၫ်ဘါ(၃၀၀)ဂၤဃၣ်ဃၣ် လဲၤဆီလီၤအသးလၢနီၫ်ဂံၫ်(၂)တိၤအဂ့ၫ် ကညီသုးဂ့ၫ်၀ီဂ့ၫ်ခီၣ်ထံးတၫ်ကစီၣ် ဟ့ၣ်ဒုးသ့ၣ်ညါ၀ဲလီၤ.
“အိၣ်လၢတၫ်အကိပူၤလီၤ.လၢတၫ်ပာ်ကီၤလီၫ်တြဲၤအပူၤလီၤ.လၢတၫ်ကိပူၤန့ၣ် ဒၢးတဖၣ်အိၣ်ဒီးအိၣ်၀ဲ ဖဲန့ၣ်လီၤ.တၫ်မ့ၫ် လဲၤကွၫ်ဃုၣ်ဒၣ်လဲၣန့ၣ် တၫ်တထံၣ်ဘၣ်အါအဂ့ၫ်”ဂ့ၫ်ခီၣ်ထံးတၫ်ကစီၣ်၀ဲန့ၣ်တဲ၀ဲလီၤ.
သုးကီၣ်ကးဟဲဆီလီၤအသုးဂံၫ်ဘါဒ်သိးအံၤအဃိ ပှၤလီၫ်က၀ီၤဖိတနီၤလၢအိၣ်ဘူးဖဲတိၤကပၤတဖၣ် ဘၣ်ယိၣ်၀ဲလၢ တၫ်ဒုးကကဲထီၣ်အဃိ သုးကပၤဆိကွံာ်အသးအိၣ်၀ဲလီၤ.
အပူၤကွံာ်နံၣ်, လါအ့ဖြ့ၣ်အပူၤ KNUဒီးသုးပာ်ဖှိၣ်တဖၣ် ထီၣ်ဒုးမၤန့ၫ်၀့ၫ်ရၤမတံအကတီၫ် သုးခိး၀့ၫ် ခလရ(၂၇၅)န့ၣ် ဒုးမၤန့ၫ်၀ဲဒီးသုးကီၣ်ကးသုးဖိတဖၣ် က့ၤဂုၤက့ၤအခံ ဖဲနီၫ်ဂံၫ်(၂)တိၤဒီးဆီလီၤဃာ်အသုးလၢကခီၣ်ဆၢက့ၤတၫ်န့ၣ်လီၤ.
ဘၣ်ဆၣ် KNUဒီးသုးပာ်ဖှိၣ်တဖၣ် ဂုၤက့ၤအခံလၢ၀့ၫ်ရၤမတံ၀ံၤအလီၫ်ခံသုးကီၣ်ကးန့ၣ် ခီဖျိBGFတၫ်မၤစၢၤအဃိ က့ၤန့ၫ်က့ၤ ခလရ(၂၇၅)န့ၣ်လီၤ.
လၢကတီၫ်အံၤ သုးခီၣ်မံးရှၢၣ်အအီၣ်စ့ၣ်ယးသုးကျိၤလၢကဟဲထီၣ်ဆူ၀့ၫ်ရၤမတံအံၤ ဒ်သိးကဒုးန့ၫ်ပၢဆှၢကဒါက့ၤ ရၤမတံ-ကီးတရံးအ့ရှၢၣ်ကျဲမုၫ်ဒိၣ်အဂီၫ် ဟဲထီၣ်သုးကျိၤလၢဂံၫ်ဘါအါအါဂီၫ်ဂီၫ်န့ၣ်လီၤ.
