လါယူၤလံ(၂၈)သီ,၂၀၂၅နံၣ်, အၣ်ထူခ့ၣ်တၢ်ကစီၣ်
ကညီကီၫ်စဲၣ်၀့ၫ်ခိၣ်,၀့ၫ်ဖၣ်အၣ်အပူၤ ဃိၣ်လိာ်ထံကျိထံန့ၣ် အိၣ်လၢထံတၫ်လီၤဘၣ်ယိၣ်တၫ်ပနီၣ်အလီၫ် အဖီခိၣ် (၄) ပျၫ်ဘျဲၣ်လံဒီး၀့ၫ်ပူၤထံနုာ်လီၤအဃိ ၀့ၫ်ပူၤက၀ီၤဒ့တၫ်လီၫ်လီၤဖုၣ်တဖၣ်အပူၤ ပှၤလီၫ်က၀ီၤဖိတဖၣ် ဘၣ်သုးအသးဆူ တၫ်ပူၤဖျဲးအလီၫ်အဂ့ၫ် ပှၤလီၫ်က၀ီၤဖိတဖၣ်တဲ၀ဲလီၤ.
၀့ၫ်ပူၤ ပှၤထူလံၤဖိတၫ်ဆါဟံၣ်,ရွှ့ၣ်ကၠဲးဖးကျဲသဂၢၫ်,၁၀အ့ၣ်စူး,ရွှ့ၣ်ဖါစံၣ်ဟံၣ်ဃီအလီၫ်,ထံဖီခိၣ်ကျးတၫ်လီၫ်တဖၣ် ထံနုာ်လီၤ၀ဲအဂ့ၫ် ပှၤ၀့ၫ်ဖၣ်အၣ်ဖိလၢမၤစၢၤတၫ်တဖၣ်တဲ၀ဲလီၤ.
လၢ၀့ၫ်ဖၣ်အၣ် အ့လ့ကျဲန့ၣ် ထံဒိၣ်ထီၣ်တုၤဒၣ်လဲၣ်တၫ်ဘၣ်လဲၤထီၣ်က့ၤလီၤလၢချံတဖၣ်အသိး,ခၠံးသူၣ်လါကၠါ,ကၠါအ့-တၫ်ဆါဟံၣ်ကျဲစ့ၫ်ကီး ထံဒိၣ်ဘၢ၀ဲအဃိ သိလ့ၣ်တဖၣ်လ့ၤထီၣ်လ့ၤလိၤတန့ၫ်လၢၤဘၣ်အဂ့ၫ် တၫ်သ့ၣ်ညါဘၣ်လီၤ.
“မူခိၣ်စူၤဒိၣ်အိၣ်လံ(၂)သီ,(၃)သီလံ.တဂီၤအံၤ သ့ၣ်ညါဘၣ်လၢထံနုာ်လီၤမူၤနီၫ်န့ၣ်လီၤ.တုၤလၢဟံၣ်ဃီတဖၣ် လီၤဘျၢ လံဒုတအိၣ်ဒံးဘၣ်အဂ့ၫ်”ပှၤ၀့ၫ်ဖၣ်အၣ်ဖိတဂၤတဲ၀ဲလီၤ.
၀့ၫ်ဖၣ်အၣ်,က၀ီၤဒ့လၢတၫ်လီၫ်လီၤဘံတဖၣ်ထံနုာ်လီၤအဃိ စးထီၣ်ဖဲလါယူၤလံ(၂၆)သီအနံၤန့ၣ် ပှၤတ၀ၢတၫ်မၤစၢၤ ကရၢတဖၣ် သုးန့ၫ်၀ဲကမျၢၫ်လၢအိၣ်လၢတၫ်လီၫ်လီၤဖုၣ်တဖၣ် ဆူတၫ်ပူၤဖျဲးအလီၫ်န့ၣ်လီၤ.
၀့ၫ်ဖၣ်အၣ်ပူၤ လၢတီၤထီကၠိဒီးတၫ်လိၣ်ခိၣ်လိၣ်ကွဲအလီၫ်တဖၣ်အပူၤ တၫ်အိးထီၣ်ဃာ် တၫ်ဆီၣ်ထွဲမၤစၢၤအလီၫ် တဖၣ်၀ံၤ ပာ်လီၤန့ၫ်ဃာ်၀ဲတၫ်လီၫ်တဖၣ်အဂ့ၫ် ပှၤတ၀ၢတၫ်မၤစၢၤကရၢတဖၣ် ထုးထီၣ်ဘိးဘၣ်ရၤလီၤ၀ဲလီၤ.
ဃိၣ်လိာ်ထံကျိထံန့ၣ် တလၢ၀ဲ ၀့ၫ်ဖၣ်အၣ် ထံတၫ်ဘၣ်ယိၣ်တၫ်ပာ်ပနီၣ်အလီၫ်(၄)ပျၫ်ဘျဲၣ်လံဒီးလၢခံ(၁)သီ ဟဲထီၣ် သ့(၁)ပျၫ်ဘျဲၣ်အဃိ အိၣ်လၢထံတၫ်ဘၣ်ယိၣ်တၫ်ပာ်ပနီၣ်အလီၫ်အဖၢမုၫ်ဒံးလီၤအဂ့ၫ် မူခိၣ်ကလံၤသီၣ်ဂီၤ၀ဲၤကျိၤ ထုးထီၣ်ဘိးဘၣ်ရၤလီၤဃာ်၀ဲလီၤ.
တကးဘၣ် ပရဲလိာ်ထံကျိထံန့ၣ် ၀့ၫ်မဒီး,ဆီထံးထံကျိထံန့ၣ် အိၣ်လၢ၀့ၫ်ဆီထံး ထံတၫ်လီၤဘၣ်ယိၣ်တၫ်ပနီၣ် အဖီခိၣ် န့ၣ်လီၤ.
ပကိထံကျိထံန့ၣ် ၀့ၫ်ပကိ,ပရဲလိာ်ထံကျိထံန့ၣ် ၀့ၫ်တီအူ,သူမွဲထံကျိထံန့ၣ် ၀့ၫ်ရၤမတံ,နးယ့ထံကျိထံန့ၣ် အိၣ်လၢ ၀့ၫ်မိ ည့ ထံတၫ်ပာ်ပနီၣ်အလီၫ်အဖီလာ်(၁)ပျၫ်ဘျဲၣ်၀ံၤ လၢခံ(၁)သီအတီၫ်ပူၤန့ၣ် ဟဲထီၣ်တုၤလၢထံတၫ်ဘၣ်ယိၣ်တၫ်ပာ်ပ နီၣ်အလီၫ်သ့အဂ့ၫ် မူခိၣ်ကလံၤသီၣ်ဂီၤ၀ဲၤကျိၤ ထုးထီၣ်ပာ်ဖျါ၀ဲ ဖဲလါယူၤလံ (၂၇)သီအနံၤန့ၣ်လီၤ.
၀့ၫ်အိၣ်လၢထံတၫ်လီၤဘၣ်ယိၣ်တၫ်ပာ်ပနီၣ်အလီၫ်ဒီး၀့ၫ်လၢဘူးကတုၤထံတၫ်လီၤဘၣ်ယိၣ်တၫ်ပနီၣ်အလီၫ်တဖၣ်အပူၤ ပှၤလီၫ်က၀ီၤဖိလၢအိၣ်လၢတၫ်လီၫ်လီၤဖုၣ်တဖၣ် ကသုးဆိသးအဂီၫ် တၫ်ဟ့ၣ်ပလီၫ်ဃာ်၀ဲန့ၣ်လီၤ.
Ref: BBC
