လါအီကူၥ်(၂၆)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ စးထီၣ်လၢ၂၀၂၁နံၣ်, လါဖ့ၤဘြူၤအါရံၤ(၁)သီတုၤ ၂၀၂၅နံၣ်, လါအီကူၥ်(၁၅)သီအတီၢ်ပူၤ ထံဖိကီၢ်ဖိကမျၢၢ် ဘၣ်သံ၀ဲ(၅,၆၆၆)ဂၤ၀ံၤ ဟံၣ်ဃီ(၇၅,၈၈၅)ဖျၢၣ် ဘၣ်တၢ်ဒွဲၣ်အူမၤဟးဂီၤကွံၥ်အီၤအဂ့ၢ် ဒီကလုၥ်ဒံၣ်မိၣ်ကရ့ၣ်စံၣ်ကရၢခိၣ်ကျၢၢ်(NLD) အပှၤဂ့ၢ်၀ီတၢ်မၤနီၣ်ထၢဖှိၣ်ကရၢ(HRDT) အလံၥ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
ပှၤသံတဖၣ်အကျါ (NLD)ကရၢဖိ ဘျီၣ်ဒိၣ်ခၢၣ်စး ၈ဂၤ, ကရၢဖိ ၁၁၀ဂၤ, ပှၤလၢအသးနံၣ်တပှဲၤဒံး ဖိသၣ် ၅၁၈ဂၤဒီး ပိၥ်မုၣ် ၁,၀၂၅ဂၤ ပၣ်ဃုၥ်၀ဲအဂ့ၢ် လံၥ်ပၥ်ဖျါလၢပၥ်ဖျါထီၣ်၀ဲ လါအီကူၥ်(၂၄)သီအနံၤအပူၤအဖီခိၣ် တၢ်သ့ၣ်ညါဘၣ်န့ၣ်လီၤ.
တကးဘၣ် ခီဖျိသုးခီၣ်မံးရှၢၣ်အသုး အတၢ်မၤအၢမၤသီတဖၣ်အပူၤ ကမျၢၢ်(၁၉,၁၆၇)ဂၤဘၣ်တၢ်ဖီၣ်န့ၢ်ဆူၣ်အီၤ၀ံၤ ဖဲန့ၣ်အကျါ (NLD)ဘျီၣ်ဒိၣ်ခၢၣ်စး ၁၄၀ဂၤ, ကရၢဖိ ၂,၈၃၆ဂၤ, ဖိသၣ်လၢသးနံၣ်တပှဲၤဒံး ၂၆၀ဂၤဒီး ပိၥ်မုၣ် ၂,၅၆၅ဂၤပၣ်ဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးခီၣ်မံးရှၢၣ်အသုး ပညိၣ်ဒုး၀ဲ (NLD)ပၣ်တံၣ်၀ဲၤဒၢးတဖၣ်အပူၤ လီၢ်ခၢၣ်သး၀ဲၤဒၢးပၣ်ဃုၥ် ကီၢ်ခီ, ကီၢ်စဲၣ်, ကီၢ်ရ့ၣ်, ကီၢ်ဆၣ်, ဒူသ၀ီအပတီၢ် ၀ဲၤဒၢးခဲလၢၥ်ပၥ်ဖှိၣ် ၁၆၇ဖျၢၣ် ဘၣ်ဟးဂီၤကွံၥ်၀ဲန့ၣ်လီၤ.
ကမျၢၢ်အတၢ်စုလီၢ်ခီၣ်ခိၣ်တဖၣ်ဒ်အမ့ၢ် ဟံၣ်ဃီဒီးတၢ်ဖိတၢ်လံၤတဖၣ်စ့ၢ်ကီး ကးတံၥ်ကွံၥ်အီၤလၢတအိၣ်ဒီးအဖိးသဲစးဒီး မၤဟးဂီၤကွံၥ်၀ဲအဃိ ကမျၢၢ် ၈၄၂ဂၤ အစုလီၢ်ခီၣ်ခိၣ်တဖၣ် ဘၣ်ဟးဂီၤကွံၥ်၀ဲဒၣ်န့ၣ်လီၤ.
တကးဒံးဘၣ် စးထီၣ်လၢသုးဟံးန့ၢ်ဆူၣ်တၢ်စိတၢ်ကမီၤဒီးတုၤခဲအံၤအတီၢ်ပူၤ ပညိၣ်ဒုး၀ဲတမ့ၢ်သုးတၢ်ခးပနီၣ်ဘၣ်အမဲၥ်ညါ မၤ၀ဲကလံၤကျါတၢ်ဒုး ဖဲလီၢ်က၀ီၤကမျၢၢ်အိၣ်ဒူသ၀ီတဖၣ်အပူၤ အိၣ်ထီၣ်၀ဲ ၇၂၁ဘျီ၀ံၤ ဟံၣ်ဃီ, တၢ်ဘူၣ်တၢ်ဘါတၢ်သူၣ်ထီၣ်, တၢ်သိၣ်လိကၠိဒီး တၢ်ဆါဟံၣ်, တၢ်ဟ့ၣ်ကသံၣ်ဒၢးတဖၣ်ပၣ်ဃုၥ် တၢ်သူၣ်ထီၣ်ခဲလၢၥ်ပၥ်ဖှိၣ် ၂,၆၀၀ဘၣ်ဟးဂီၤကွံၥ်၀ဲအဂ့ၢ် လံၥ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ခီဖျိသုးခီၣ်မံးရှၢၣ်အသုး ခးကျိဖးဒိၣ်, ကျိဆံးးတဖၣ်အဃိ တၢ်သူၣ်ထီၣ်ခဲလၢၥ် ၁၃,၂၇၀ ဘၣ်ဟးဂီၤကွံၥ်၀ဲ၀ံၤ ကမျၢၢ်လၢတၢ်ကမၣ်တအိၣ် ၂,၈၄၉ဂၤ ဘၣ်ဒိ၀ဲအဂ့ၢ် စံး၀ဲန့ၣ်လီၤ.
တၢ်အနီၣ်ဂံၢ်နီၣ်ဒွးစရီလၢ တၢ်ပၥ်ဖျါတ့ၢ်လၢထးတဖၣ်အံၤ မ့ၢ်ဒၣ် HRDTကရၢ အတၢ်မၤနီၣ်ထၢဖှိၣ်ဃၥ်၀ဲ၀ံၤ ဟီၣ်ခိၣ်မဲၥ်ဖံးခိၣ်တခီ ကအိၣ်အါန့ၢ်ဒံးအလီၢ်အဂ့ၢ် ဒုးသ့ၣ်ညါဃၥ်၀ဲန့ၣ်လီၤ.
