လါမ့ၤ(၁၆)သီ,၂၀၂၅နံၣ်
တရူးဒီးခၣ်ဘီဒံယါထံကီၢ်ခံဘ့ၣ်အံၤ ဖဲအပူၤကွံၥ်လါမ့ၤ(၁၄)သီအနံၤန့ၣ် ပၥ်ဖှိၣ်ဂဲၤလိ၀ဲသုးတၢ်ဂဲၤလိ၀ံၤ သုးတၢ်ဂဲၤလိအပူၤ မျိၥ်တဖၣ်, သုးကဘီတဖၣ်ဒီးထွံၣ်စဲးဖီကဟၣ်လၢတၢ်သူအီၤလၢသုးဂ့ၢ်၀ီပၣ်ဃုၥ် တရူးထံကီၢ်တၢ်ဒီသဒၢသူ သုးဂ့ၢ်၀ီစဲးဖီကဟၣ်ပီညါတဖၣ်စ့ၢ်ကီး ပၣ်ဃုၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
ကီၢ်ခၣ်ဘီဒံယါအံၤ အိၣ်ဂဲၤဆၢထၢၣ်၀ဲဒ် တရူးသိၣ်မှံကရၢအသိးဂၢၤဂၢၤကျၢၤကျၢၤလၢ နံၣ်ယံၤလါထၢ၀ံၤ ဒိးန့ၢ်ဃၥ် တၢ်ဘျၢလီၤတဖၣ်လၢအိၣ်ဒီးဒီၣ်လၣ်ဘံၣ်လံၣ်ယၣ်တဖၣ်လၢ ကီၢ်တရူးအအိၣ်န့ၣ်လီၤ.
တရူးတခီ ဟီၣ်က၀ီၤအပူၤဒ်သိးတၢ်စိကမီၤတၢ်လူၤဘၢအဂီၢ် သူ၀ဲခၣ်ဘီဒံယါထံသုးကလၢၤလၢ ဘၣ်တၢ်က့ၤဘှီဃၥ်အီၤဖဲ ကၠီၣ်တဲၣ်ပီၢ်လဲၢ်နံၤအပူၤတၢ်ဂ့ၢ်အဖီခိၣ် အမဲရကၤစ့ၢ်ကီး တၢ်ဘၣ်ယိၣ်အိၣ်ထီၣ်၀ဲန့ၣ်လီၤ.
တရူး-ခၣ်ဘီဒံၣ်ယါ သုးဂ့ၢ်၀ီတၢ်ဂဲၤလိအံၤ တၢ်ကမၤအီၤတုၤလါမ့ၤ(၂၈)သီအနံၤဒီး ဖဲလၢတၢ်ဂဲၤလိအတီၢ်ပူၤ တရူးသုးမုၢ်ဒိၣ် အပှၤသုးဖိ(၉၀၀)ဂၤဃၣ်ဃၣ်ဒီး ခၣ်ဘီဒံယါသုးမုၢ်ဒိၣ်တပၤတခီ အပှၤသုးဖိ(၁၃၀၀)ဘျဲၣ် ကပၣ်ဃုၥ်ဂဲၤလိတၢ်အဂ့ၢ် ခၣ်ဘီဒံယါသုးမုၢ်ဒိၣ်(RCAF) ထုးထီၣ်ပၥ်ဖျါဃၥ်၀ဲန့ၣ်လီၤ.
သုးဂ့ၢ်၀ီတၢ်ဂဲၤလိအပူၤ တရူးသုးဂ့ၢ်၀ီဘၣ်ထွဲပတီၢ်ထီသုးဂ့ၢ်၀ီတၢ်ပီးတၢ်လီတဖၣ်ပၣ်ဃုၥ်၀ဲအသိး သိလ့ၣ်ထးတဖၣ်, ကဘီယူၤတဖၣ်, သုးကဘီတဖၣ်, ဒြိတဖၣ်ဒီး သုးဂ့ၢ်၀ီသူထွံၣ်စဲးဖီကဟၣ်တဖၣ်စ့ၢ်ကီး ပၣ်ဃုၥ်၀ဲအဂ့ၢ် စံး၀ဲန့ၣ်လီၤ.
ကီၢ်ခၣ်ဘီဒံယါသုးမုၢ်ဒိၣ်(RCAF)အပှၤတဲတၢ်ပၢ Thong Solimoတခီ တၢ်မၤသုးတၢ်ဂဲၤလိကိးနံၣ်ဒဲးအံၤအဃိ တရူးဒီးခၣ်ဘီဒံယါသုးမုၢ်ဒိၣ်ခံဖုအဘၢၣ်စၢၤ တၢ်သူၣ်ထီၣ်န့ၢ်၀ဲတၢ်ရ့ၣ်လိမုၥ်လိၥ်လၢအဂ့ၤတခါ၀ံၤ သုးမုၢ်ဒိၣ်ဂံၢ်ဘါတကးဘၣ် သုးဂ့ၢ်၀ီတၢ်ပီးတၢ်လီတဖၣ်စ့ၢ်ကီး ဟဲဂ့ၤထီၣ်န့ၢ်ဒံးအပူၤကွံၥ်အဂ့ၢ် တဲလီၤ၀ဲဆူ AFPတၢ်ကစီၣ်သန့အအိၣ်န့ၣ်လီၤ.
ထံကီၢ်ခံဘ့ၣ်သုးတၢ်ဂဲၤလိအဂီၢ် တရူးထံသုး ကဘီChangbai Shanအံၤ ဖဲမုၢ်ဆၣ်အနံၤန့ၣ် ဟဲတုၤအိၣ်ဆူ ခၣ်ဘီဒံယါထံသုးကလၢၤReamလၢ ပၣ်ဃုၥ်ဒီးစုက၀ဲၤပီးလီတဖၣ်အဂ့ၢ်န့ၣ်လီၤ.
တရူးန့ၣ် ဒ်သိးပှၤကသ့ၣ်ညါဘၣ် အစိကမီၤဒီးအတၢ်ဂံၢ်ဆူၣ်တဖၣ်အဂီၢ် ယူၥ်န့ၢ်၀ဲအမံၤဒ် “Golden Dragon” ၀ံၤ ပၥ်ဖှိၣ်ဂဲၤလိ၀ဲသုးတၢ်ဂဲၤလိတဖၣ်အဂ့ၢ်” Ou Virak လၢအပဲၥ်ထံနီၤဖး ခၣ်ဘီဒံယါထံရူၢ်ကီၢ်သဲးတဂၤ စံး၀ဲန့ၣ်လီၤ.
ကီၢ်ခၣ်ဘီဒံယါတခီ ဆၢမုၢ်လၢ်ဃၥ်၀ဲလၢ ကဒိးန့ၢ်ဘၣ် သုးကဘီခံခိၣ်လၢ တရူးအအိၣ်န့ၣ်လီၤ.
ကီၢ်ခၣ်ဘီဒံယါအံၤ စးထီၣ်ပၥ်ဖှိၣ်ဂဲၤလိ၀ဲ Golden Dragonဒုးယၤရဲၣ်ကျဲၤ ဖဲ၂၀၁၆နံၣ်ဒီး မ့မ့ၢ် “Angkor Sentinel”သုးဂဲၤလိလၢ အပၥ်ဖှိၣ်ဂဲၤလိဒီးအမဲရကၤတခီ ပတုၥ်ကွံၥ်၀ဲဖဲ ၂၀၁၇နံၣ်န့ၣ်လီၤ.
Ref – AFP
