လါယူၤ(၆)သီ,၂၀၂၅နံၣ်
တၢ်ဒုးတဖၣ်ဟဲအိၣ်ဘူးထီၣ်လၢနီၢ်ခၠိၣ်၀့ၢ်အကပၤ၀ံၤ သုးကီၣ်ကးအသုး ခးကျိဖးဒိၣ်, တ့ၢ်လီၤမ့ၣ်ပိၢ်လၢဒြိတဖၣ်အဃိ ကမျၢၢ်ဖိလၢအိၣ်ဖဲ၀့ၢ်ပူၤတဖၣ် စးထီၣ်သုးကပၤအသးလံအသိး ဘၣ်အိၣ်ကတီၤဃၥ်သးလၢကဃ့ၢ်ပူၤဖျဲးအဂီၢ်အဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
လါယူၤ(၅)သီအနံၤန့ၣ် တၢ်ဒုးကဲထီၣ်သးလၢ ယိၤဒိၣ်ကီၢ်စဲၣ်ကလံၤထံးကျဲမုၢ်အဖီခိၣ် ကၣ်ကၠံသ၀ီအကပၤအဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.ကၣ်ကၠံသ၀ီန့ၣ်အအိၣ်စီၣ်စုၥ်ယံၤဒီးနီၢ်ခၠိၣ်၀့ၢ်ထဲဒၣ်(၉)မံၤလၤအဂ့ၢ်တၢ်သ့ၣ်ညါဘၣ်န့ၣ်လီၤ.
“ပှၤလၢအိၣ်တ့ၢ်လၢ၀့ၢ်ပူၤတဖၣ်စ့ၢ်ကီးတီၣ်ထီၣ်ဃၥ်အတၢ်ဖိတၢ်လံၤတဖၣ်လၢသိလ့ၣ်အဖီခိၣ်၀ံၤ ဘၣ်အိၣ်ကတီၤပၥ်သးန့ၣ်လီၤ. တၢ်ဒုးတဖၣ်ဟဲတုၤအိၣ်သ့လၢ၀့ၢ်ပူၤအဂ့ၢ်” ပှၤ၀့ၢ်ဖိတဂၤစံး၀ဲန့ၣ်လီၤ.ပှၤလီၢ်က၀ီၤဖိတဖၣ်န့ၣ် လဲၤဃ့ၢ်ပူၤဖျဲးအသးဆူ ကၠီးမဲကီၢ်ဆၣ်ဒီးတၢ်လီၢ်လၢအပူၤဖျဲးတဖၣ်အအိၣ်အဂ့ၢ် လီၢ်က၀ီၤဖိတဖၣ်စံး၀ဲန့ၣ်လီၤ.
လါယူၤ(၄)သီအနံၤန့ၣ်စ့ၢ်ကီး ခီဖျိသုးကီၣ်ကးအသုး ခးလီၤကျိဖးဒိၣ်လၢ၀့ၢ်ပူၤအဃိ ကမျၢၢ်ဖိခံဂၤဘၣ်သံအဂ့ၢ်န့ၣ်လီၤ. ဒ်န့ၣ်အသိးတနံၤဃီအတီၢ်ပူၤန့ၣ် သုးကီၣ်ကးအသုး ဟဲတ့ၢ်လီၤဒြိမ့ၣ်ပိၢ်တဖၣ်လၢ၀့ၢ်ပူၤ တစှၤန့ၣ်အဘျီ(၁၀)ဘၣ်အဂ့ၢ်တၢ်သ့ၣ်ညါဘၣ်န့ၣ်လီၤ.
မ့မ့ၢ်လၢ တအီသုးမုၢ်ဒိၣ်(TNLA)တခီ လီၢ်က၀ီၤကမျၢၢ်တဖၣ်န့ၣ်ဘၣ်ထွဲဒီးသုးဂ့ၢ်၀ီတၢ်အိၣ်သးတဖၣ်အဖီခိၣ် တလိၣ်ဘၣ်ယိၣ်တၢ်ဘၣ်အဂ့ၢ်န့ၣ် တၢ်ကစီၣ်မူဒါခိၣ် လွ့ယ့ၣ်အူ တဲလီၤဃၥ်၀ဲဖဲ တၢ်မၤနၢ်ပၢၢ်တၢ်ကွဲးပရၢအမူးတၢ်ရဲၣ်တၢ်ကျဲၤအပူၤန့ၣ်လီၤ.
“နီၢ်ခၠိၣ်,တီၣ်ခါတပၤန့ၣ်ကတီၢ်ခဲအံၤတပၤဒီးတပၤန့ၣ်မၤ၀ဲဒုးယၤရဲၣ်ကျဲၤတဖၣ်လီၤ.ခံခီယၢ်ပၤတၢ်ခီၣ်ဆၢဒုးက့ၤတၢ်စ့ၢ်ကီဒီးအိၣ်၀ဲလီၤ.တၢ်န့ၣ်အဃိကမျၢၢ်ဖိတဖၣ်အလီၢ်အိၣ်လၢကဘၣ်ပလီၢ်သူၣ်ပလီၢ်သးလၢတၢ်ဘံၣ်တၢ်ဘၢအဂီၢ်လီၤ. သုးဂ့ၢ်၀ီတပၤတခီတလိၣ်ဘၣ်ယိၣ်တၢ်ဘၣ်.တပၤဒီးတပၤန့ၣ်နီၢ်ကစၢ်သုးတၢ်တိၥ်ကူၣ်ကျဲၤအဖီခိၣ်ရဲၣ်ကျဲၤမၤ၀ဲန့ၣ်လီၤ.”အဂ့ၢ် လွ့ယ့ၣ်အူစံး၀ဲန့ၣ်လီၤ.
သုးကီၣ်ကးအသုးန့ၣ်ဒ်သိးကန့ၢ်ပၢဘၣ်က့ၤနီၢ်ခၠိၣ်၀့ၢ်အဂီၢ်မၤတၢ်ထီၣ်ဒုးဒုးယၤရဲၣ်ကျဲၤတဖၣ်ဖဲတီၣ်ခါဒီးအိမတံသ၀ီတကပၤ၀ံၤ က့ၤဒုးမၤန့ၢ်ဃၥ်၀ဲသ၀ီတနီၤအဂ့ၢ် တၢ်သ့ၣ်ညါဘၣ်န့ၣ်လီၤ.
ဖဲ၂၀၂၄နံၣ်, လါယူၤလံအတီၢ်ပူၤန့ၣ် တအီသုးမုၢ်ဒိၣ်(TNLA)ဒီး PDFသုးပၥ်ဖှိၣ်တဖၣ် ထီၣ်ဒုးမၤန့ၢ်ဃၥ်၀ဲ နီၢ်ခၠိၣ်၀့ၢ်န့ၣ်လီၤ.
