လါယူၤလံ(၂၅)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
Antonov An-24 ကဘီယူၤတီၣ်ပှၤဟးကသုၣ်ဖိ(၁)ခိၣ်လၢ ပှၤအဂၤ(၅၀)ဃၣ်ဃၣ် ဟဲဒိးပိၥ်အံၤ ဖဲလါယူၤလံ(၂၄)သီအနံၤန့ၣ် လဲၤလီၤတဲၥ်၀ဲဒၣ် ဖဲကီၢ်ရှၢးရှါ, မုၢ်ထီၣ်ဟီၣ်က၀ီၤအပူၤ၀ံၤ ပှၤလၢဟဲဒိးပိၥ်၀ဲခဲလၢၥ်သံ၀ဲအဂ့ၢ် ရဲၣ်တၣ်တၢ်ကကစီၣ်သန့ ပၥ်ဖျါဃၥ်၀ဲန့ၣ်လီၤ.
ကဘီယူၤအံၤ ဘၣ်တၢ်ထုးထီၣ်အီၤလၢ ဆိၣ်ဘံးယဲးအစိၤလံၤလံၤဒီး ဘူးအိၣ်ထီၣ်လၢအနံၣ်(၅၀)ဃၣ်ဃၣ်အံၤန့ၣ် မ့ၣ်အူအီၣ်၀ဲဒၣ်အဆၢကတီၢ် ကဘီယူၤအဂၤတခိၣ်ဟဲထံၣ်၀ဲဒၣ်၀ံၤအလီၢ်ခံ ပှၤမၤပူၤဖျဲးတၢ်ဖိတဖၣ် ဟဲဃ့ၢ်ဃီၤဆူ တၢ်ကဲထီၣ်သးအလီၢ်လၢအဆိအချ့အဂ့ၢ် စံး၀ဲန့ၣ်လီၤ.
တၢ်ဂီၤမူတခါလၢ တၢ်ဒိဃၥ်အီၤလၢ ကဘီယူၤအဖီခိၣ်ဒီး တၢ်ရၤလီၤအီၤလၢပှၤတ၀ၢမံၣ်ဒံၣ်ယၣ်အဖီခိၣ် ကဘီယူၤန့ၣ် စံၣ်လီၤ၀ဲဒၣ်ဖဲ သ့ၣ်ပှၢ်တီၢ်တၢ်လီၢ်တခါအပူၤ ၀ံၤ ဖဲလၢလီၤတဲၥ်၀ဲတၢ်လီၢ်န့ၣ် တၢ်ထံၣ်ဘၣ်၀ဲ မ့ၣ်အူလုၢ်တဖၣ်အဂ့ၢ် စံး၀ဲန့ၣ်လီၤ.
ကဘီယူၤတခိၣ်အံၤန့ၣ် ယူၢ်ထီၣ်၀ဲဒၣ် ဖဲ ပှၤနီၢ်တဂၤပၢ ဆဲးဘ့ရံယါအိၣ်သူၣ်လီၤ လီၢ်က၀ီၤဘၣ်ထွဲ ကလံၤကျိၤ Angaraအဂ့ၢ် တၢ်သ့ၣ်ညါဘၣ်န့ၣ်လီၤ.
ကဘီယူၤအမဲၢ်န့ၣ် ကွဲးလီၤဃၥ်၀ဲလၢ ကဘီယူၤအံၤ တၢ်ထုးထီၣ်အီၤဖဲ ၁၉၇၆နံၣ်၀ံၤ တချူးလၢ ဆိၣ်ဘံးယဲးယူၣ်နံၣ်ယၣ် လီၤပှီၢ်ဒံး ၁၉၉၁နံၣ်န့ၣ် ဆိၣ်ဘံၣ်ယဲးနီၢ်တယၢ်တီၣ်ကဘီ Aeroflotထုးထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
လၢကတီၢ်အံၤ တၢ်ဒိးန့ၢ်ဘၣ်တၢ်ဂ့ၢ်တၢ်ကျိၤတဖၣ်အဖီခိၣ် ကဘီယူၤအပူၤ ဖိသၣ်(၅)ဂၤဒီး ကဘီယူၤပှၤမၤတၢ်ဖိ(၅)ဂၤပၣ်ဃုၥ် ခဲလၢၥ်ပၥ်ဖှိၣ် (၄၃)ဂၤပၣ်ဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ဂ့ၢ်အီၤအူတၢ်အိၣ်သးဂ့ၢ်၀ီကိတိၥ်၀ဲၤကျိၤ အလံၥ်ဘိးဘၣ်ရၤလီၤ တၢ်ဂ့ၢ်တၢ်ကျိၤအဖီခိၣ် ကဘီယူၤအံၤအပူၤ ပှၤဟဲပၣ်ဃုၥ်၀ဲ(၄၀)ဂၤအဂ့ၢ် ပၥ်ဖျါဃၥ်၀ဲအဃိ တၢ်ပၥ်ဖျါတဖၣ်န့ၣ် တဖိးမံလိၥ်သးဘၣ်အဃိ ပှၤဘၣ်မူဘၣ်ဒါတဖၣ် ကသမံသမိး၀ဲ တၢ်ဂ့ၢ်အံၤအဂ့ၢ် ဘိးဘၣ်ရၤလီၤဃၥ်၀ဲန့ၣ်လီၤ.
