လါအီကူၥ်(၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၢ်စဲၣ်, ၀့ၢ်ဖၣ်အၣ်အပူၤ တၢ်ဖီၣ်၀ဲသိလ့ၣ်လၢလဲၣ်စ့ၣ်တအိၣ်အကျါ ပှၤလၢအိၣ်ဘူးဒီးသုးတ၀ၢတဖၣ်တခီ တဖီၣ်၀ဲဘၣ်ဒီး ဖီၣ်ဒၣ်ထဲလီၢ်က၀ီၤကမျၢၢ်ဖိသိလ့ၣ်တဖၣ်အဂ့ၢ် ပှၤ၀့ၢ်ဖၣ်အၣ်ဖိတဂၤ စံး၀ဲန့ၣ်လီၤ.
သုးခိးကီၢ်ဆၢ(BGF),ကညီတၢ်မုၥ်တၢ်ခုၣ်ကီၣ်ကး(PC)လၢမၤသကိးတၢ်ဒီးသုးကရူၢ်,ကညီတၢ်ဘၣ်ဘျူးဒံၣ်မိၣ်ကရ့ၣ်စံၣ်သုးမုၢ်ဒိၣ်(DKBA)ကရၢတဖၣ်အံၤ အသိလ့ၣ်ဒီးမီၣ်တီၣ်တုၥ်တဖၣ်တခီ တၢ်ဖီၣ်၀ဲတအိၣ်ဘၣ်အဂ့ၢ် အ၀ဲစံး၀ဲန့ၣ်လီၤ.
“ဘၣ်မနုအဃိပစံးဒ်အံၤလဲၣ်န့ၣ်ပထံၣ်ဘၣ်အီၤအဃိလီၤ.အိၣ်ဒၣ်ထဲတမံၤလၢတကြၢးယဲၤထီၣ်အမံၤအသၣ်ဘၣ်အဃိ တတဲဘၣ်လီၤ. ပသ့ၣ်ညါဘၣ်ကိးမုၢ်နံၤလီၤ. မတၤန့ၣ်အဒိးသိလ့ၣ်ဒ်လဲၣ်. အခဲအံၤန့ၢ်ဖီၣ်၀ဲ ဒီးဃ့အီၣ်ကျိၥ်စ့ က့ၤပျၢ်လီၤ၀ဲ” အဂ့ၢ် စံး၀ဲန့ၣ်လီၤ.
၀့ၢ်ဖၣ်အၣ်အပူၤ ဖဲအပူၤကွံၥ်စှၤသီအတီၢ်ပူၤန့ၣ် ထံဒိၣ်နိယွၤကဲထီၣ်တ့ၢ်၀ဲအဆၢကတီၢ် တၢ်ကစီၣ်ဟးထီၣ်လၢ တၢ်တဖီၣ်၀ဲလၢၤသိလ့ၣ်လၢလဲၣ်စ့ၣ်တအိၣ်ဘၣ်ဆၣ် တမ့ၢ်လၢအဘိးဘၣ်ရၤလီၤ၀ဲ အဖိးဒီးသဲစးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကညီကီၢ်စဲၣ်အပူၤ သိလ့ၣ်လၢလဲၣ်စ့ၣ်တအိၣ်န့ၣ်အါန့ၢ်ဒံးမီၣ်တီၣ်တုၥ်လၢလဲၣ်စ့ၣ်တအိၣ်၀ံၤ အပူၤကွံၥ်စိၤအလံၤလံၤ တၢ်ဟ့ၣ်ထီၣ်တၢ်ဂ့ၢ်လၢလီၢ်က၀ီၤတၢ်မုၥ်တၢ်ခုၣ်အဂီၢ်၀ံၤ တၢ်ပျဲဒိး၀ဲဘၣ်ဆၣ် စးထီၣ်လၢလါယူၤန့ၣ် သုးခီမံရှၢၣ်လၢ ဟံးန့ၢ်ဆူၣ်တၢ်စိတၢ်ကမီၤအံၤ စးထီၣ်သမံးသမိးဒီးဖီၣ်၀ဲ သိလ့ၣ်လၢလဲၣ်စ့ၣ်တအိၣ်ဘၣ်တဖၣ်န့ၣ်လီၤ.
