လါအီကူၥ်(၇)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၂), ကီၢ်ရ့ၣ်တီအူ, ၀့ၢ်ဒီၣ်ဖးခိၣ်ဒီးသ၀ီတဖၣ်အပူၤ ခီဖျိမူခိၣ်စူၤ(၂)သီတပယူၥ်ဃီအဃိ ဟီၣ်ခိၣ်လီၤပှီၢ်ကဲထီၣ်၀ဲဒီး ကမျၢၢ်ဘၣ်သံ၀ဲ(၉)ဂၤ၀ံၤ ဟံၣ်ဃီ(၂၀)ဘျဲၣ် ဘၣ်ဟးဂီၤကွံၥ်၀ဲအဂ့ၢ်ဒီး လိၣ်ဘၣ်တၢ်မၤပူၤဖျဲးတၢ်မၤစၢၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ် တၢ်လူၤဃုကွၢ်၀ဲတၢ်သံအစိၣ်တဖၣ်အဖၢမုၢ်ဒံးအဃိ ပှၤသံအနီၣ်ဂံၢ်အိၣ်အါထီၣ်သ့၀ံၤ ပှၤလၢလီၤမၢ်တဖၣ်စ့ၢ်ကီး တၢ်မၤနီၤဃၥ်စရီတန့ၢ်ဒံးဘၣ်အဂ့ၢ် ပှၤလၢမၤပူၤဖျဲးတၢ်တဂၤ စံး၀ဲန့ၣ်လီၤ.
ဒီၣ်ဖးခိၣ်၀့ၢ်အပူၤ ဟံၣ်ဃီတၢ်ဟးဂုၤဟးဂီၤတဖၣ်အိၣ်၀ံၤ မ့မ့ၢ်လၢဒူသ၀ီတဖၣ်အပူၤတခီ တၢ်ဖံးအီၣ်မၤအီၣ်ကရၢၢ်လၢအ့ကၢၢ်အကထိတဖၣ် ဟီၣ်ခိၣ်လီၤဘၢကွံၥ်အဂ့ၢ်စံး၀ဲန့ၣ်လီၤ.
ပှၤမၤပူၤဖျဲးတၢ်တဂၤစံး၀ဲလၢ”အစးထီၣ်ကဲထီၣ်သးလၢ၂၇သီအနံၤလီၤ.မူခိၣ်စူၤ၀ံၤကရၢၢ်ဒီးဟံၣ်ဃီတဖၣ်ဟီၣ်ခိၣ်လီၤပှီၢ်ကွံၥ်လီၤ.ပှၤကညီသံဒီးဘၣ်ဒိတခီတအိၣ်ဒံးဘၣ်.၀ံၤလီၢ်ခံ၄သီ၅သီတၢ်ကဲထီၣ်သးအပူၤတခီတၢ်သံတၢ်ပှၢ်တဖၣ်အိၣ်ထီၣ်၀ဲလီၤ.တၢ်မၤပူၤဖျဲးတၢ်ဖံးတၢ်မၤတခီပကရၢလၢအိၣ်ဖဲ၀့ၢ်ပူၤတဖၣ်ဟူးဂဲၤ၀ဲဒ်မၤန့ၢ်မၤသ့အသိးလီၤ.တၢ်မၤပူၤဖျဲးတၢ်မၤစၢၤလၢတၢ်ချၢတဖၣ် ဟဲ၀ဲတန့ၢ်ဘၣ်. ကျဲးစ့ၢ်ကီး ကးတံၥ်သးအဃိ ကျဲအိၣ်ဒၣ် တီအူ-ဒီၣ်ဖးခိၣ်ထဲတဘိဧိၤလီၤ. ကျဲကးတံၥ်အသးဖဲန့ၣ်အဃိပ၀ဲသိလ့ၣ်စ့ၢ်ကီးလ့ၤလိၤ၀ဲတန့ၢ်ဘၣ်.အကဲထီၣ်ကဒီးအသးဖဲလၢတၢ်ဘှီဘၣ်ကျဲအဆၢကတီၢ်အဃိ တၢ်ဘၣ်ပတုၥ်ဃၥ်၀ဲတၢ်ဖံးတၢ်မၤ၀ံၤ တၢ်ဘၣ်ခူၣ်၀ဲဟီၣ်ခိၣ်လီၤ.ဘၣ်မၤ၀ဲဒၣ်လၢပှၤကညီအဂံၢ်အဘါလီၤ. စဲးဖီကဟၣ်တဖၣ်တအိၣ်ဘၣ်. သ့ၣ်ထူၣ်လီၤတကူၢ်တဖၣ်စ့ၢ်ကီး ဘၣ်မၤ၀ဲဒၣ်လၢပှၤကညီဂံၢ်ဘါလီၤ. အနီၢ်ကီၢ်တခီ ဒ်သိးတၢ်ကဃု Dead Bodyအဂီၢ် တၢ်မၤ၀ဲအဂ့ၢ်” န့ၣ်လီၤ.
