လါမ့ၤ(၂၂)သီ, ၂၀၂၅နံၣ်
အ့ၣ်ယၣ်၀တံၣ်ကီၢ်ခီ, အ့ၣ်ကပူၣ်ကီၢ်ဆၣ်, ကွ့ကီးတတက(၅)အကပၤ တၢ်ဒုးတၢ်ယၤတဖၣ်ဟဲတုၤအိၣ်လံအဃိ သုးကီၣ်ကးတပၤ ကတီၤဆိပၥ်၀ဲ သုးတၢ်ခီၣ်ဆၢအဂီၢ်ဒီးကျိဖးဒိၣ်သုးကလၢၤတဖၣ်လၢ အ့ၣ်ကပူၣ်ကီၢ်ဆၣ်အပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
AAဒီးတၢ်ပၢၢ်ဆၢသုးပၥ်ဖှိၣ်တဖၣ် ဟဲတုၤဆူ ကွ့ကီး တတက၅အကပၤ ဘးဘွ့ကိသ၀ီအကပၤခိၣ်ဃၢၤအဃိ တၢ်ဘၣ်သဂၢၢ်ခးလိၥ်သးတဖၣ်အိၣ်ထီၣ်၀ဲဒီး သုးကီၣ်ကးအသုးအဘၢၣ်စၢၤန့ၣ်လီၤ.
“တၢ်ဒုးတဖၣ်ဟဲတုၤအိၣ်လၢလ့မၠဲးနၣ်ဒီးအ့ၣ်ကပူၣ်အဃိ သုးကီၣ်ကးတပၤ ကတီၤဃၥ်၀ဲသုးတၢ်ခီၣ်ဆၢအဂီၢ်ဖဲ မဲစလံၣ်ကိန့ၣ်လီၤ. ၀ံၤအလီၢ်ခံအ၀ဲသ့ၣ် ဘူၣ်ဃၥ်၀ဲပှၤလၢကဟ့ၣ်အီၤတၢ်ကစီၣ်တဖၣ်စ့ၢ်ကီး”အဂ့ၢ် လီၢ်က၀ီၤဂံၢ်ခီၣ်ထံးတၢ်ကစီၣ် စံး၀ဲန့ၣ်လီၤ.
လၢတၢ်န့ၣ်တဖၣ်အဃိ သုးကီၣ်ကးအသုးအံၤ ကတီၤဃၥ်မဲစလံၣ်ကိ၀့ၢ်ဒ်တၢ်ခီၣ်ဆၢဒုးတၢ်အဂီၢ်၀ံၤ ဟ့ၣ်သုးတၢ်သိၣ်လိပှၤသးစၢ်တဖၣ်လၢ ကဒုးခီၣ်ဆၢတၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
တကးဘၣ် သုးကီၣ်ကးအသုးအံၤ ဃ့ကျိၥ်စ့လၢ ပှၤမၤမုၥ်ကျိၤ၀ဲၤကွၢ်တဖၣ်အအိၣ် တဂၤစုၥ်စုၥ်သၢကလီၢ်ကၠး၀ံၤ ဟံၣ်ဒူၣ်တဒူၣ်န့ၣ် ဃ့၀ဲတကလးကၠး၀ံၤ မၢတၢ်ဆီၣ်ထွဲသုးကီၣ်ကးအသုးအဂ့ၢ် တၢ်သ့ၣ်ညါဘၣ်လၢ လီၢ်က၀ီၤကမျၢၢ်ဖိတဖၣ်အအိၣ်န့ၣ်လီၤ.
အ့ၣ်ယၣ်၀တံၣ်ကီၢ်ခီ, အ့ၣ်ကပူၣ်ဒီးလ့မၠဲးနၣ်အဆၢ ပ့နဲကွ့သ၀ီအကပၤ သုးကီၣ်ကးအသုးဆီလီၤဃၥ်သုးအဂံၢ်အဘါ(၅၀)ဘျဲၣ်၀ံၤ ကတီၤဃၥ်၀ဲကျိဖးဒိၣ်သုးကလၢၤတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးအံၤ စးထီၣ်ဖဲလါမ့ၤ(၁၅)အနံၤန့ၣ် ဟဲခးစၢၤ၀ဲဒၣ်လၢသုးမုၢ်ဒိၣ်ကလံၤသဒၢမုၢ်တဖၣ် လၢတတက(၅)အကပၤ၀ံၤ ကတီၢ်ခဲအံၤန့ၣ် တၢ်ဒုးတဖၣ်ဟဲတုၤအိၣ်ဆူ ဘးဘွ့ကိလံန့ၣ်လီၤ.
Ref: Ayeyarwaddy Times
