လါယူၤ(၁၇)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၆), ကီၢ်ရ့ၣ်ဒူပျၥ်ယၥ်, ကီးတရံးကီၢ်ဆၣ်အပူၤ တၢ်ရဲၣ်ကျဲၤမၤ၀ဲ တၢ်ထီၣ်ဒုးသုးကလၢၤတဖၣ်အဃိ ကညီပှၤစံၣ်သုးပှၤလီၢ်အိၣ်ကမှံဖိ(၁၀၀)ဂၤဘျဲၣ်လၢဟဲအိၣ်ကဒုဆူကၠီၣ်တဲၣ်တဖၣ် က့ၤဆူအိၣ်ဆိးလီၢ်ကျဲတသ့ဒံးဘၣ်ဒီး အိၣ်ထီဃၥ်အသးအဂ့ၢ်တၢ်သ့ၣ်ညါဘၣ်န့ၣ်လီၤ.
ကညီပှၤစံၣ်သုးပှၤလီၢ်အိၣ်ကမှံဖိတဖၣ်န့ၣ် မ့ၢ်ပှၤလၢအိၣ်ဖဲ ရွ့ၣ်အ့မၠဲၣ်သ၀ီဒီးအူးကရံးထၣ်သ၀ီတဖၣ်အပူၤ၀ံၤ ဟဲအိၣ်ကဒုဖဲ ကၠီၣ်တဲၣ်, ဖိးဖရး၀့ၢ်, မီၢ်ကဲသ၀ီအကပၤ တၢ်ပၥ်ကီၤဘူခ့ၣ်အလီၢ်အပူၤ ပိၥ်ခွါ(၂၆)ဂၤ, ပိၥ်မုၣ်(၄၇)ဂၤ, ဖိသၣ်ဆံး,ပိၥ်ခွါဒီးပိၥ်မုၣ်(၅၀)ဂၤ, ခဲလၢၥ်ပၥ်ဖှိၣ်(၁၂၃)ဂၤန့ၣ်လီၤ.
“လၢရွ့ၣ်အ့မၠဲၣ်န့ၣ် တၢ်ဒုးစးထီၣ်ကဲထီၣ်အဃိ ဘၣ်စံၣ်ပူၤဖျဲးသးလီၤ. ခဲအံၤစှၤသီအတီၢ်ပူၤန့ၣ် KNLAဒီးသုးပၥ်ဖှိၣ် ကထီၣ်ဒုး အူးကရံးထၣ်သုးကလၢၤအဂီၢ် ဟဲအိၣ်ဘူးသးအဃိ က့ၤဆူဟံၣ်ဃီတဘူၣ်လၢၤဘၣ်အဂ့ၢ်” ပှၤစံၣ်သုးပှၤလီၢ်အိၣ်ကမှံဖိတဂၤ စံး၀ဲန့ၣ်လီၤ.
ကညီပှၤစံၣ်သုးပှၤလီၢ်အိၣ်ကမှံဖိတဖၣ်န့ၣ်ကၠီၣ်တဲၣ်သုးမုၢ်ဒိၣ်ဒီး၀ဲၤကျိၤလၢဘၣ်ထွဲတဖၣ်ကွၢ်ထွဲကဟူးကယၥ်ဆူၣ်ချ့တၢ်မၤစၢၤတဖၣ်အသိး တကးဘၣ် ဟ့ၣ်၀ဲတၢ်အီၣ်တၢ်အီဒီးတၢ်လီၢ်တၢ်ကျဲလၢ ကအိၣ်ကဒုအဂီၢ်န့ၣ်လီၤ.
ကၠီၣ်တဲၣ်-ကညီကီၢ်ဆၢ ရၤမတံ၀့ၢ် ကလံၤထံးဒီးကလံၤစိး ခံကပၤလၢၥ်န့ၣ် တၢ်ထီၣ်ဒုးသုးကလၢၤဒုးယၤတဖၣ် ဆူၣ်ထီၣ်၀ံၤ ရၤမတံ, ကီးတရံး, ကြုၢ်တုကျဲမုၢ်အဖီခိၣ် တၢ်ဒုးဆူၣ်လၢ သုးကီၣ်ကးအသုးဒီးတၢ်ပၢၢ်ဆၢသုးတဖၣ်အဘၢၣ်စၢၤန့ၣ်လီၤ.
Ref: DVB
