လါမ့ၤ(၂၇)သီ,၂၀၂၅နံၣ်
ကညီကီၢ်စဲၣ်, ကီးတရံး၀့ၢ်ပူၤ အဖိးသဲးစး ပနံၥ်တၢ်ဖိတၢ်လံၤတၢ်လဲၤသရံးသးကၤထီၣ်အဃိ ဂံၢ်ခီၣ်ထံးတၢ်အီၣ်တၢ်အီ, တၢ်ဖံးတၢ်ညၣ်တဖၣ်ပၣ်ဃုၥ် ဟုသး,သိအပှ့ၤကလံၤတဖၣ် ဒိၣ်ထီၣ်တလၢခၢးအသိး တၢ်ဘၣ်ပှ့ၤအီၤကီခဲဒိၣ်မးအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ်ကီးတရံး၀့ၢ်အပူၤလီၢ်က၀ီၤဟုသးတတီၣ်(၈၅၀၀၀)ကၠးဒီးဟုသးအမးတထၢၣ်(၁၇၀၀၀၀)ကၠးအပှ့ၤအိၣ်၀ံၤ သိအီၣ်တလံၣ်ထၢၣ်(၁၇၀၀၀)ကၠး, ဒးစံၣ်တလံၣ်ထၢၣ်(၂၀၀၀၀)ကၠး, ဆီဒံၣ်တဖျၢၣ်(၁၃၀၀-၁၄၀၀)ကၠး, ဆီညၣ်ဒီးထိးညၣ်တပီၢ်(၃၀၀၀၀တုၤ၃၅၀၀၀)ကၠး,ပသၢ၀ါ(၄၀၀၀၀)ကၠးဆူအဖီခိၣ်ဒီးပသၢဂီၤတပီၢ်(၂၀၀၀၀)ကၠးဃၣ်ဃၣ် အပှ့ၤဒိၣ်ထီၣ်၀ဲတလၢခၢးအဂ့ၢ် တၢ်သ့ၣ်ညါဘၣ်လၢ လီၢ်က၀ီၤဖိတဖၣ်အအိၣ်န့ၣ်လီၤ.
ပနံၥ်တၢ်ဖိတၢ်လံၤအပှ့ၤဒိၣ်ထီၣ်အသိး တကးဘၣ် တၢ်အီၣ်တၢ်အီတၢ်ဖိတၢ်လံၤတဖၣ်ပၣ်ဃုၥ် ဟုသး,သိတဖၣ်စ့ၢ်ကီး ကၤထီၣ်၀ံၤ တၢ်ဘၣ်လူၤပှ့ၤအီၤကီဒိၣ်မးအဂ့ၢ်, တၢ်ဖိတၢ်လံၤတနီၤန့ၣ် ကၤထီၣ်အသိး ဟုသးတၢ်ချၢတဖၣ် တၢ်ဟဲနုၥ်လီၤတအိၣ်လၢၤဘၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
ကီးတရံး၀့ၢ်အခိၣ်အဃၢၤဟီၣ်က၀ီၤအပူၤ တၢ်ဒုးကဲထီၣ်သးတအိၣ်ဘၣ်ဆၣ် တၢ်ဒုးဆူၣ်လၢ ကြုၢ်တုတပၤဒီး ခံခီခံကပၤမၤဃၥ်၀ဲတၢ်ကးတံၥ်တဖၣ်အဃိ ပနံၥ်တၢ်ဖိတၢ်လံၤတဖၣ်ကၤထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ပနံၥ်တၢ်ဖိတၢ်လံၤအပှ့ၤကလံၤတဖၣ်ဒိၣ်ထီၣ်၀ဲဃုၥ်ဒီး တၢ်ဃုဖံးဃုမၤအဂီၢ်ကီဒိၣ်မးအဃိ လီၢ်က၀ီၤဖိတဖၣ်အံၤ ဘၣ်လဲၤဃုဖံးဃုမၤလၢ ထံချၢကီၢ်ချၢတဖၣ်အသိး လီၢ်က၀ီၤဖိလၢအိၣ်တ့ၢ်တဖၣ်စ့ၢ်ကီးန့ၣ် တၢ်ဖံးတၢ်မၤတအိၣ်ဘၣ်အဃိ တၢ်ကလူၤအီၣ်သးသမူအဂီၢ် ကီဒိၣ်မးအဂ့ၢ် တၢ်သ့ၣ်ညါဘၣ်န့ၣ်လီၤ.
လၢတၢ်န့ၣ်အဃိ တနီၤန့ၣ် ဃ့တၢ်မၤစၢၤလၢ အဘူးတံၢ်ဆွ့ၣ်မၠိလၢအလဲၤဖံးမၤတၢ်လၢ ကီၢ်ချၢဒီး တၢ်မ့ၢ်မၤစၢၤအီၤဒၣ်လဲၣ်န့ၣ် တၢ်ကထုးထီၣ်စ့အဂီၢ် ကီဒိၣ်မးအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤ ကီးတရံး၀့ၢ်အိၣ်လီၢ်က၀ီၤကမျၢၢ်ဖိတဖၣ်အံၤ ဘၣ်ဒိးသန့ၤအီၣ် တၢ်ဒိးတၢ်လၥ်, တၢ်ဖံးတၢ်ညၣ်တဖၣ်လၢ ဒူသ၀ီလၢဘူးဒီးကီးတရံး၀့ၢ် ဘူၣ်အီၣ်သူၣ်အီၣ်၀ဲတဖၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
