လါယူၤလံ(၉),၂၀၂၅နံၣ်
သိၣ်မှံၤသုးပာ်ဖှိၣ်လၢ ထီၣ်ဒုးမၤန့ၫ် သုးကီၣ်ကးအပီၣ်လဲၣ်နံၤကီၫ်ခီသုး၀ဲၤလီၫ်ခိၣ်သ့ၣ် အစုတီၤဖီလာ် ခလရ(၂၈၂) သုးခးသုးကလၢၤတဖၣ် မၤလၤကပီၤဘၣ်၀ဲအဂ့ၫ် ကညီဒီကလုာ်စၢဖှိၣ်ကရၢ(KNU) ဘျံး-ဒ၀ဲၫ်ကီၫ်ရ့ၣ် ထုးထီၣ်ဘိးဘၣ်ရၤလီၤ၀ဲလီၤ.
KNU သုးက့နီၫ်ဂံၫ်(၄)ဒီးသုးက့နီၫ်ဂံၫ်(၆),ဒုးယၤလီၤဆီ(၂)တၫ်တီခိၣ်ရိၣ်မဲအဖီခိၣ် ဖဲလါယူၤလံ(၇)သီအနံၤ ထီၣ်ဒုးမၤ န့ၫ်၀ဲ သုးကလၢၤလၢတဂုၤအခံခီၣ်ဆၢတၫ်အံၤအပူၤ သိၣ်မှံၤတၫ်ပၢၫ်ဆၢသုးလၢပာ်ဃုာ်တဖၣ် KNUဘျံး-ဒ၀ဲၫ်ကီၫ်ရ့ၣ် မၤလၤမၤကပီၤ၀ဲလီၤ.
သုးမီၤစိရိၤသနူပာ်ဃုာ် မီၤစိရိၤသနူဒီးကလုာ်ဒိၣ်စိသနူကကတၢၫ်ကွံာ်အဂီၫ်,တၫ်ကဒုးအိၣ်ထီၣ်ဖဲၣ်ဒရၢၣ်သနူ၀ံၤ မ့ၫ်သးစၫ်သုးဖိတဖၣ်အတၫ်ဂဲၤလိာ်လၢ အဲၣ်ဒိးသူၣ်ထီၣ်ကဒါက့ၤ ပှၤတ၀ၢလၢအမုာ်အခုၣ်,အတၫ်ဟ့ၣ်လီၤသးတဖၣ် လီၤပာ်လုၫ်ပာ်ပှ့ၤ,ပာ်ပနီၣ်ဘၣ်၀ဲအဂ့ၫ် တၫ်ထုးထီၣ်ဘိးဘၣ်ရၤလီၤအပူၤ ပာ်ဖျါ၀ဲလီၤ.
ဒ်သိးကမၤနၢၤတၫ်အဂီၫ် ပတီၫ်ထီတၫ်သ့တၫ်ဘၣ်တကပၤမ့ၫ်ဂ့ၤ,ကျိာ်စ့မ့ၫ်ဂ့ၤ,လၢကိးကပၤဒဲး ပှၤမၤစၢၤဆီၣ်ထွဲတၫ်တဖၣ်ဒီးသုးဖိလၢနုာ်လီၤတၫ်ဒုးတဖၣ် ကပူၤဖျဲးအဂီၫ် မိၫ်ပၫ်ထံဖိကီၫ်ဖိကမျၢၫ်လၢဃ့ထုကဖၣ်,ဟ့ၣ်ဆူၣ်ထီၣ်ဂံၫ်ဘါတဖၣ်စ့ၫ်ကီး စံးဘျူးဘၣ်၀ဲအဂ့ၫ် တဲ၀ဲလီၤ.
တၫ်ထီၣ်ဒုးမၤန့ၫ်သုးကလၢၤအပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ် KNLA သုးက့နီၫ်ဂံၫ်(၆),သုးရ့ၣ်(၂၇),သုးက့နီၫ်ဂံၫ်(၄),သုးရ့ၣ်(၁၀),သုးရ့ၣ်(၁၂),ဒ၀ဲၫ်ကမျၢၫ်တၫ်ထူၣ်ဖျဲးသုး- TPLF,ကၠိဖိတၫ်ပၢၫ်ဆၢသုး,သၣ်ကရသုးကျိၤဒီးဒြိသုး,ဘထူသုးမုၫ်ဒိၣ် ဒြိသုးဖိတဖၣ်ဒီးမူကပိာ်ဒြိသုးဖိတဖၣ် ပာ်ဃုာ်ဒုးသကိး၀ဲအဂ့ၫ် ပာ်ဖျါဃာ်၀ဲလီၤ.
တၫ်ပၢၫ်ဆၢသုးဖိတဖၣ်ထီၣ်ဒုးမၤန့ၫ်ဃာ် ဒ၀ဲၫ်ကီၫ်ရ့ၣ်ပူၤ သူးခးသုးကလၢၤပှၤဘၣ်မူဘၣ်ဒါ သုးခိၣ်စိမၠိဆွ့ၣ်အူန့ၣ် ဖဲတချူးတၫ်ထီၣ်ဒုးသုးကလၢၤ(၅)သီဒံးဘၣ်အကတီၫ် ဟဲက့ၤဟ့ၣ်လီၤအသးလၢကမျၢၫ်အိၣ်အဂ့ၫ် သုးဂ့ၫ်၀ီဂ့ၫ်ခီၣ်ထံးစံး၀ဲလီၤ.
သုးခိၣ်စိမၠိဆွ့ၣ်အူ ဟဲဟ့ၣ်လီၤအသး၀ံၤ ယံာ်(၅)သီန့ၣ် သူးခးသုးကလၢၤအံၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီးသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲဖဲလါယူၤလံ(၇)သီအနံၤန့ၣ်လီၤ.
ဖဲတၫ်ပၢၫ်ဆၢသုးဖိတဖၣ် ထီၣ်ဒုးသူးခးသုးကလၢၤအကတီၫ် သုးဖိ(၂၄)ဂၤလၢအိၣ်ဖဲသုးကလၢၤအံၤ ဃ့ၫ်ကွံာ်ဆူ ကၠီၣ်တဲၣ်တကပၤန့ၣ်လီၤ.
သူးခးသုးကလၢၤန့ၣ် ခလရ(၂၈၂)သုးရ့ၣ် ဟဲဆီလီၤဃခာ်အသးအဂ့ၫ် တၫ်သ့ၣ်ညါဘၣ်လီၤ.သုးကလၢၤအံၤအပူၤ ပာ်လီၤဂံၫ်ဘါလၢ ပှၤသုးဖိအဂၤ(၃၀)န့ၣ်လီၤ.
