လါအီကူၥ်၁၄သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ စးထီၣ်လၢ၂၀၂၁နံၣ်, လါဖ့ၤဘြူၤအါရံၤ(၁)သီတုၤ၂၀၂၅နံၣ်, လါအီကူၥ်(၁၃)သီအနံၤခီဖျိမီၤစိရိၤပယီၤသုးကရူၢ်အံၤအဃိထံဖိကီၢ်ဖိကမျၢၢ်ခဲလၢၥ်(၇,၀၆၃)ဂၤဘၣ်သံ၀ဲအဂ့ၢ် တၢ်မၤစၢၤထံရူၢ်ကီၢ်သဲးပှၤလီၤဃိၣ်ဖိကရၢ(AAPP) ထုးထီၣ်ပၥ်ဖျါဃၥ်၀ဲန့ၣ်လီၤ.
AAPPအတၢ်ထုးထီၣ်ပၥ်ဖျါအဖီခိၣ် ဘၣ်ထွဲဒီးသုးဟံးန့ၢ်ဆူၣ်တၢ်စိတၢ်ကမီၤဂ့ၢ်၀ီအဃိ ပှၤလၢဘၣ်တၢ်ဖီၣ်န့ၢ်ဆူၣ်အီၤ ခဲလၢၥ်(၂၉,၅၃၈)ဂၤ၀ံၤ ကတီၢ်ခဲအံၤန့ၣ် ပှၤ(၂၂,၂၉၇)ဂၤတခီ ဘၣ်တၢ်ဖီၣ်ဃၥ်အီၤအဖၢမုၢ်ဒံးန့ၣ်လီၤ. ပှၤလၢဘၣ်တၢ်ဖီၣ်အီၤတဖၣ်အကျါ ပှၤ(၁၀,၉၇၅)တခီ တၢ်စံၣ်ညီၣ်ပၥ်လီၤဃိၥ်ပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ဂ့ၢ်တၢ်ကျိၤအနီၣ်ဂံၢ်နီၣ်ဒွးလၢ တၢ်ပၥ်ဖျါဃၥ်လၢထးတဖၣ်အံၤ မ့ၢ်ဒၣ် AAPP အတၢ်ထၢဖှိၣ်မၤနီၣ်စရီအဖီခိၣ်လီၤဒီး မ့မ့ၢ်ဟီၣ်ခိၣ်မဲၥ်ဖံးခိၣ်တခီ ကအိၣ်အါန့ၢ်ဒံးအလီၢ်အဂ့ၢ် စံး၀ဲန့ၣ်လီၤ.
၂၀၂၅နံၣ်, လါယူၤ(၁)သီတုၤလါအီကူၥ်(၁၃)သီအနံၤအတီၢ်ပူၤ ပှၤလၢသုးကရူၢ်အံၤဖီၣ်အီၤ၀ံၤအလီၢ်ခံ ပှၤဘၣ်သံခဲလၢၥ်(၃၄)ဂၤ(ပိၥ်ခွါ ၃၃ဂၤ, ပိၥ်မုၣ်၁ဂၤ)အိၣ်ထီၣ်၀ဲ၀ံၤ စကဲကီၢ်ခီအပူၤတခီ ပှၤဘၣ်သံအိၣ်ထီၣ်၀ဲ(၁၂)ဂၤဒီး ပှၤသံအအါကတၢၢ်လီၤအဂ့ၢ် AAPP ပၥ်ဂၢၢ်ပၥ်ကျၢၢ်ဃၥ်၀ဲန့ၣ်လီၤ.
လါအီကူၥ်(၉)သီအနံၤ, မီၤစိရိၤပယီၤသုးကရူၢ် အသုးလၢအဂံၢ်အဘါအိၣ်(၁၀၀)ဃၣ်ဃၣ် လဲၤနုၥ်လီၤသုးကျိၤဆူ မါတလ့ကီၢ်ခီ, မၠ့ခၠၣ်ကီၢ်ဆၣ်, ဘလိၣ်သ၀ီပူၤ၀ံၤ လီၢ်က၀ီၤဖိတဖၣ် ဃ့ၢ်ပူၤဖျဲးသးအဆၢကတီၢ် ကိၣ်ခဲၣ်လ့န့ၣ် လဲၤထံၣ်လိၥ်သးဒီးသုးကျိၤ၀ံၤ ဘၣ်တၢ်ဒီၣ်တဲၥ်ကွံၥ်အကိၥ်မၤသံအီအဂ့ၢ် AAPPအတၢ်ထုးထီၣ်ပၥ်ဖျါအဖီခိၣ် ပၥ်ဖျါဃၥ်၀ဲန့ၣ်လီၤ.
