လါယူၤလံ(၂၂)သီ, ၂၀၂၅နံၣ်, အၣ်ထူခ့ၣ်တၢ်ကစီၣ်
ပှၤသုးဖိ(၄)ဂၤလၢ သုးကီၣ်ကးထၢန့ၢ်ဆူၣ်သုးတဖၣ် ဟဲပၥ်လီၤစုက၀ဲၤဆူ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၃), ကီၢ်ရ့ၣ်ချၢၣ်လွံၢ်ထူၣ်, လၢၢ်ဒိၣ်ကီၢ်ဆၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်( KNLA)အအိၣ်အဂ့ၢ် ခ့ၣ်အဲၣ်ယူၣ်-ကီၢ်ရ့ၣ်ချၢၣ်လွံၢ်ထူၣ်တၢ်ကစီၣ်ပၥ်ဖျါဃၥ်၀ဲန့ၣ်လီၤ.
ခီဖျိကမျၢၢ်တၢ်ထၢဆူၣ်သုးတၢ်ဘျၢအဃိ သုးတၢ်သိၣ်လိနီၣ်ဂံၢ်(၈) ပှၤသုးဖိ(၂)ဂၤလၢ (ခမရ၂၀)ဒီး သုးတၢ်သိၣ်လိနီၣ်ဂံၢ်(၅) ပှၤသုးဖိ(၂)ဂၤလၢ(ခမရ၅၈၁) ခဲလၢၥ်(၄)ဂၤအံၤ ဟဲဟ့ၣ်လီၤအသးဃုၥ်ဒီးစုက၀ဲၤအဂ့ၢ် ပၥ်ဖျါဃၥ်၀ဲန့ၣ်လီၤ.
ပှၤလၢဟဲပၥ်လီၤစုက၀ဲၤတဖၣ်ဒ်အမ့ၢ် သုးတၢ်သိၣ်လိနီၣ်ဂံၢ်(၈) သးနံၣ်(၃၁)နံၣ်အိၣ် ညံၣ်ညံၣ်လွ့ၣ်, သးနံၣ်(၃၆)နံၣ်အိၣ် န့မီၣ်ဒီး သုးတၢ်သိၣ်လိ(၅) သုးနံၣ်(၃၃)နံၣ်အိၣ် စိထ့အီၣ်, သးနံၣ်(၃၄)နံၣ်အိၣ် မၠ့းမၠဲးအီၣ်တဖၣ်အဂ့ၢ် ပၥ်ဖျါဃၥ်၀ဲန့ၣ်လီၤ.
သုးကီၣ်ကးအပှၤသုးဖိ(၄)ဂၤလၢ ဟဲဟ့ၣ်လီၤအသးတဖၣ်အံၤ ဟဲစိၥ်ဃုၥ်၀ဲဒီး ကျိ(၄)ခိၣ်, ကျိဆၣ်ဒၢ(၈)ခါဒီး ကျိသၣ်(၁၀၀)ဘျဲၣ်န့ၣ်လီၤ.
ပှၤလၢဟဲပၥ်လီၤစုက၀ဲၤတဂၤစုၥ်စုၥ်န့ၣ် တၢ်ဟ့ၣ်လၤကပီၤအီၤ စ့ပယီၤအကလီၢ်(၁၀)၀ံၤ တကးဘၣ် ပှၤသုးဖိလၢဘၣ်တၢ်ထၢန့ၢ်ဆူၣ်သုး ခီဖျိကမျၢၢ်တၢ်ထၢဆူၣ်သုးတၢ်ဘျၢတဖၣ်အံၤ သုတမၤတၢ်ဒ်သုးကီၣ်ကးအသုး အတၢ်ဘၣ်သးအသိးဒီး လၢတၢ်ပၥ်ဖှိၣ်ထီဒါသုးကီၣ်ကးအပူၤ ကဟဲပၥ်လီၤစုက၀ဲၤအဂီၢ် KNLAဟ့ၣ်သဆၣ်ထီၣ်ဃၥ်၀ဲန့ၣ်လီၤ.
