လါမ့ၤ(၁၃)သီ,၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်ရ့ၣ်ဘျံးဒ၀ဲၢ်,သုးက့(၄)ဟီၣ်က၀ီၤအပူၤထံဖိကီၢ်ဖိကမျၢၢ်အတၢ်ဘံၣ်တၢ်ဘၢအဂီၢ်တၢ်ကနီဟးထီၣ်ကွံၥ်သုးကီၣ်ကးသုးကလၢၤခဲလၢၥ်လၢအိၣ်လၢသုးက့(၄)ဟီၣ်က၀ီၤပူၤအဂ့ၢ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ်ခံ သုးခိၣ်ကျၢၢ်စိစီၤဘီကၠီၣ်ဟဲ စံး၀ဲန့ၣ်လီၤ.
ဘၣ်ထွဲဒီးတနီသရံၣ်ခဲၣ်ဖ့အဖီခိၣ် (KNLA)သုးရိၣ်မဲခိၣ်ကျၢၢ်ခံ တဲဆီၣ်တခုလီၤ၀ဲ ဒ်အံၤန့ၣ်လီၤ.
“ကတီၢ်ခဲအံၤန့ၣ် ပှၤလၢကပၥ်ဖှိၣ်မၤသကိးဒီးပှၤလၢကဆီၣ်ထွဲမၤစၢၤ တနီသရံၣ်ခဲၣ်ဖ့အဂီၢ်လိၣ်ဘၣ်၀ဲအါမးန့ၣ်လီၤ. ပ၀ဲခဲလၢၥ်ပမ့ၢ်ပၥ်ဖှိၣ်မၤသကိးတၢ်န့ၣ်ကကဲထီၣ်ဂံၢ်ဘါသဟီၣ်ဆူၣ်တခါန့ၣ်လီၤ.အရ့ဒိၣ်န့ၣ်ပလိၣ်ဘၣ်တၢ်ဂံၢ်တၢ်ဘါလီၤ.ပှၤလၢပၣ်ဃုၥ်တဲသကိးတၢ်,တၢ်ဟ့ၣ်ခီဟ့ၣ်နီၤလီၤသးခဲလၢၥ်န့ၣ်မ့ၢ်ဒၣ်ဂံၢ်ခီၣ်ထံးဂံၢ်ဘါသဟီၣ်န့ၣ်လီၤ.တနီသရံၣ်ဒီတကျိၤဒီးသုးက့(၄)ဟီၣ်က၀ီၤအပူၤအိၣ် သုးကီၣ်ကးသုးကလၢၤတဖၣ်အံၤ ထံဖိကီၢ်ဖိကမျၢၢ်တၢ်ဘံၣ်တၢ်ဘၢအဂီၢ် ပကဘၣ်နီဟးထီၣ်ကွံၥ်ဒုၣ်ဒါခဲလၢၥ်န့ၣ်လီၤ. ၀ံၤအလီၢ်ခံန့ၣ် ပကဘၣ်သူၣ်ထီၣ်ဆီလီၤ တၢ်ပၢတၢ်ပြးသနူအဂ့ၢ်” သုးခိၣ်ကျၢၢ်စိ စီၤဘီကၠီၣ်ဟဲ စံး၀ဲန့ၣ်လီၤ.
ခါဆူညါန့ၣ် တၢ်ကအိၣ်မူလဲၤဃုၥ်ဒီးကလုၥ်အဂၤအဂီၢ်ဒီး ကညီကလုၥ်အတၢ်အိၣ်မူတၢ်လၢတၢ်ပှဲၤအဂီၢ် ကညီဖိလၢအိၣ်လၢတနီသရံၣ်ကီၢ်ခီပူၤတဖၣ်တကးဘၣ် ကညီဖိလၢအိၣ်လၢတၢ်လီၤသကုးတဖၣ် ကဆီၣ်ထွဲမၤစၢၤဘၣ် တနီသရံၣ်ခဲၣ်ဖ့အပူၤ တၢ်လၢအလိၣ်ဘၣ်တဖၣ်အဂ့ၢ် KNLAသုးရိၣ်မဲခိၣ်ကျၢၢ်ခံ တဲဆီၣ်တခုထီၣ်၀ဲန့ၣ်လီၤ.
