လါအီကူၥ်(၁၃)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
တၢ်ဃုထၢလၢ မီၤစိရိၤသုးကရူၢ်အံၤ ကရဲၣ်ကျဲၤမၤ၀ဲ သုတကဲထီၣ်လိၣ်ထီၣ်အဂီၢ် ပကဘၣ်ပၥ်အီၤဒ် ဒီကလုၥ်အမူအဒါအသိးအဂ့ၢ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကရၢခိၣ် ပဒိၣ်စီၤကွဲၤထူ၀့ တဲဆီၣ်တခုထီၣ်၀ဲဖဲ လါအီကူၥ်(၁၂)သီလၢအလီၤဘၣ် ၇၅၀ီတ၀ီ ကညီမၤထူရၤမုၢ်နံၤ မူးတၢ်ရဲၣ်တၢ်ကျဲၤအပူၤန့ၣ်လီၤ.
တၢ်ဃုထၢလၢ ကရဲၣ်ကျဲၤမၤ၀ဲလၢ တနံၣ်အံၤနံၣ်ကတၢၢ်န့ၣ် မ့ၢ်ကဲထီၣ်လိၥ်ထီၣ်န့ၣ် မ့ၢ်ကမၤထီထီၣ်,ဆူၣ်ထီၣ် တၢ်ဘၣ်ဂံၢ်ဂူၥ်ဖဲကီၢ်ပူၤအံၤအသိး တကးဘၣ် လီၤဆီဒၣ်တၢ် အကစံၣ်ညီၣ် ပှၤသူၣ်စၢ်သးဘီၣ်တဖၣ်အခါဆူညါ အတၢ်အိၣ်မူဘူၣ်တီၢ်အဃိ တၢ်ကဘၣ်ပၥ်ဖှိၣ်ဂဲၤလိၥ်သကိးအီၤလၢ ပသနၢၣ်ဒၣ်၀ဲစုၥ်စုၥ်လၢကျဲကိးဘိဒဲးဒီးသူၣ်ထီၣ်က့ၤထံကီၢ်အံၤဆူ ဖဲၣ်ဒရဲၣ်ဒံၣ်မိၣ်ကရ့ၣ်စံၣ်ထံကီၢ်အဂီၢ်အဂ့ၢ် တဲဆီၣ်တခုထီၣ်ဃၥ်၀ဲန့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤအခိၣ်သုးခိၣ်ကျၢၢ်စိရိၤမ့အီၣ်လဲၣ်န့ၣ်ဟံးန့ၢ်ဆူၣ်ထံကီၢ်တၢ်စိတၢ်ကမီၤ(၄)နံၣ်ဘျဲၣ်၀ံၤအလီၢ်ခံ အတၢ်စိတၢ်ကမီၤကအိၣ်ဂၢၢ်အိၣ်ကျၢၤဖိးသဲစးလၢဟီၣ်ခိၣ်ဘီမုၢ်ထံကီၢ်တဖၣ်အမဲၥ်ညါအဂီၢ်ဆိကတီၢ်ကွံၥ် သုးတၢ်ပၢတၢ်ပြးဒီးကရၢကရိထီၣ်၀ဲ “ထံကီၢ်တၢ်ဘံၣ်တၢ်ဘၢဒီးတၢ်မုၥ်တၢ်ခုၣ်ခီၣ်မံးရှၢၣ်” ဘၣ်ဆၣ် တၢ်စိကမီၤခဲလၢၥ် အိၣ်၀ဲဒၣ်လၢ ပှၤတဒူၣ်ဃီလၢအဘၣ်တၢ်တီခိၣ်ရိၣ်မဲအီၤလၢ မိၤစိရိၤကစၢ် မ့ၣ်အီၣ်လဲၣ်အစုပူၤလီၤအဂ့ၢ် KNUကရၢခိၣ်စံး၀ဲန့ၣ်လီၤ.
“တၢ်ဃုထၢအမူးအံၤ မ့ၢ်တၢ်မၤကဒါပမဲၥ်, မ့ၢ်တၢ်ကမၤန့ၢ်ဘၣ် ဟီၣ်ခိၣ်ဘီမုၢ်ထံကီၢ် အတၢ်သ့ၣ်ညါပၥ်ပနီၣ်အီၤအဂီၢ်န့ၣ်လီၤ. တၢ်ဃုထၢအမူးအံၤ အတၢ်ကဲထီၣ်ထီၣ်လိၣ်ထီၣ်, မ့ၢ်တၢ်မၤဂၢၢ်မၤကျၢၤ(၂၀၀၈)တၢ်သူၣ်ထီၣ်ထံကီၢ်တၢ်ဘျၢသဲစးခိၣ်သ့ၣ်လၢ အကဟ့ၣ်စိကမီၤသုးအတၢ်ဒိၣ်စိလၢထံကီၢ်အံၤထံရူၢ်ကီၢ်သဲးတၢ်တီခိၣ်ရိၣ်မဲဆူ သုးမီၤစိရိၤကရူၢ်အံၤအစုပူၤ လၢအကတၢၢ်ကတၥ်တအိၣ်ဘၣ်”အဂ့ၢ် စံး၀ဲန့ၣ်လီၤ.
ကညီတၢ်ပၢၢ်ဆၢတၢ်ဂဲၤလိၥ်ဒီတကတီၢ်အပူၤတၢ်ဂဲၤလိၥ်အီၤလၢသုးဂ့ၢ်၀ီအကျဲမ့ၢ်ဂ့ၤဒီးထံရူၢ်ကီၢ်သဲးဂ့ၢ်၀ီအကျဲမ့ၢ်ဂ့ၤန့ၣ် ဘၣ်ကွၢ်ဆၢၣ်မဲၥ်ဘၣ်ဒီး ကလုၥ်ဒိၣ်စိသနူဒီးမီၤစိရိၤသနူအသိး ကတီၢ်ခဲအံၤစ့ၢ်ကီး ဘၣ်ကွၣ်ဆၢၣ်မဲၥ်ဘၣ်ဒီး ပှၤလၢအဟံးဃၥ် ကလုၥ်ဒိၣ်စိသနူဒီးစူးကါ၀ဲသုးဂံၢ်ဘါလၢအမ့ၢ် ပယီၤသုးမီၤစိရိၤကရူၢ်အဃိ KNUတခီ ပယီၤသုးမီၤစိရိၤကရူၢ်အတၢ်ဒိၣ်စိအစိၤကကတၢၢ်၀ဲဒၣ်အဂီၢ်ဒ်ကညီဒီကလုၥ်စၢဖှိၣ်ကရၢထံရူၢ်ကီၢ်သဲးအတၢ်ပညိၣ်အိၣ်၀ဲဒၣ်အသိး ကပၥ်ဖှိၣ်ထီၣ်သးဒီးကလုၥ်ဒူၣ်တၢ်ပၢၢ်ဆၢကရၢတဖၣ်, ထံရူၢ်ကီၢ်သဲးပၣ်တံၣ်တဖၣ်ဒီးကရူၢ်ကရၢ, ကလုၥ်ဒူၣ်ထံဖိကီၢ်ဖိတဖၣ်ခဲလၢၥ် လၢအထီဒါသနူဒီးသုးမီၤစိရိၤကရူၢ်အံၤအဂ့ၢ် KNU ကရၢခိၣ် ပဒိၣ်စီၤကွဲၤထူ၀့ တဲလီၤဃၥ်၀ဲဖဲ အတၢ်ကတိၤလီၤအပူၤန့ၣ်လီၤ.
