လါအီကူၥ်(၂၀)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်သူလ့ၤတၢ်ပၢဟီၣ်ကဝီၤ, ဒူသထူၣ်ကီၢ်ရ့ၣ်, ကၠဲးထိၣ်ကီၢ်ဆၣ်အပူၤ မီၤစိရိၤသုးခီၣ်မံးရှၢၣ်အသုး ပၥ်ဝဲတၢ်ခးပနီၣ်ဆူ ထံဖိကီၢ်ဖိကမျၢၢ်တဖၣ်အအိၣ်တၢ်လီၢ် သဝီအပူၤဒီး ဒုးတ့ၢ်လီၤမ့ၣ်ပိၢ်လၢကလံၤကျါဒီး ခးကျိဖးဒိၣ် ,ကျိဖိအဃိ ထံဖိကီၢ်ဖိကမျၢၢ်သံ (၁)ဂၤဒီး ဘၣ်ဒိ(၅)ဂၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သး ပၥ်ဖျါဃၥ်၀ဲတၢ်ကစီၣ် ဖဲလါအီကူၥ်(၁၉)သီအနံၤန့ၣ်လီၤ.
တၢ်ဒုးကဲထီၣ်သးတအိၣ်ဘၣ်ဒီး ဖဲအပူၤကွံၥ်လါအီကူၥ်(၉)သီအနံၤ သုးခီၣ်မံးရှၢၣ်အသုး Yak-130 ကဘီယူၤ ဟဲတ့ၢ်လီၤမ့ၣ်ပိၢ်ဖဲ ပ့နဲကိသ၀ီပူၤအဃိ လီၢ်က၀ီၤကမျၢၢ်သံ၁ဂၤဘၣ်ဒိ၅ဂၤ၀ံၤ ဟံၣ်၅ဖျၢၣ်, သိလ့ၣ်ဒီးမီၣ်တီၣ်တုၥ်တဖၣ် ဘၣ်ဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် ဖဲလါအီကူၥ်(၁၁)သီအနံၤစ့ၢ်ကီး သုးခီၣ်မံးရှၢၣ်အသုးလၢအိၣ် ဖဲနီၣ်ဂံၢ်(၄၄)ခီၣ်ချ့သုးတြိၤသုး၀ဲၤလီၢ်ခိၣ်သ့ၣ်အပူၤတဖၣ် ခးလီၤ၀ဲ ၁၂၀-မမကျိဖးဒိၣ်တဖၣ်အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲအနံၤဟါလီၤခီန့ၣ် သုးခီၣ်မံးရှၢၣ်အစုတီၤဖီလၥ် ခလရ-၈ဒီး ခမရ-၃သုးရ့ၣ်ပၥ်ဖှိၣ်တဖၣ် လဲၤနုၥ်၀ဲ ခၠီပၠၣ်သ၀ီပူၤ၀ံၤ ခးနါစိၤကျိအဃိ နီၢ်ပါကၠံၣ်သးနံၣ်(၅၀) ကျိဘၣ်အီၤအဃိ ဘၣ်လဲၤဆှၢအီၤဆူ သထူၣ်တၢ်ဆါဟံၣ်အဂ့ၢ် တၢ်ကစီၣ်အပူၤပၥ်ဖျါဃၥ်၀ဲန့ၣ်လီၤ.
သုးခီၣ်မံးရှၢၣ်အသုး ဟံးန့ၢ်ဆူၣ်ထံကီၢ်တၢ်စိတၢ်ကမီၤ (၄)နံၣ်ဘျဲၣ်အတီၢ်ပူၤ ခီဖျိအတၢ်မၤအၢမၤသီတဖၣ်အဃိ ထံဖိကီၢ်ဖိကမျၢၢ်ဒီးပှၤဟူးဂဲၤဒံၣ်မိၣ်ကရ့ၣ်စံၣ်ဂ့ၢ်၀ီ ခဲလၢၥ်ဘၣ်သံ၀ဲ(၇၁၀၀)ဂၤအဂ့ၢ် တၢ်မၤစၢၤထံရူၢ်ကီၢ်သဲးပှၤလီၤဃိၥ်ဖိကရၢ (AAPP)အလံၥ်ပၥ်ဖျါအဖီခိၣ် တၢ်သ့ၣ်ညါဘၣ်န့ၣ်လီၤ.