“လၢတၢ်န့ၣ်အဃိ ဒီပုၢ်၀ဲၢ်မိပၢ်ခိၣ်နၢ်လၢအိၣ်လၢတၢ်လီၢ်သကုးတဖၣ် မ့ၢ်နၢ်ဟူဘၣ်ခဲၣ်ဖ့အံၤအဂ့ၢ်န့ၣ် ကဆီၣ်ထွဲမၤစၢၤဘၣ် ဒ်အန့ၢ်အသ့ဒီးလၢသူၣ်ဒီဖျၢၣ်သးဒီဖျၢၣ်အဂီၢ် ယအဲၣ်ဒိးတဲဆီၣ်တခုထီၣ်လီၤ. အါဂ့ၤစှၤဂ့ၤန့ၣ် အရ့တဒိၣ်ဘၣ်. တၢ်ကတုၤဃီၤဆူ ခါဆူညါလၢပပညိၣ်ဃၥ်အံၤအဂီၢ် လိၣ်ဘၣ်လၢပှၤခဲလၢၥ်ကဆီၣ်ထွဲမၤစၢၤအီၤအဂ့ၢ်” သုးခိၣ်ကျၢၢ်စိ စီၤဘီကၠီၣ်ဟဲ စံး၀ဲန့ၣ်လီၤ.
တနီသရံၣ်ခဲၣ်ဖ့တၢ်ဃုစ့ပၥ်ကီၤတၢ်ဆၢကတီၢ်န့ၣ် တၢ်ပၥ်ပနီၣ်ဃၥ်အီၤ လၢစးထီၣ်လၢလါမ့ၤ(၁)သီတုၤလါယူၤ(၁၅)သီအနံၤ တလါတ၀ၣ်အတီၢ်ပူၤ ကဒိးန့ၢ်ဘၣ် ကၠီၣ်တဲၥ်စ့(၃)ကကွဲၢ်အဂီၢ် တၢ်ပညိၣ်ဃၥ်၀ဲန့ၣ်လီၤ.
တၢ်မၤခဲၣ်ဖ့အံၤတၢ်ပညိၣ်တခီ မ့ၢ်၀ဲဒ်သိး တၢ်ကဒီသဒၢန့ၢ် ကမျၢၢ်လၢအကွၢ်ဆၢၣ်မဲၥ်ဘၣ်ဒီးတၢ်ပျံၤတၢ်ဖုးတဖၣ်အဂီၢ်, တၢ်အိၣ်ဂၢၤဆိးကျၢၢ်ဒီးတၢ်ကသူၣ်ထီၣ်ဆီလီၤ ပၢပြးသနူတခါလၢအဂံၢ်ဆူၣ်အဂီၢ်, တၢ်ကနီဟးထီၣ်ကွံၥ် သုးမီၤစိရိၤအသုးခဲလၢၥ်လၢ သုးက့(၄)ဟီၣ်က၀ီၤအပူၤအဂီၢ်အဂ့ၢ် ပှၤလၢတီခိၣ်ရိၣ်မဲခဲၣ်ဖ့တဖၣ် ဒုးသ့ၣ်ညါဃၥ်၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၄)အစုတီၤဖီလၥ် ကညီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အံၤ ကတီၢ်ခဲအံၤန့ၣ် ပၣ်ဖှိၣ်လိၥ်သးဒီး တနီသရံၣ်ကီၢ်ခီအပူၤအိၣ် ကမျၢၢ်တၢ်ဒီသဒၢသုး(PDF)ပၣ်ဃုၥ် တၢ်ပၢၢ်ဆၢဂံၢ်ဘါကရူၢ်တဖၣ်၀ံၤ ဒုး၀ဲသုးမီၤစိရိၤသုးကီၣ်ကးအသုးအဃိ ဖဲလါအ့ဖြ့ၣ်(၁၉)သီအနံၤန့ၣ် ဒုးမၤန့ၢ်၀ဲထံထၣ်သုးတၢ်တိၥ်ကူၣ်ကျဲၤသုးကလၢၤဒီး ဖဲလါမ့ၤ(၉)သီအနံၤန့ၣ် ဒုးမၤန့ၢ်၀ဲစ့ၢ်ကီး ထံခံကီၢ်ဆၢသုးကလၢၤန့ၣ်လီၤ.