တကပၤစ့ၢ်ကီး ခီဖျိလၢတၢ်ထၢအါထီၣ်လဲၣ်စ့ၣ်အခိဒီး အိၣ်ဘူးဒီးကီၢ်ဆၢအဃိ သိလ့ၣ်လၢလဲၣ်စ့ၣ်တအိၣ်တဖၣ် ဟဲအါထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
“အပူၤကွံၥ်စိၤအလံၤလံၤန့ၣ် ညီနုၥ်ပနီဒ်အံၤလီၤ. မ့ၢ်သမံးသမိး၀ဲလဲၣ်စ့ၣ်ဒၢး သမံးသမိးဒၣ်၀ဲ, မ့ၢ်တဖိးသဲစးဘၣ်ဒီးဖီၣ်သ့လီၤ. အခဲအံၤတခီ တဖီၣ်၀ဲတမၤ၀ဲဒ်န့ၣ်ဘၣ်ဒီး ဖီၣ်ဒၣ်ထဲလီၢ်က၀ီၤကမျၢၢ်သိလ့ၣ်တဖၣ်လီၤ. လီၤဂၥ်ဒ်သိး တၢ်ကဃ့န့ၢ်ဆူၣ်ကျိၥ်စ့အဂီၢ် ပၥ်လီၤ၀ဲသဲစးတၢ်ဘျၢ”အဂ့ၢ် လီၢ်က၀ီၤဖိအဂၤတဂၤ စံး၀ဲန့ၣ်လီၤ.
ကညီကီၢ်စဲၣ်အပူၤ အပူၤကွံၥ်အနံၣ်၃၀ဘျဲၣ်လံၤလံၤန့ၣ် သိလ့ၣ်လၢလဲၣ်စ့ၣ်တအိၣ်တဖၣ် တၢ်တီၣ်သွီနုၥ်အီၤလၢ ကီၢ်ကၠီၣ်တဲၣ်တပၤအဂ့ၢ် စံး၀ဲန့ၣ်လီၤ.
“အကလီၢ်၁၀၀န့ၣ် တၢ်ပှ့ၤသိလ့ၣ်န့ၢ်၃ခိၣ်အစိၤစ့ၢ်ကီးအိၣ်၀ဲ”အဂ့ၢ် စံး၀ဲန့ၣ်လီၤ.
သုးကရူၢ်အံၤ ခီဖျိထၢအါထီၣ်အခိလၢတကြၢးဒီးကတီၢ်အံၤတၢ်အိၣ်သးဘၣ်အဃိ လီၢ်က၀ီၤကမျၢၢ်တဖၣ် ကလဲၤထုးထီၣ်လဲၣ်စ့ၣ်အဂီၢ်တၢ်ကီတၢ်ခဲအိၣ်ထီၣ်၀ံၤ လိၣ်လၢတၢ်ကဘၣ်ဟ့ၣ်တၢ်ထုးထီၣ်လဲၣ်စ့ၣ်တၢ်ပျဲလၢ ကြၢးဒီးကီၢ်စဲၣ်အံၤအဂ့ၢ် တၢ်စံး၀ဲတဖၣ်စ့ၢ်ကီး အိၣ်၀ဲန့ၣ်လီၤ.
အပူၤကွံၥ်ပဒိၣ်အစိၤလံၤလံၤ ကီၢ်စဲၣ်ဘျီၣ်ဒိၣ်ခၢၣ်စးတဖၣ် တီၣ်ဖျါထီၣ်လၢ သိလ့ၣ်လၢလဲၣ်စ့ၣ်တအိၣ်တဖၣ်အဂီၢ် တၢ်ကထုးထီၣ်ထီၣ်န့ၢ်သနူလၢအကြၢးဒီးလီၢ်က၀ီၤတၢ်အိၣ်သးအဂီၢ်ဘၣ်ဆၣ် ပဒိၣ်အစိၤစိၤလၢပၢ၀ဲဒ်လီၢ်ခၢၣ်သးတၢ်ဖီၣ်ပျံၤသနူအံၤ တမၤဖျါထီၣ်န့ၢ်အမိၢ်လံမိၢ်ပှၢ်လၢ သနူအကြၢးအဘၣ် ဘၣ်အဂ့ၢ် ပှၤ၀့ၢ်ဖိတနီၤ ဟ့ၣ်ထီၣ်၀ဲတၢ်ထံၣ်စ့ၢ်ကီး အိၣ်၀ဲန့ၣ်လီၤ.
Ref: NDM
