လါမ့ၤ(၇)သီ,၂၀၂၅နံၣ်
အ့ၣ်ယၣ်၀တံၣ်ကီၫ်ခီ,၀့ၫ်ကၣ်ကၠံဒီး,လၢဒါကးတဲးနဲၣ် သုးကီၣ်ကးအသ၀ီသးပှၫ်န့ၣ် ပာ်ထီၣ်တၫ်ဂ့ၫ်လၢ ကမျၢၫ်တၫ်ဘၣ်ကဲသုး၀ံၤ ဃ့အီၣ်ကျိာ်စ့အဂ့ၫ် တၫ်သ့ၣ်ညါဘၣ်လၢပှၤလီၫ်က၀ီၤဖိတဖၣ်အိၣ်န့ၣ်လီၤ.
သုးကီၣ်ကးအသ၀ီသးပှၫ် အူကၠီၣ်ကၠီၣ်ဒီးအနီလၢအမ့ၫ် မခ့ၣ်မၠးကၠီၣ်တဖၣ်တီခိၣ်ရိၣ်မဲ၀ဲ၀ံၤ ဃ့အီၣ်ကျိာ်စ့တဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
“ပှၤသးနံၣ်ပှဲၤလၢကဘၣ်ကဲသုးခဲလၢာ်ဘၣ်ဖၢနုာ်စ့လီၤ.ဃ့န့ၫ်ဆူၣ်၀ဲလီၤ.တၫ်ဟ့ၣ်မ့ၫ်တန့ၫ်ဘၣ်ဒီးမ့ၫ်လဲၤတဲဘၣ်တၫ်ဂ့ၫ်တၫ်ကျိၤန့ၣ် တဲပျံၤတဲဖုး၀ဲလၢကဘၣ်ကဲသုးလီၤ”အဂ့ၫ် လီၫ်က၀ီၤဖိတဂၤတဲ၀ဲလီၤ.
သးနံၣ်(၁၈)နံၣ်တုၤ(၃၅)နံၣ်အတီၫ်ပူၤ သးစၫ်(၁)ဂၤစုာ်စုာ် ဃ့၀ဲစ့(၂)ကလီၫ်ကၠး၀ံၤ ဟံၣ်တဒူၣ်န့ၣ် သးစၫ်မ့ၫ် အိၣ်(၂)ဂၤ န့ၣ် ဃ့အီၣ်၀ဲကျိာ်စ့ (၃)ကလီၫ်(၈)ကလးကၠးအဂ့ၫ် လီၫ်က၀ီၤဖိတဖၣ်တဲ၀ဲလီၤ.
အ့ၣ်ယၣ်၀တံၣ်ကီၫ်ခီပူၤန့ၣ် ကီၫ်ဆၣ်အိၣ်(၂၆)ဘ့ၣ်၀ံၤ သုးကီၣ်ကးအပၢပြးဘၣ်မူဘၣ်ဒါတဖၣ်အါတက့ၫ်န့ၣ် ပာ်ထီၣ် တၫ်ဂ့ၫ်လၢကမျၢၫ်တၫ်ဘၣ်ကဲသုး၀ံၤဃ့အီၣ်ကျိာ်စ့အါထီၣ်ဒီးပၢပြးဘၣ်မူဘၣ်ဒါအါတက့ၫ်န့ၣ် ကဲဒိၣ် ထီၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
ဒ်န့ၣ်အသိး ကမျၢၫ်တၫ်ဘၣ်ကဲသုး နီၫ်ဂံၫ်(၁၀)၀ီတ၀ီန့ၣ် ဖဲလါမ့ၤ(၅)သီအနံၤန့ၣ် ဒုးစံၣ်လီၤ၀ဲသုးတၫ်မၤလိ၀ံၤ လၢက တီၫ်အံၤအိၣ်ကတီၤအသးလၢ ကကိး၀ဲ နီၫ်ဂံၫ်(၁၁)၀ီတ၀ီ ကမျၢၫ်တၫ်ဘၣ်ကဲသုး ပှၤထီၣ်သုးတၫ်မၤလိဖိတဖၣ်အဂ့ၫ် တၫ်သ့ၣ်ညါဘၣ်လၢ သုးပူၤဂ့ၫ်ခီၣ်ထံးတၫ်ကစီၣ်အိၣ်န့ၣ်လီၤ.
Ref: Ayeyarwaddy Times