ဟီၣ်ခိၣ်လီၤပှီၢ်ဒီးသ့ၣ်ထူတဖၣ်လီၤတကူၢ် လၢကျဲလၢအဘျးစဲဃၥ်လၢ ဒီၣ်ဖးခိၣ်ဒီးတီအူအဃိ လိၣ်ဘၣ်၀ဲ ပှၤကညီဂံၢ်ဘါဒီးစဲးဖီကဟၣ်ဂံၢ်ဘါတဖၣ်န့ၣ်လီၤ.
၀့ၢ်ပူၤတခီ လီမ့ၣ်အူဒီးလီတဲစိတၢ်ဆဲးကျိးဆဲးကျၢတဖၣ် ဒီၣ်တဲၥ်ကွံၥ်၀ံၤ ပှၤ၀့ၢ်ဖိတဖၣ် ဘၣ်မၤ၀ဲတၢ်မၤပူၤဖျဲးတၢ်ဖံးတၢ်မၤတဖၣ် အနီၢ်ကစၢ်ဒၣ်၀ဲန့ၣ်လီၤ.
ကတီၢ်ခဲအံၤန့ၣ် ခီဖျိဟီၣ်ခိၣ်လီၤပှီၢ်အဃိ သ၀ီတစှၤန့ၢ်(၆)ဖျၢၣ်ဘၣ်ဟးဂီၤကွံၥ်၀ံၤ မ့မ့ၢ်လၢ ထံပူၤခံသ၀ီတခီ ဘၣ်သုးဃၥ်သ၀ီဒီတဖျၢၣ်လီၤအဂ့ၢ် စံး၀ဲန့ၣ်လီၤ.
“မူခိၣ်စ့ၢ်ကီးန့ၣ် စူၤလီၤ၀ဲတုၤခဲအံၤန့ၣ်လီၤ. ဟံၣ်ဃီဒီးဟီၣ်ခိၣ်လီၤပှီၢ်အဃိ တၢ်ကထုးကွံၥ်ဟီၣ်ခိၣ်အဂီၢ် လိၣ်ဘၣ်၀ဲပှၤကညီဂံၢ်ဘါလီၤ. ကစၢၢ်ဖီခိၣ်စ့ၢ်ကီး အိၣ်ဒၣ်ထဲလၢၥ်လ့တဖၣ်ဒီး ဟံၣ်ဃီလီၤပှီၢ်ကွံၥ်အဃိ လိၣ်ဘၣ်၀ဲအိၣ်ဆိးလီၢ်ကျဲအဂီၢ်လီၤ. လိၣ်ဘၣ်၀ဲစ့ၢ်ကီးဟံၣ်ထူၣ်တဖၣ်ဒီး ထံကဆှီတဖၣ်လီၤ”အဂ့ၢ် လီၢ်က၀ီၤဖိတဂၤ စံး၀ဲန့ၣ်လီၤ.
စးထီၣ်လၢလါအီကူၥ်၄သီတုၤ၆သီအနံၤ ခီဖျိမူခိၣ်စူၤတပယူၥ်ဃီအဃိ ကစၢၢ်ထံတဖၣ်ဟဲလီၤ၀ံၤ ဟီၣ်ခိၣ်လီၤပှီၢ်အဃိ တၢ်ဘၣ်ဒိဘၣ်ထံးတၢ်သံတၢ်ပှၢ်တဖၣ်အိၣ်ထီၣ်၀ဲန့ၣ်လီၤ. ဒ်သိးကဒိးန့ၢ်ဘၣ် ထံကဆှီဒီး တၢ်ကရှဲကွံၥ်ကျဲလၢကးတံၥ်သးတဖၣ်အဂီၢ် ဃ့ထီၣ်ဃၥ်၀ဲတၢ်မၤစၢၤတဖၣ်လီၤ.
Ref: DVB
