လါမ့ၤ(၁)သီ, ၂၀၂၅နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ စုဒုၣ်တီၤဖီလၥ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် လၢဟံးတၢ်ဘံၣ်တၢ်ဘၢလၢ သူမွဲကျိဟီၣ်ကဝီၤသ့ၣ်တဖၣ် ဖဲ ၂၀၂၅ နံၣ် လါအ့ဖြ့ၣ် ၂၇ သီ ဂီၤခီ (၈း၀၀)နၣ်ရံၣ်ဃၣ်ဃၣ် အဆၢကတီၢ် ဖီၣ်န့ၢ်ဝဲကသံၣ်မူၤဘှီး (WY) (၅၉၉)ဘိၣ် အဖျၢၣ်ယဲၢ်ကကွဲၢ်ဘျဲၣ်(၅,၅၉၀,၀၀၀)ဖျၢၣ် ဖဲ မုၢ်ယုၢ်ထၣ်ဟီၣ်ကဝီၤပူၤအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၥ်၀ဲန့ၣ်လီၤ.
ချံလၢဟဲတီၣ်ကသံၣ်မူၤဘှီးတၢ်ဖိတၢ်လံၤတဖၣ်အံၤ အိၣ်ဟဲလီၤ၀ဲဒၣ်လၢဃိၣ်လိၥ်ကျိ၀ံၤ ကၠီၣ်တဲၣ်မဲၢ်သ၀ီချံသန့တၢ်လီၢ်တဆီ တၢ်ကဆှဲအီၤဆူ ကီၢ်ပယီၤတပၤ မဲၢ်သ၀ီအဖီလိၥ်ချံသန့တၢ်လီၢ်အဂ့ၢ် လီၢ်က၀ီၤတၢ်ကစီၣ်တဖၣ် ပၥ်ဖျါဃၥ်၀ဲန့ၣ်လီၤ.
ကသံၣ်မူၤဘှီးတၢ်ဖိတၢ်လံၤလၢတၢ်ဖီၣ်န့ၢ်အီၤတဖၣ်န့ၣ် တၢ်ဖီၣ်န့ၢ်အီၤလၢ မၤနၢၤပျီဟီၣ်က၀ီၤ KNU/KNLAတၢ်သမံသမိးတြဲၤ ဖဲလါအ့ဖြ့ၣ်(၂၇)သီအနံၤ, ဂီၤ(၈)နၣ်ရံၣ်ဃၣ်ဃၣ်အဂ့ၢ် စံး၀ဲန့ၣ်လီၤ.
ဘၣ်ဃးဒီး တၢ်ဖီၣ်န့ၢ် ကသံၣ်မူၤဘှီးဘျီဝဲအံၤ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ တၢ်မၤလ့ၤမၤပျီကသံၣ်မူၤဘှီးဒီး တၢ်မၤလီၤမၢ်ကွံၥ်တၢ်ကူၣ်လဲမၤကၤၦၤကညီကမံးတံၥ်ဒီးကညီဒီကလုၥ်ပၢၤကီၢ်သုးသ့ၣ်တဖၣ် ကဟံးထီၣ်ဖီၣ်ထီၣ်ဝဲ တၢ်ဂ့ၢ်တၢ်ဝီဒီးကရဲၣ်ကျဲၤမၤဝဲဒ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤသဲစးတၢ်သိၣ်တၢ်သီတၢ်ဘျၢအသိးအဂ့ၢ် တၢ်သ့ၣ်ညါဘၣ်န့ၣ်လီၤ.
ကတီၢ်ခဲအံၤန့ၣ် ကၠီၣ်တဲၣ်-ပယီၤကီၢ်ဆၢဒီတကျိၤ KNU/KNLAတၢ်သမံသမိးတြဲၤတၢ်လီၢ်တဖၣ်အပူၤ တၢ်မၤဃံးထီၣ်၀ဲတၢ်ဘံၣ်တၢ်ဘၢတဖၣ်အသိး မၤဃံးထီၣ်၀ဲတၢ်သမံသမိးတဖၣ်အဂ့ၢ်န့ၣ် ပှၤနီၤချံဖိတဂၤစံး၀ဲအဂ့ၢ်န့ၣ် လီၢ်က၀ီၤတၢ်ကစီၣ်ပၥ်ဖျါဃၥ်န့ၣ်လီၤ.
