လါယူၤလံ(၂၅)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ် အူကရံးထၣ်သုးကလၢၤလၢအိၣ်ဖဲသုးက့(၆)ဟီၣ်က၀ီၤအပူၤ၀ံၤအလီၢ်ခံ ကီၢ်သူလ့ၤ-ကၠီၣ်တဲၣ်ကီၢ်ဆၢဒီတကျိၤ သၢပူတပူန့ၣ် KNU ဒိစိ၀ဲန့ၢ်လံအဂ့ၢ် ISPထုးထီၣ်ပၥ်ဖျါဃၥ်၀ဲ လံၥ်ပၥ်ဖျါတဘ့ၣ်လၢ အပူၤကွံၥ်လါယူၤလံ(၁၈)သီအနံၤန့ၣ်လီၤ.
ဘၣ်ထွဲဒီး KNU ဒိစိန့ၢ်၀ဲ ကီၢ်သူလ့ၤ-ကၠီၣ်တဲၣ်ကီၢ်ဆၢ သၢပူတပူ(၉၀)မျးကယၤလံအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ထံဂုၤကီၢ်ဂၤ၀ဲၤကျိၤခိၣ်ဒီးပှၤကတိၤတၢ်ပၢ ပဒိၣ်စီၤတီနံစ့ၢ်ကီးစံးဆၢဃၥ်၀ဲဆူ တၢ်ကစီၣ်သန့တဖၣ်အအိၣ်န့ၣ်လီၤ.
အူကရံးထၣ်သုးကလၢၤလၢ(KNLA)ဒီးတၢ်ပၢၢ်ဆၢသုးပၥ်ဖှိၣ်တဖၣ်ထီၣ်ဒုးမၤန့ၢ်အီၤအံၤအိၣ်စီၣ်စုၥ်ယံၤဒီး၀့ၢ်ရၤမတံထဲဒၣ်အမံၤလၤ(၃၀)ဒီး မ့ၢ်သုးကလၢၤတဖျၢၣ်လၢ အိၣ်စဲဘူးလိၥ်အသးဒီး ကၠီၣ်တဲၣ်, တးကီၢ်ရ့ၣ်ကီၢ်ဆၢအသိး မ့ၢ်စ့ၢ်ကီးသုးကလၢၤတဖျၢၣ်လၢ အရ့ဒိၣ်လၢကီၢ်ဆၢတၢ်ဘံၣ်တၢ်ဘၢအဂီၢ်န့ၣ်လီၤ.
ကီၢ်သူလ့ၤ-ကၠီၣ်တဲၣ်ကီၢ်ဆၢန့ၣ် အထီအိၣ်၀ဲ(၂.၄၁၆)ကံလိၣ်မံထၢၣ်အဃိ KNU ပၢဆှၢဒိၣ်စိန့ၢ်၀ဲ ကီၢ်ဆၢဒီတကျိၤန့ၣ် အိၣ်၀ဲ အကံလိၣ်မံထၢၣ်(၈၀၀)ဃၣ်ဃၣ်လံအဂ့ၢ် လံၥ်တၢ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
၂၀၂၁နံၣ် သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ KNU အဒုးယၤရဲၣ်ကျဲၤအါတက့ၢ်န့ၣ် ပညိၣ်ဒုး၀ဲဒ် တၢ်ပၢဆှၢဒိၣ်စိ ကီၢ်သူလ့ၤ-ကၠီၣ်တဲၣ်ကီၢ်ဆၢကန့ၢ်အဂီၢ်န့ၣ် ဒိၣ်န့ၢ်ဒံး တၢ်ပၢဆှၢဒိၣ်စိ၀့ၢ်တဖၣ်အဂ့ၢ် ISPစံး၀ဲန့ၣ်လီၤ.
တၢ်ပၢၢ်ဆၢသုးတဖၣ် ပၢဆှၢဒိၣ်စိ ကီၢ်ဆၢဟီၣ်က၀ီၤန့ၢ်အံၤန့ၣ် အရ့ဒိၣ်၀ဲလၢအသနၢၣ်(၃)ခါဒ်အမ့ၢ် တၢ်သူၣ်ထီၣ်ဆီလီၤဟီၣ်က၀ီၤကန့ၢ်အဂီၢ်, တၢ်ထၢဖှိၣ်သူၣ်ထီၣ်ဆီလီၤတၢ်အဂံၢ်ထံးတဖၣ်အဂီၢ် ဒီးလီၢ်က၀ီၤ ကီၢ်ဆၢတၢ်ကူလဲၢ်မၤကၤပနံၥ်ဒီး တၢ်မၤဂ့ၤထီၣ်ကီၢ်ဆၢတၢ်ဘံၣ်တၢ်ဘၢအဂီၢ်အဂ့ၢ် လံၥ်ပၥ်ဖျါအပူၤ ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ KNUတခီ ပၢဆှၢဒိၣ်စိလဲၢ်ထီၣ် ဟီၣ်က၀ီၤတဖၣ်အဃိ ကညီတၢ်ပၢၢ်ဆၢတၢ်ဂဲၤလိၥ်အပူၤ မၤဂ့ၤထီၣ်၀ဲ အထံရူၢ်ကီၢ်သဲး, တၢ်ဒိၣ်စိဟီၣ်က၀ီၤဒီး မၤလဲၢ်ထီၣ်န့ၢ်၀ဲ တၢ်ပၢတၢ်ပြးတၢ်စိတၢ်ကမီၤတဖၣ်အဂ့ၢ် ဒီး ခါဆူမဲၥ်ညါန့ၣ်ကထဲးဂံၢ်ထဲးဘါ၀ဲဒ်သိးကပၢဆှၢဒိၣ်စိ၀ဲကီၢ်ဆၢတၢ်ကူလဲၢ်မၤကၤပနံၥ်အကျဲတဖၣ်ဒီးသုးကလၢၤတဖၣ် လၢလၢပှဲၤပှဲၤကန့ၢ်အဂီၢ်အဂ့ၢ် ISP တယၢ်ဃၥ်၀ဲန့ၣ်လီၤ.
