လါအ့ဖြ့ၣ်(၃၀)သီ, ၂၀၂၅နံၣ်
လါအ့ဖြ့ၣ်(၂၉)သီ, ၂၀၂၅နံၣ်အနံၤန့ၣ် ကညီကူၣ်သ့ဆဲးလၤ၀ဲၤကျိၤ (KECD) ဘိးဘၣ်ရၤလီၤ၀ဲ ၂၀၂၄-၂၀၂၅ကူၣ်သ့နံၣ် (၁၂)တီၤကီၢ်သူလ့ၤပဒိၣ်တၢ်ဒိးစဲးဖှိၣ်အစၢတဖၣ်န့ၣ်လီၤ.
ကီၢ်သူလ့ၤတၢ်ပၢဟီၣ်က၀ီၤအပူၤ ကၠိဖိမုၣ်(၉၈၄)ဂၤဒီးခွါ(၅၅၃)ဂၤလၢ အမၤလိတၢ်ဖဲကၠိ(၄၂)ဖျၢၣ်လၢ ကညီကူၣ်သ့ဆဲးလၤအတၢ်တီခိၣ်ရိၣ်မဲအဖီလၥ်တဖၣ်နုၥ်လီၤ၀ဲ ၂၀၂၄-၂၀၂၅ကူၣ်သ့နံၣ်ကီၢ်သူလ့ၤပဒိၣ်တီၤတီကၠိအတၢ်ဒိးစဲးအဂ့ၢ် တၢ်သ့ၣ်ညါဘၣ်န့ၣ်လီၤ.
ဒ်ဟီၣ်ခိၣ်ဒီဖျၢၣ်သ့ၣ်ညါတ့ၢ်လံအသိး, ကတီၢ်အံၤတၢ်အိၣ်သးလၢကီၢ်ပယီၤအပူၤ မ့ၢ်၀ဲဂ့ၢ်ဂီၤအူတၢ်ဒုးကိၢ်အကတီၢ်ဒီး ပယီၤသုးမီၤစိရိၤတဖၣ်စူးကါနၢၤ၀ဲစုက၀ဲၤဂံၢ်ဘါဒီးကလံၤကျါတၢ်ဒုးဆူၣ်ဆူၣ်အါအါမုၢ်နၤမုၢ်ဆါန့ၣ်လီၤ.ပယီၤသုးမိၤစိရိၤအတၢ်ထီၣ်ဒုးတဖၣ်အပူၤတနီၤဖး၀ဲကမျၢၢ်ဒီးသုးအတၢ်ခးပနီၣ်အဒူၣ်အဆၢဘၣ်ဒီးပညိၣ်၀ဲလိၤလိၤဆူကမျၢၢ်ထံဖိကီၢ်ဖိတဖၣ်အိၣ်လၢအပၣ်ဃုၥ်ဒီးကၠိဖိမုၣ်/ခွါဒီးကၠိသရၣ်မုၣ်သ့ၣ်တဖၣ်ဒ်အဒုၣ်အဒါအသိးအဂ့ၢ်(KECD)စံး၀ဲန့ၣ်လီၤ.
တကးဘၣ် တၢ်မၤလိဒီတနံၣ်အတီၢ်ပူၤကွၢ်ဆၢၣ်မဲၥ်လဲၤခီဖျိတၢ်အိၣ်သးကီခဲဒီးတၢ်တတဲၥ်တနါနးနးကျံၤကျံၤဘၣ်ဆၣ် ကၠိဖိဒီးကၠိသရၣ်/မုၣ်တဖၣ်တတူၢ်အဃၣ်ညီကဒၣ်ဘၣ်ဒီးလၢတၢ်သူၣ်ဒူသးဒူဒီးတၢ်သးစွံကတုၤအပူၤဂုၥ်ကျဲးစၢးမၤ၀ဲတုၤ ၂၀၂၄-၂၀၂၅ကူၣ်သ့နံၣ်ကတၢၢ်ကွံၥ်၀ဲတစု ခီဖျိတၢ်နုၥ်လီၤပဒိၣ်တၢ်ဒိးစဲးပှဲၤဒီးတၢ်မၤနၢၤအံၤအဂ့ၢ် ပၥ်ဖျါဃၥ်၀ဲန့ၣ်လီၤ
ကညီကူၣ်သ့ဆဲးလၤ၀ဲၤကျိၤ(KECD)အလံၥ်ဘိးဘၣ်ရၤလီၤအပူၤ စံးဘျူးစံးဖှိၣ်၀ဲစ့ၢ်ကီး လီၢ်က၀ီၤပှၤဘၣ်မူဘၣ်ဒါလၢအပတီၢ်ဒၣ်၀ဲစုၥ်စုၥ်, ကၠိကမံးတံၥ်ဃုၥ်ဒီးကၠိဖိမိၢ်ပၢ်သ့ၣ်တဖၣ်လၢ အတၢ်ဟ့ၣ်လီၤသးနီၢ်နီၢ်လၢတၢ်ပၥ်ဖှိၣ်မၤသကိးဒီးတၢ်ဟ့ၣ်ဂံၢ်ဟ့ၣ်ဘါကဟုကယၥ်ဖိလံၤတဖၣ်လၢ အတၢ်ဖံးလိၤမၤဒိးဒီးတၢ်ဃုန့ၢ်တၢ်ကူၣ်ဘၣ်ကူၣ်သ့အပူၤအံၤအဒိၣ်အအါအဂ့ၢ်န့ၣ်လီၤ.
တၢ်အကံၢ်အစီဒီးသးသဟီၣ်အံၤ မ့ၢ်တၢ်ပနီၣ်အုၣ်ကီၤတမံၤလၢ ပဘူးဒိၣ်ဒီးပတၢ်မၤနၢၤဖီတၢၣ်ဒ်အမ့ၢ် ပပှၤကလုၥ်ကဒိးန့ၢ်ဘၣ်တၢ်စံၣ်ညီၣ်ပၢလီၤသးခွဲးယၥ်သဘျ့ဒီးသူၣ်ထီၣ်ပထံရူၢ်ကီၢ်သဲးအဘူၣ်အတီၢ်လၢပနီၢ်ကစၢ်လၢအဆိအချ့အံၤအဂ့ၢ် စံး၀ဲန့ၣ်လီၤ. .
လၢန့ၣ်အမဲၥ်ညါကညီကူၣ်သ့ဆဲးလၤ၀ဲၤကျိၤ(KECD)ကွဲမုၥ်ကဒီးပှၤလၢအဘၣ်ထွဲတဖၣ်ကိးကရၢကိးဂၤလၢတၢ်စုလီၤဃုၥ်ဆူညါအဂီၢ်အဂ့ၢ်န့ၣ်လီၤ.
