လါယူၤ(၄)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်မုၢ်တြီၢ်, သုးက့(၅)ဟီၣ်က၀ီၤအပူၤ လါမ့ၤတလါအတီၢ်ပူၤ တၢ်ဒုးကဲထီၣ်တ့ၢ်၀ဲလၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးကီၣ်ကးအဘၢၣ်စၢၤအိၣ်ထီၣ်၀ဲ(၈၅)ဘျီဒီး သုးကီၣ်ကးအသုးသံ(၁၇)ဂၤဒီးဘၣ်ဒိ(၂၂)ဂၤအဂ့ၢ် ပှိၤလိၥ်(FM) ပၥ်ဖျါဃၥ်၀ဲန့ၣ်လီၤ.
တၢ်ဒုးကဲထီၣ်တ့ၢ်၀ဲဒၣ်လၢ ခံခီယၢ်ပၤအဖီခိၣ် ပယီၤသုးကီၣ်ကးတကပၤသံဒီးဘၣ်ဒိတဖၣ်အိၣ်ထီၣ်၀ဲအသိး မ့မ့ၢ်လၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တပၤစ့ၢ်ကီးတၢ်ဘၣ်ဒိဘၣ်ထံးအိၣ်ထီၣ်၀ဲတဆံးတက့ၢ်အဂ့ၢ် စံး၀ဲန့ၣ်လီၤ.
ဒ်န့ၣ်အသိး စးထီၣ်လၢလါမ့ၤ(၁)သီတုၤ(၃၁)သီအနံၤ, တလါအတီၢ်ပူၤ ပယီၤသုးကီၣ်ကးအသုးတဖၣ် ခးတပျူၤတပျီၤ၀ဲကျိဖးဒိၣ်အိၣ်၀ဲ(၈)ဘျီဒီး ဟဲခးဃုၥ်တၢ်လၢကလံၤကျါတၢ်ဒုးဒ်အမ့ၢ် ကဘီယူၤဒုးသုး မ့ၢ်ပိၢ်ခဲလၢၥ်အိၣ်၀ဲ(၁၀)ဘျီန့ၣ်လီၤ.
ခီဖျိလၢသုးကီၣ်ကးအသုးတဖၣ်အံၤခးကျိဖးဒိၣ်,မၤကလံၤကျါတၢ်ဒုးတဖၣ်,ဟဲတ့ၢ်လီၤမ့ၣ်ပိၢ်လၢကဘီယူၤတဖၣ်အဃိကမျၢၢ်ဒူသ၀ီဖိတဖၣ်ဘၣ်ပျံၤဘၣ်ဖူးတၢ်အါထီၣ်ကွ့ၢ်ကွ့ၢ်ဒီးတနီၤဘၣ်သုးလီၢ်သုးကျဲအိၣ်၀ဲတကးဒံးဘၣ်အမဲၥ်ညါ တၢ်ဖံးအီၣ်မၤအီၣ်အလီၢ်အကျဲဟးဂီၤအိၣ်ဃုၥ်၀ဲတနီၤအဂ့ၢ် ပှိၤလိၥ်(FM) ပၥ်ဖျါဃၥ်၀ဲန့ၣ်လီၤ.
လၢန့ၣ်အမဲၥ်ညါ ဖဲအပူၤကွံၥ် လါအ့ဖြ့ၣ်တလါအတီၢ်ပူၤစ့ၢ်ကီး သုးက့(၅)ဟီၣ်က၀ီၤအပူၤ ခံခီခံကပၤတၢ်ဒုးကဲထီၣ်တ့ၢ်၀ဲ (၁၃၉)ဘျီဒီး သုးကီၣ်ကးအသုးသံ(၃၉)ဂၤဒီးဘၣ်ဒိ(၅၅)ဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
