လါယူၤလံ(၉)သီ, ၂၀၂၅နံၣ်
ကၠီၣ်တဲၣ်-ကီၢ်သူလ့ၤကီၢ်ဆၢ KNUပၢဆှၢဃၥ် ထံခံကီၢ်ဆၢတၢ်ကူလဲၢ်မၤကၤတၢ်သမံသမိးတြဲၤအံၤ တၢ်ကစီၣ်တဖၣ်ဟးထီၣ်လၢ ကၠီၣ်တဲၣ်တပၤကက့ၤအိးထီၣ်၀ဲ၀ံၤဒီး ကတီၢ်ခဲအံၤန့ၣ် လီၢ်က၀ီၤအပူၤ တၢ်ဟ့ၣ်ဃၥ် တၢ်ပျဲလၢတၢ်ကူလဲၢ်မၤကၤပနံၥ်တၢ်ဖိတၢ်လံၤအဂီၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
ထံခံတၢ်ကူလဲၢ်မၤကၤသုးကလၢၤန့ၣ် အိၣ်စဲဘူးလိၥ်သးဒီး ကၠီၣ်တဲၣ်တပၤ ဖူနၣ်ပရွၣ်သ၀ီ၀ံၤ သုးကီၣ်ကးအသုးကလၢၤလၢအိၣ်ဖဲလၢထံခံဟီၣ်က၀ီၤအပူၤတဖၣ် (KNU/KNLA)ဒီးကမျၢၢ်တၢ်ဒီသဒၢသုး(PDF) တဖၣ် ထီၣ်ဒုးမၤန့ၢ်ဃၥ်၀ဲဖဲ လါမ့ၤ(၉)သီအနံၤန့ၣ်လီၤ.
ဟီၣ်က၀ီၤဟဲအိၣ်ဂၢၤကျၢၤထီၣ်လံအဃိကအိးထီၣ်က့ၤကီၢ်ဆၢတၢ်ကူလဲၢ်မၤတြဲၤအဂီၢ်ဖဲအပူၤကွံၥ်လါယူၤ(၂၅)သီအနံၤန့ၣ်ကၠီၣ်တဲၣ်ပှၤဘၣ်မူဘၣ်ဒါတဖၣ်တၢၣ်ပီၣ်တဲသကိးတၢ်၀ံၤအလီၢ်ခံစးထီၣ်လၢတလါအံၤလါယူၤလံ(၅)သီအနံၤန့ၣ် တၢ်ကစးထီၣ်ပျဲ ပနံၥ်တီၣ်သိလ့ၣ်တဖၣ်ဒီးပှၤကညီတၢ်နုၥ်လီၤဟးထီၣ်အဂ့ၢ် ကၣ်ခၠနးပူရံၣ်ကီၢ်ရ့ၣ်ပၢပြး၀ဲၤကျိၤ အလံၥ်ဘိးဘၣ်ရၤလီၤအပူၤစ့ၢ်ကီး အိၣ်ရၤလီၤအသးလၢ ကီၢ်ဆၢပှၤကူလဲၢ်မၤကၤတဖၣ်အအိၣ်လံအဂ့ၢ်န့ၣ်လီၤ.
ကီၢ်ဆၢတြဲၤန့ၣ် ဟ့ၣ်တၢ်ပျဲလၢပှၤကညီဒီးပနံၥ်တီၣ်သိလ့ၣ်တဖၣ်ကနုၥ်လီၤဟးထီၣ်အဂီၢ် လၢလၢပှဲၤပှဲၤတၢ်အိၣ်သးတမ့ၢ်ဒံးဘၣ်ဒီး ဟ့ၣ်ဃၥ်တၢ်ပျဲထဲဒၣ် တၢ်ကဆါလီၤန့ၢ် ပှၤလၢအိၣ်ဆိးဖဲလီၢ်က၀ီၤပူၤတဖၣ် အတၢ်အီၣ်တၢ်အီပနံၥ်တၢ်ဖိတၢ်လံၤတဖၣ်အဂီၢ်အဂ့ၢ် သုးက့(၄), ကီၢ်ရ့ၣ်ဘျံးဒ၀ဲၢ် နဲၣ်ရွဲၣ်ပဒိၣ်စီၤအဲၣ်နၤ စံး၀ဲန့ၣ်လီၤ.
