လါမ့ၤ(၁၉)သီ,၂၀၂၅နံၣ်
ရၢရှၢၣ်သုးတဖၣ် တနံၤအံၤ ရဲၣ်ကျဲၤ၀ဲလၢကခးကွၫ်၀ဲ မျိာ်သၣ်တခိၣ်လၢတၫ်ခးစိဃီၤ၀ဲလၢထံကီၫ်တဘ့ၣ်ဒီးတဘ့ၣ်န့ၫ်အဂီၫ်အဂ့ၫ် ယူၣ်ကရ့ပ့ၫ်ဆှါပှၤဘၣ်မူဘၣ်ဒါတဖၣ် တဲ၀ဲလီၤ.
ရၢရှၢၣ်န့ၣ် လၢ Sverdlovskဟီၣ်က၀ီၤအပူၤ ရဲၣ်ကျဲၤ၀ဲလၢကခးမျိာ်သၣ်ယူၤအဂီၫ်၀ံၤ ကျိချံအံၤတၫ်ခး၀ဲလဲၤတၫ်ယံၤန့ၫ် တုၤလၢကံၣ်လိၣ်မံထၢၣ်(၁)ကလးဘျဲၣ်အဂ့ၫ် ယူၣ်ကရ့ပ့ၫ်ဆါတဲ၀ဲလီၤ.
တၫ်အံၤမ့ၫ်တၫ်ပညိၣ်ဟ့ၣ်တၫ်ဆီၣ်သနံးမၤပျံၤမၤဖုး ယူၣ်ကရ့တကးဘၣ်,ယူၤရပၤကီၫ်စၢဖှိၣ်ဒီးန့ၣ်တိကရၢထံကီၫ်တဖၣ်အဂ့ၫ် ယူၣ်ကရ့တဲဃာ်၀ဲလီၤ.မျိာ်သၣ်တၫ်ခးပညိၣ်အလီၫ်ပာ်ဃုာ် တၫ်ဂ့ၫ်တၫ်ကျိၤလၢလီၤတံၫ်တဖၣ်တခီ တထုးထီၣ်တဲဖျါ၀ဲဘၣ်.
ရၢရှၢၣ်တခီ ဘၣ်ထွဲဒီးတၫ်ခးကွၫ် ပတီၫ်ထီတၫ်စုက၀ဲၤဒ်သိးအံၤန့ၣ် ထုးထီၣ်တဲဖျါ၀ဲတအိၣ်ဘၣ်ဆၣ် ဒ်သုးဂ့ၫ်၀ီတၫ်ခူသူၣ်အသိး ခးကွၫ်၀ဲမ့ၫ်၀ံၤအလီၫ်ခံဒု ညီနုာ်ထုးထီၣ်ပာ်ဖျါ၀ဲလီၤ.
ယူၣ်ကရ့တၫ်ဒုးလၢယံာ်ထီၣ်(၃)နံၣ်အံၤ တၫ်ကမၤကတၢၫ်ကွံာ်၀ဲအဂီၫ် ဖဲတၫ်ဟ့ၣ်တၫ်ဆီၣ်သနံးလၢရၢရှၢၣ်အဖီခိၣ်အကတီၫ် အပူၤကွံာ်စှၤသီန့ၣ် ယူၣ်ကရ့-ရၢရှၢၣ်ထံလိာ်တၢၣ်ပီၣ်တဲသကိးတၫ်ဖဲကီၫ်ထၢၣ်ခံၣ်အပူၤဘၣ်ဆၣ် မ့တမ့ၫ်လၢ တၫ်ဆီတလဲပှၤသုးဖိလၢဘၣ်တၫ်ဖီၣ်ခံခီယၫ်ဘးဘၣ်န့ၣ် ဘၣ်ထွဲဒီးတၫ်ပတုာ်ကွံာ်တၫ်ခးအဂီၫ် တဒိးန့ၫ်တၫ်အၢၣ်လီၤ နီတမံၤဘၣ်.
အမဲရကၤကီၫ်ခိၣ်ဒီနၢၣ်ထရၢး လၢဟ့ၣ်တၫ်အၢၣ်လီၤလၢကမၤကတၢၫ်ကွံာ်ယူၣ်ကရ့တၫ်ဒုးလၢအဆိအချ့အံၤဘၣ်ထွဲဒီးတၫ်ဂ့ၫ်အံၤန့ၣ် တနံၤအံၤ တဲ၀ဲလၢကဆဲးကျိးတၢၣ်ပီၣ်တဲသကိးတၫ်ဒီးရၢရှၢၣ်ကီၫ်ခိၣ်ပူၣ်တ့ၣ် လၢလီတဲစိလီၤ.အလီၫ်ခံ ကတၢၣ်ပီၣ်တဲသကိးဃုာ်တၫ်ဒီးယူၣ်ကရ့ကီၫ်ခိၣ်,န့ၣ်တိထံကီၫ်ကရၢတဖၣ်အဂ့ၫ် ထုးထီၣ်တဲဖျါဃာ်၀ဲလီၤ.
Ref: NKH
