လါယူၤလံ(၂၉)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
မူခိၣ်စူၤဒိၣ်၀ံၤ ကစၢၢ်ထံဃုၥ်ဒီး ကၠီၣ်တဲၣ်-ပယီၤကီၢ်ဆၢ မဲၢ်ဆဲၣ်ထံကျိထံဒိၣ်ထီၣ်အဃိ ထံဒိၣ်နိယွၤကဲထီၣ်၀ဲလၢ တၤခၠံၣ်လ့း၀့ၢ် တၢ်လီၢ်လီၤဖုၣ်က၀ီၤဒ့တဖၣ်အပူၤန့ၣ်လီၤ.
ကတီၢ်ခဲအံၤတခီ တၤခၠံးလ့၀့ၢ်ပူၤ မကၣ်ဟိၣ်က၀ီၤဒ့, မဲၢ်ခီၣ်က၀ီၤဒ့, တၤလီးက၀ီၤဒ့, ဆၣ်ဆဲ(က)ဒီး(ခ)က၀ီၤဒ့ဒီး ပိထ့ၣ်က၀ီၤဒ့တဖၣ်အပူၤ ထံဒိၣ်နိယွၤအဃိ ပှၤ၀့ၢ်ဖိတဖၣ် ဘၣ်ကွၢ်ဆၢၣ်မဲၥ်ဒီးတၢ်ကီတၢ်ခဲန့ၣ်လီၤ.
တၢ်လီၢ်လီၤဖုၣ်က၀ီၤဒ့တဘ့ၣ်လၢအမ့ၢ် ဆၣ်ဆဲက၀ီၤအပူၤ မဟါအနံၤ, မုၢ်ထူၣ်အဆၢကတီၢ်လံၤလံၤန့ၣ် ထံတဖၣ်ဟဲဒိၣ်ထီၣ်၀ဲတပယူၥ်ဃီအဃိ ပှၤတ၀ၢတၢ်မၤစၢၤကရၢတဖၣ် လဲၤမၤပူၤဖျဲးထီၣ်၀ဲ ပှၤလၢအိၣ်ကတးသးတဖၣ်အဂ့ၢ် လီၢ်က၀ီၤဖိတဖၣ် စံး၀ဲန့ၣ်လီၤ.
ထံဒိၣ်နိယွၤကဲထီ၀ဲဒ်သိးအံၤအဃိ တၢ်ဘၣ်ပတုၥ်ဃၥ်၀ဲ တၢ်သူၣ်ထီၣ်တၢ်ဖံးတၢ်မၤတဖၣ်အသိး တၢ်ဖံးတၢ်မၤအဂၤတဖၣ်စ့ၢ်ကီးဘၣ်ပတုၥ်ဃၥ်၀ဲအဃိလီၢ်က၀ီၤဖိလၢမၤအီၣ်မုၢ်ဆ့ၣ်မုၢ်ဂီၤတဖၣ်ဘၣ်ကွၢ်ဆၢၣ်မဲၥ်ဘၣ်တၢ်ကီတၢ်ခဲအဂ့ၢ် ပှၤတၤခၠံးလ့၀့ၢ်ဖိတဂၤစံး၀ဲန့ၣ်လီၤ.
“ထံဟဲဒိၣ်ထီၣ်ကယီကယီအဃိ တၢ်လဲၤဖံးလဲၤမၤတၢ်တဘၣ်လီၢ်ဘၣ်စးလဲၤဘၣ်. ခဲအံၤန့ၣ် တၢ်လီၢ်ထီၣ်ထီဒၣ်လဲၥ် ထံထီၣ်တုၤလၢ ခီၣ်လ့ၤခိၣ်ညါလံ. တၢ်လီၢ်လီၤဖုၣ်လၢထံဒိၣ်တပၤန့ၣ် တၢ်သူၣ်ထီၣ်တၢ်ဖံးတၢ်မၤမ့ၢ်ဂ့ၤ, တၢ်ဆါတၢ်ပှ့ၤမ့ၢ်ဂ့ၤ တၢ်ဘၣ်ကးတံၥ်ဃၥ်၀ဲလီၤ. တၢ်လဲၤတၢ်က့ၤစ့ၢ်ကီး တဘၣ်လီၢ်ဘၣ်စးဘၣ်အဂ့ၢ်” စံး၀ဲန့ၣ်လီၤ.
ကတီၢ်ခဲအံၤန့ၣ် ထံဟဲဒိၣ်ကွ့ၢ်ကွ့ၢ်လၢ၀့ၢ်ပူၤအဃိ ဘၣ်အိၣ်ဒီးတၢ်ဘၣ်ယိၣ်ဘၣ်ဘှီအဂ့ၢ် အ၀ဲစံးအါထီၣ်၀ဲန့ၣ်လီၤ.
“ထံန့ၣ် ဟဲဒိၣ်ထီၣ်ဒိၣ်ဒိၣ်မုၢ်မုၢ်လၢ မဟါအနံၤလံၤလံၤဒီး ခဲအံၤစ့ၢ်ကီး ဟဲဒိၣ်ဒံးလီၤ. မူခိၣ်မ့ၢ်စူၤဒံး၀ဲန့ၣ် ထံဟဲဒိၣ်ထီၣ်ဒံးအါန့ၢ်အလီၢ်သ့လီၤ. ပှၤ၀့ၢ်ဖိတဖၣ် ဘၣ်ယိၣ်ဘၣ်ဘှီ၀ဲအဂ့ၢ် “ စံး၀ဲန့ၣ်လီၤ.
မူခိၣ်ကလံၤသီၣ်ဂီၤတၢ်နဲၣ်လီၤ၀ဲကျိၤ မဟါအနံၤ, ဂီၤအတၢ်ထုးထီၣ်ပၥ်ဖျါ ဘၣ်ထွဲမူခိၣ်ကလံၤသီၣ်ဂီၤအဖီခိၣ် မဲၢ်ဆဲၣ်ထံကျိန့ၣ် ဟဲထီၣ်တလၢတုၤလၢ တၤခၠံးလ့း၀့ၢ်ထံတၢ်လီၤဘၣ်ယိၣ်တၢ်ပနီၣ်အဖီခိၣ်(၅)ပျၢ်တခီ၀ံၤ ခါလၢကဟဲတသီအတီၢ်ပူၤန့ၣ် ကထီၣ်ထီ(၂)ပျၢ်ဃၣ်ဃၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
လၢတၢ်န့ၣ်အဃိ ပှၤလၢအိၣ်ဖဲ တၤခၠံးလ့း၀့ၢ်တၢ်လီၢ်လီၤဖုၣ်ဒီး ထံကျိကၢၢ်နံၤအကပၤတဖၣ် တၢ်ကသုးကစီၤပၥ်လၢ တၢ်လီၢ်လၢအပူၤဖျဲးအဂီၢ် မူခိၣ်ကလံၤသီၣ်ဂီၤတၢ်နဲၣ်လီၤ၀ဲၤကျိၤ ထုးထီၣ်ပၥ်ဖျါဃၥ်၀ဲန့ၣ်လီၤ.
Ref: Burma VJ