“သ၀ီကဒဲကဒဲန့ၣ်အ၀ဲသ့ၣ်ပျဲဒၣ်ထဲပနံၥ်တီၣ်သိလ့ၣ်တဖၣ်လီၤ.ပှၤကညီတၢ်နုၥ်လီၤဟးထီၣ်တခီအ၀ဲသ့ၣ်တပျဲ၀ဲဘၣ်. အမၤ၀ဲဒ်အံၤန့ၣ် ကၠီၣ်တဲၣ်တပၤသနူအိၣ်၀ဲလီၤ. ဘၣ်မနုအဃိလဲၣ် အ၀ဲသ့ၣ်ကီၢ်ဆၢဒီတကျိၤအပူၤ သ၀ီလၢအိၣ်ဘူးဒီးကီၢ်ဆၢတဖၣ်န့ၣ် ဒ်သိးတၢ်ရ့လိၥ်မုၥ်လိၥ်အဖီခိၣ် မၤ၀ဲတၢ်ဆါတၢ်ပှ့ၤန့ၢ်အဂ့ၢ်” အ၀ဲစံး၀ဲန့ၣ်လီၤ.
ကၠီၣ်တဲၣ်ပယီၤကီၢ်ဆၢဟီၣ်က၀ီၤအပူၤအဖိသဲစးကီၢ်ဆၢတၢ်ကူလဲၢ်မၤကၤတြဲၤအိၣ်၀ဲ(၆)ခါဒီးတၢ်တယၢ်တြဲၤန့ၣ်အိၣ်၀ဲ(၃)ခါန့ၣ်လီၤ. ကတီၢ်ခဲအံၤတခီကလုၥ်ဒူၣ်တၢ်ပၢၢ်ဆၢသုးတဖၣ်ဒီးကမျၢၢ်တၢ်ဒီသဒၢသုး(PDF)သုးပၥ်ဖှိၣ်တဖၣ်ထီၣ်ဒုး၀ဲ သုးကီၣ်ကးသုးကလၢၤအဒိၣ်အဆံးလၢအိၣ်ဖဲကီၢ်ဆၢဟီၣ်က၀ီၤတဖၣ်အပူၤ၀ံၤပၢဆှၢဃၥ်၀ဲကီၢ်ဆၢတၢ်ကူလဲၢ်မၤကၤကျဲအကျိၤတဖၣ်န့ၣ်လီၤ.
ကၠီၣ်တဲၣ်-ပယီၤကီၢ်ဆၢအပူၤ အဖိးသဲစးကီၢ်ဆၢတၢ်ကူလဲၢ်မၤကၤတြဲၤတဖၣ်ဒ်အမ့ၢ် ရၤမတံ, တၣ်ခၠံၣ်လ့း, ထံခံ, မီတီၣ်, ဘျံးဒီးကီးသီတြဲၤတဖၣ်အိၣ်၀ဲဒီး တၢ်တယၢ်ဃၥ်အီၤတခီ တြဲၤအိၣ်၀ဲသၢခါဒီး တြဲၤတဖၣ်ဒ်အမ့ၢ် ဃိၣ်သၢဖျၢၣ်ဒီး မဲၢ်စဲးဒီး ပိၣ်ပၣ်ကၠ့ၣ်ဆူၣ်ကီၢ်ဆၢတြဲၤအဂ့ၢ် တၢ်သ့ၣ်ညါဘၣ်လၢ မုၥ်ကျိၤ၀ဲၤကွၢ်၀ဲၤကျိၤအစရီတဖၣ်အဖီခိၣ်န့ၣ်လီၤ.
ref: myanmar now
