လါအီကူၥ်(၈)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကီၢ်ပယီၤသုးကရူၢ်အံၤ သုးကွီၢ်မ့ၣ်တဖၣ်လၢအမၤကမၣ်တ့ၢ်၀ဲတဖၣ် ကမၤလီၤမၣ်ကွံၥ်အဂီၢ် ဒိးလဲလီၤ(ငါ) အမဲရကၤ Lobbyကရၢ DCIလၢအမဲရကၤစ့ဒီလၣ် ၃ကကွဲၢ်လၢ လံၥ်တၢ်အၢၣ်လီၤအဂ့ၢ် Justice For Myanmar (JFM)ထုးထီၣ်ပၥ်ဖျါဃၥ်၀ဲ ဖဲလါအီကူၥ်(၇)သီအနံၤန့ၣ်လီၤ.
တချူးတၢ်ဃုထၢအယီၤအဘျၣ်လၢ သုးခီမံးရှၢၣ်ကရဲၣ်ကျဲၤမၤအဆၢကတီၢ် အတၢ်ဂုၥ်ကျဲးစၢးလၢ ဒ်သိးကဒိးန့ၢ်ထံရူၢ်ကီၢ်သဲးအဖိးသဲစးအဂီၢ် သုးကွီၢ်မ့ၣ်တဖၣ်လၢအမၤကမၣ်တ့ၢ်၀ဲတဖၣ် ကမၤလီၤမၣ်ကွံၥ်အဂီၢ်ဒီး အသူးသ့ၣ်လၤကပီၤကဂ့ၤအဂီၢ် စူးကါ၀ဲစ့ပၥ်ကီၤအကကွဲၢ်အါအါဂီၢ်ဂီၢ်လၢဟုၣ်ဘျၣ်ဃၥ်၀ဲတဖၣ်ဒီး ဒိးလဲလီၤ(ငါ)၀ဲ Lobbyကရၢ DCIလၢအဘူးဒီးအမဲရကၤရံၣ်ပၣ်ပလ့ၣ်ကၣ်ပၣ်တံၣ်အဂ့ၢ် လံၥ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
DCI Group အတၢ်ပၢဆှၢအဖီလၥ်သိၣ်မှံ Justin Petersonဒီး သုးကရူၢ်အံၤ အပှၤ၀့ကၠီၣ်အီၣ်ခၢၣ်စး တၢ်ကစီၣ်တၢ်ဘိးဘၣ်ရၤလီၤကိတိၥ်၀ဲကျိၤတဖၣ်အဘၢၣ်စၢၤ ဆဲးလီၤမံၤစဲပနီၣ် လံၥ်တၢ်အၢၣ်လီၤတဘ့ၣ်လၢ အသးသမူကစးထီၣ်မူ ဖဲလါယူၤလံ(၃၁)သီအနံၤ၀ံၤ” တၢ်ကူလဲၢ်မၤကၤ, န့ဆၢၣ်ဟီၣ်လၥ်တၢ်ထူးတၢ်တီၤ, ပှၤဟီၣ်ခိၣ်ဖိတၢ်ဒိသူၣ်ဒိသးတၢ်မၤစၢၤ”ဂ့ၢ်၀ီတဖၣ်အပူၤကက့ၤသူၣ်ထီၣ်တၢ်ရ့ၣ်လိၥ်မုၥ်လိၥ်ဒီးအမဲရကၤကီၢ်စၢဖှိၣ်အဂီၢ် ကဘၣ်ဟ့ၣ်လီၤ၀ဲအမဲရကၤစ့ဒီလၣ်၃ကကွဲၢ်လၢ ၁နံၣ်အဂီၢ်န့ၣ်လီၤ.
DCI Lobbyကရၢ မ့ၢ်မၤကဆှီန့ၢ်ကွံၥ်ဒီးမ့ၢ်မၤလီၤမၣ်ကွံၥ် သုးကွီၢ်မ့ၣ်လၢ ကီၢ်ပယီၤသုးကရူၢ်အံၤမၤကမၢ်တ့ၢ်၀ဲတဖၣ်ဒၣ်လဲၥ် တမ့ၢ်လၢကလီၤမၣ်ဘၣ်ဒီး ကပူၤဖျဲးဒီးတၢ်ဟံးန့ၢ်ဂ့ၢ်၀ီလၢအတၢ်မၤအၢမၤသီတဖၣ်အဖီခိၣ်အဂီၢ် DCI Groupလၢ အဖီၣ်လိၥ်စုမၤသကိးတၢ်ဒီး သုးကရူၢ်အံၤအဖီခိၣ် ထီဒါ၀ဲအဂ့ၢ်န့ၣ် JFM စံး၀ဲန့ၣ်လီၤ.
