လါယူၤ(၄)သီ,၂၀၂၅နံၣ်
ကညီကီၫ်စဲၣ်,ကြုၫ်တုကီၫ်ဆၣ်ပူၤ တၫ်ဒုးကဲထီၣ်အဃိ ထံဖိကီၫ်ဖိကမျၢၫ်တနီၤ ဘၣ်ဃ့ၫ်ပူၤသးလၢတၫ်ပူၤဖျဲးလီၫ်အဂ့ၫ် တၫ်သ့ၣ်ညါဘၣ်လၢပှၤလီၫ်က၀ီၤဖိတဖၣ်အိၣ်န့ၣ်လီၤ.
တၫ်ဒုးအပူၤ သုးကီၣ်ကးသုတကပၤ သုးခိၣ်ဒိၣ်ဖိ(၁)ဂၤပာ်ဃုာ် သုးကီၣ်ကးအသုးဖိဘၣ်သံအါအါဂီၫ်ဂီၫ်အဃိ တၫ်ဘၣ်ယိၣ်လၢကဟဲတ့ၫ်လီၤမ့ၣ်ပိၫ်လၢကဘီယူၤအဃိ ဃ့ၫ်ပူၤဖျဲးသးအဂ့ၫ် တဲ၀ဲလီၤ.
ပှၤစံၣ်သုးပှၤလီၫ်အိၣ်ကမှံဖိတဂၤတဲ၀ဲလၢ”လၢလါမ့ၤ(၃၀)သီလံၤလံၤ လၢအ့ကၠံ,ကီး၀လဲၣ်,အိတပ့ၣ်,ခၠီဖၠါဒီးယ့ၣ်ပူၣ်သ၀ီ ပှၤလီၫ်က၀ီၤဖိ(၅၀၀)ဂၤဘျဲၣ် ဃ့ၫ်ပူၤဖျဲးအသးလီၤ.ကြုၫ်တုကီၫ်ဆၣ်ပူၤ သုးကီၣ်ကးအသုးတဖၣ်န့ၣ် KNLA/ PDF သုးပာ်ဖှိၣ်တဖၣ် က၀ီၤကးတံာ်ဃာ်၀ဲ၀ံၤ တၫ်ဘၣ်ယိၣ်လၢကခးလီၤကျိဖးဒိၣ်ဒီးကဘီယူၤတဖၣ်အဃိ ဃ့ၫ်ပူၤ အသးလၢတၫ်ပူၤဖျဲးအလီၫ်လီၤ.နီၫ်ဂံၫ်(၅၄၅)သုးကလၢၤ လၢအိၣ်ဆီလီၤအသးဖဲကြုၫ်တုအံၤ ခးလီၤကျိဖးဒိၣ် လၢ မုၫ်နၤမုၫ်ဆါအဂ့ၫ်”တဲ၀ဲလီၤ.
KNLA/PDFသုးပာ်ဖှိၣ်တဖၣ် ခး၀ဲဒီးကျိဖးဒိၣ်,တ့ၫ်လီၤမ့ၣ်ပိၫ်လၢဒြိဒီးခး၀ဲလၢစုဘျၢတဖၣ်အဃိ သုးကီၣ်ကးအသုးတကပၤ ပှၤခးကျိဖးဒိၣ်(၂)ဘၣ်သံတကးဘၣ်,သုးကီၣ်ကးအဒြိသုးဖိတနီၤစ့ၫ်ကီးတၫ်သံတၫ်ပှၫ်အါ၀ဲအဂ့ၫ် တၫ်သ့ၣ် ညါဘၣ်လၢသုးဂ့ၫ်၀ီဂ့ၫ်ခီၣ်ထံးတၫ်ကစီၣ်တဖၣ်အိၣ်န့ၣ်လီၤ.
၀့ၫ်ကြုၫ်တုအပူၤ သုးကီၣ်ကးအသုးတဖၣ် ဘၣ်တၫ်ဒုး၀ဲဒီးတၫ်ဘၣ်ဒိဘၣ်ထံးတၫ်သံတၫ်ပှၫ်အါထီၣ်အဃိ သုးကီၣ်ကး အသုးန့ၣ် ဖဲလီၫ်က၀ီၤပှၤစံၣ်သုးတဖၣ် ဟဲက့ၤဆူဟံၣ်အဆၢကတီၫ် မၤအၢမၤသီ၀ဲတကးဘၣ်,ဖီၣ်မၤသံ၀ဲဒၣ်လဲၣ်အိၣ် ၀ဲအဂ့ၫ် လီၫ်က၀ီၤဖိတဖၣ်တဲ၀ဲန့ၣ်လီၤ.
Ref:DVB
