လါမ့ၤ(၂၂)သီ,၂၀၂၅နံၣ်
ကလံၤထံးတရူးပီၣ်လဲၣ်ပူၤ ဖံးလံးပံးဒီးအမဲရကၤ ထံသုးတဖၣ် ပာ်ဖှိၣ်မၤ၀ဲသုးတၫ်ဂဲၤလိ၀ံၤ ဒ်အဆိကတၢၫ်တဘျီအသိး ခံကပၤပီၣ်လဲၣ်နံၤသုးတဖၣ်စ့ၫ် ပာ်ဃုာ်၀ဲအဂ့ၫ် တၫ်သ့ၣ်ညါဘၣ်လီၤ.
လါမ့ၤ(၂၁)သီနံၤ သုးတၫ်ဂဲၤလိအံၤ ဘၣ်တၫ်မၤ၀ဲ ဖဲပၣ်လၣ်၀ၣ်ဒီးအီၣ်စံၣ်ဒၣ်တဲၣ် မ့ၣ်ဒိၣ်ရိၣ် ပီၣ်လဲၣ်ပူၤ၀ံၤ ဖံးလံးပံး ထံသုး,ကလံၤသုး,သုးခိးပီၣ်လဲၣ်နံၤတဖၣ် ပာ်ဖှိၣ်ဂဲၤလိသုးဃုာ်ဒီးအမဲရကၤသုးခိးပီၣ်လဲၣ်နံၤကဘီ Stratton, အမဲရကၤထံသုးအကဘီကွၫ်ဟုၣ်တၫ် P-8A Poseidonတခိၣ်၀ံၤ မၤ၀ဲအဂ့ၫ် ဖံးလံးပံးသုးဘိးဘၣ်ရၤလီၤ၀ဲလီၤ.
တၫ်အံၤလၢတနံၣ်အံၤအပူၤ မ့ၫ်(၂)၀ီတ၀ီတၫ်ပာ်ဖှိၣ်ဂဲၤလိသုးဒီး ၂၀၂၃နံၣ်အလီၫ်ခံ (၆)၀ီတ၀ီန့ၣ်လီၤ.
တၫ်ပာ်ဖှိၣ်ဂဲၤလိသုးအပူၤ တၫ်ဆဲးကျိးဘျးစဲလိာ်သးကဒဲကဒဲဒီးတၫ်ဃုထံၣ်မၤပူၤဖျဲးထီၣ်က့ၤ Missionတဖၣ်စ့ၫ်ကီး ပာ်ဃုာ်၀ဲအဂ့ၫ် ဖံးလံးပံးသုးတဲ၀ဲလီၤ.
ကလံၤထံးတရူးပီၣ်လဲၣ်န့ၣ် မ့ၫ်တၫ်လီၫ်ခိၣ်သ့ၣ်လၢ ဖံးလံးပံးဒီးတရူးအဘၢၣ်စၢၤ တၫ်ဖ့ၣ်ဆၢကဲထီၣ်တၫ်လီၫ်န့ၣ်လီၤ. တရူးန့ၣ် ဂဲၤလိာ်၀ဲလၢကဒိၣ်စိ ကလံၤထံးပီၣ်လဲၣ်ဒီတဘ့ၣ်အဃိ တၫ်သဘံၣ်သဘုၣ်အိၣ်ထီၣ်၀ဲဒီးဖံးလပံးပာ်ဃုာ် လီၫ်က၀ီၤထံကီၫ်တနီၤန့ၣ်လီၤ.
အပူၤကွံာ်နံၣ်စ့ၫ်ကီး ဖံးလံးပံးဒီးတရူး ပီၣ်လဲၣ်နံၤသုးတဖၣ်အဘၢၫ်စၢၤ တၫ်သဘံၣ်သဘုၣ်တနီၤကဲထီၣ်တ့ၫ်အသး အိၣ်၀ဲလီၤ.
အမဲရကၤန့ၣ် အိၣ်ဆၢထၢၣ်ဃုာ်ဒီးဖံးလံးပံးဂၢၫ်ဂၢၫ်ကျၢၤကျၢၤအသိး,တရူးပီၣ်လဲၣ်ပူၤ ထံဂုၤကီၫ်ဂၤ ထံကျဲတၫ်ဟးထီၣ် က့ၤလီၤစ့ၫ်ကီး ကဒီသဒၢန့ၫ်၀ဲအဂ့ၫ် ဘိးဘၣ်ရၤလီၤဃာ်၀ဲလီၤ.
ပီၣ်လဲၣ်ထံကျဲ၀ဲအံၤန့ၣ် မ့ၫ်ဟီၣ်က၀ီၤတခါလၢ ကိးမုၫ်နံၣ် တၫ်ကူၣ်လဲၫ်မၤကၤပနံၣ်လၢထံကျဲ လီၫ်လၢလၢ ဒီၣ်လၣ်(၃) ထံၣ်လံၣ်ယၣ်ညါန့ၣ်လီၤ.
ကလံၤထံးပီၣ်လဲၣ်ဒီတဘ့ၣ်ဃၣ်ဃၣ် ပၢဆှၢ၀ဲခွဲးဃာ်အိၣ်အဂ့ၫ် ဘၣ်ထွဲဒီးတရူးအတၫ်ဃ့ထီၣ်န့ၣ် လၢ၂၀၁၆နံၣ်အပူၤ န့ၣ် ထံဂုၤကီၫ်ဂၤတၫ်စံၣ်ညီၣ်ဆၢတဲာ်၀ဲၤဒၢးတခါ ဂ့ၫ်လိာ်တ့ၫ်ဃာ်၀ဲန့ၣ်လီၤ.ဘၣ်ဆၣ်သနာ်က့ တရူးတခီ တၫ်ဆၢတဲာ် ၀ဲအံၤန့ၣ် တပာ်ပနီၣ်၀ဲနီတဘျီဘၣ်န့ၣ်လီၤ.
Ref: People’s Spring
