လါယူလံၤ(၃၀)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
အမဲရကၤကီၢ်ခိၣ်ဒီၣ်နၢၤထရၢးပဒိၣ်ကရၢန့ၣ် ဒ်သိးကဆီတလဲဟံးန့ၢ် ကီၢ်ပယီၤဟီၣ်ခိၣ်လီၤဆီလၢ တရူးအစုပူၤ တၢ်ပညိၣ်ပၣ်ဃုၥ် သနူလၢအမဲရကၤပၥ်လီၤတ့ၢ်၀ဲဘၣ်ထွဲဒီးကီၢ်ပယီၤန့ၣ် ကဆီတလဲကွံၥ်တၢ်ကူၣ်ထီၣ်တဖၣ် နုၥ်လီၤဒိကနၣ်၀ဲအဂ့ၢ် ပှၤလၢသ့ၣ်ညါ၀ဲတဖၣ် တဲလီၤ၀ဲဆူ The Japantimesတၢ်ကစီၣ်သန့အဂ့ၢ် ပၥ်ဖျါဃၥ်၀ဲန့ၣ်လီၤ.
ကတီၢ်ခဲအံၤတခီ တပၥ်လီၤ၀ဲတၢ်ဆၢတဲၥ်နီတမံၤဒံးဘၣ်အသိး ပှၤကူၣ်သ့ကူၣ်ဘၣ်တဖၣ်စ့ၢ်ကီး စံး၀ဲလၢ တၢ်မ့ၢ်မၤဖျါထီၣ်တၢ်ကူၣ်ထီၣ်အံၤအမိၢ်လံမိၢ်ပှၢ်န့ၣ် တၢ်ကီတၢ်ခဲအိၣ်ဒိၣ်ဒိၣ်မုၢ်မုၢ်လၢ က၀ံစိၥ်တီဆှၢတၢ်အဂီၢ်အဂ့ၢ်န့ၣ်လီၤ.
တၢ်မ့ၢ်မၤဖျါထီၣ်တၢ်ကူၣ်ထီၣ်အံၤ အမိၢ်လံမိၢ်ပှၢ်န့ၣ် အမဲရကၤပဒိၣ်တခီ ကဘၣ်ဟံးန့ၢ်တၢ်အၢၣ်လီၤအီလီၤဒီး ကီၢ်ပယီၤပူၤ ကလုၥ်ဒူၣ်ပှၤဖီၣ်စုက၀ဲၤကရၢတဖၣ်လၢ အပၢဆှၢဃၥ် ဟီၣ်ခိၣ်လီၤဆီဟီၣ်က၀ီၤတဖၣ်န့ၣ်လီၤ.
တၢ်တီၣ်ဖျါထီၣ်တဖၣ်အကျါ ဟ့ၣ်ကူၣ်ထီၣ်ဃၥ်၀ဲလၢ ဒ်သိးကတဲသကိးတၢ်ဒီးကီၢ်ပယီၤသုးကရူၢ်၀ံၤ ကဟံးန့ၢ်တၢ်မုၥ်တၢ်ခုၣ်တၢ်အၢၣ်လီၤအီလီၤဒီး ကခၠ့ၣ်တၢ်ထူၣ်ဖျဲးသုးမုၢ်ဒိၣ်(KIA)အဂီၢ်အသိး အဂၤတခါန့ၣ် သုးကီၣ်ကးတပၣ်ဃုၥ်၀ဲဘၣ်အမဲၥ်ညါကြၢးပၥ်ဖှိၣ်မၤသကိးတၢ်ဒီး(KIA)လိၤလိၤလီၤအဂ့ၢ်စ့ၢ်ကီးဟ့ၣ်ကူၣ်ဃၥ်၀ဲန့ၣ်လီၤ.
၀ၣ်ရှ့ၣ်တၣ်န့ၣ် တမၤ၀ဲတၢ်တဲသကိးတၢ်လိၤလိၤဒီးကီၢ်ပယီၤသုးမုၢ်ဒိၣ်ခိၣ်နၢ်တဖၣ် စးထီၣ်လၢ ကီၢ်ပယီၤပူၤ ၂၀၂၁နံၣ်, သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံန့ၣ်လီၤ.
ပှၤလၢဟ့ၣ်ကူၣ် ထရၢးပဒိၣ်န့ၣ် မ့ၢ်အမဲရကၤမုၥ်ကျိၤ၀ဲၤကွၢ်လီၤဘံၣ်တဂၤ၀ံၤ အ၀ဲန့ၣ် အပူၤကွံၥ်ကဲတ့ၢ်၀ဲဒ် ဒီၣ်အီၣ်စါစူးကၠံၣ် အပှၤဟ့ၣ်ကူၣ်တဂၤအသိးဒီး မ့ၢ်စ့ၢ်ကီးပှၤတဂၢလၢ ဆဲးကျိးထံၣ်လိၥ်တဲသကိးသ့လိၤလိၤဒီး KIAကရၢတကးဘၣ် ပှၤကူၣ်ဘၣ်ကူၣ်သ့လၢတၢ်ချၢအဂ့ၢ်န့ၣ်လီၤ.
ဟီၣ်ခိၣ်ဘီမုၢ်ဂံၢ်ဘါသဟီၣ်အ့ၣ်ကၠ့ၣ်စံၣ်အတၢ်ပၥ်ဖျါအဖီခိၣ်တရူးန့ၣ်ပၢဆှၢဃၥ်၀ဲဟီၣ်ခိၣ်ဒီတဖျၢၣ်ဘၣ်ထွဲတၢ်ထုးထီၣ်ဟီၣ်ခိၣ်လီၤဆီအမျးကယၤ(၉၀)ဃၣ်ဃၣ်ဒီးအမဲရကၤလၢဘၣ်ဒိးသန့ၤ၀ဲကီၢ်ချၢတၢ်တီၣ်သွီနုၥ်ဟီၣ်ခိၣ်လီၤဆီတခီဘၣ်ထွဲဒီးဟီၣ်ခိၣ်လီၤဆီဂ့ၢ်၀ီအဖီခိၣ်ကပြၢလိၥ်သးဒီးတရူးအဂီၢ်တၢ်တိၥ်ကူၣ်ကျဲၤတဖၣ်အကျါမ့ၢ်အရ့ဒိၣ်တခါအဂ့ၢ်န့ၣ်လီၤ.
ကီၢ်ပယီၤသုးကီၣ်ကးဒီးKIAတခီဘၣ်ထွဲဒီးတၢ်ကစီၣ်အံၤအဖီခိၣ်ထုးထီၣ်တဲဖျါခီၣ်ဆၢဃၥ်၀ဲတအိၣ်နီတမံၤဒံးဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
