လါအ့ဖြ့ၣ်(၁၀)သီ,၂၀၂၅နံၣ်
အ့တီၣ်၀့ၢ်တၢ်ဒုးအပူၤ ယပၣ်လဲၣ်ကူၣ်သုးကလၢၤလၢအိၣ်တ့ၢ်လီၢ်ခံကတၢၢ်တဖျၢၣ်အပူၤ သုးကီၣ်ကးအသုးတြိၤခိၣ် အီၣ်သဲးအူဒီးအပှၤလၢပၥ်တ့ၢ်သုးကလၢၤဃ့ၢ်ဖျိးကွံၥ်တဖၣ် တၢ်ပၢၢ်ဆၢသုးတဖၣ် ဖီၣ်န့ၢ်အီၤဖဲကသၣ်၀့ၢ်အဂ့ၢ် ဂံၢ်ခီၣ်ထံးသုးဂ့ၢ်၀ီတၢ်ကစီၣ်စံး၀ဲန့ၣ်လီၤ.
အ့တီၣ်၀့ၢ်လၢ သုးတြိၤ(၇၇)သုးတြိၤခိၣ် ပၢဆှၢရဲၣ်ကျဲၤနဲၣ်လီၤတၢ်အံၤ တၢ်ပၢၢ်ဆၢသုးတဖၣ် မၤတၢ်ထီၣ်ဒုးအဆၢကတီၢ် သုးကီၣ်ကးသုးတြိၤခိၣ်ဒီးအပှၤတဖၣ် ပၥ်တ့ၢ်ကွံၥ်သုးကလၢၤဃ့ၢ်ဖျိးကွံၥ်အဆၢကတီၢ် တၢ်ဖီၣ်န့ၢ်အီၤဖဲ ကသၣ်၀့ၢ်အဂ့ၢ် တၢ်သ့ၣ်ညါဘၣ်န့ၣ်လီၤ.
“သုးတြိၤ(၇၇) သုးတြိၤခိၣ် အီၣ်သဲးအူ(DSA ၄၂)ဒီးအပှၤတဖၣ် ဘၣ်တၢ်ဖီၣ်န့ၢ်အီၤ ဖဲကသၣ်၀့ၢ်အနုၥ်လီၤန့ၣ်လီၤ. အ့တီၣ်ယပၣ်လဲၣ်ကူၣ်သုးကလၢၤအပူၤရတတမခ၇၇ခီၣ်ဆၢဒုးတၢ်ဒီးသုးရ့ၣ်(၄)ရ့ၣ်လၢအဂံၢ်အဘါအိၣ်(၆၈၀)ဃၣ်ဃၣ်န့ၣ်လီၤ. တၢ်ကထီၣ်ဒုး အ့တီၣ်၀့ၢ်အဂီၢ် ဟဲနုၥ်လီၤ၀ဲဒၣ်လၢ ဘါမီၣ်တပၤ အိၣ်လံ(၁)နံၣ်ဘျဲၣ်လံန့ၣ်လီၤ. ဂုၥ်ကျဲးစၢးဃ့ၢ်ဖျိးကွံၥ်ဘၣ်ဆၣ် တၢ်လဲၤခိးပၥ်ဖဲ ကသၣ်၀့ၢ်ဒီးတၢ်ဖီၣ်အီၤ”အဂ့ၢ် CDM သုးခိၣ်စ့ၣ်ယီၣ် ကွဲးဖျါဃၥ်၀ဲလၢ အပှၤတ၀ၢလံၥ်ကဘျံးပၤအဖီခိၣ်န့ၣ်လီၤ.
ကတီၢ်ခဲအံၤကသၣ်၀့ၢ်လၢသုးကီၣ်ကးအသုးပၢဆှၢဃၥ်အံၤအပူၤသုးကီၣ်ကးအသုးအဂံၢ်အဘါအိၣ်ဒၣ်ထဲလီၢ်က၀ီၤသုးရ့ၣ် ခမရ၃၀၉ဒီး ကျိဖးဒိၣ်သုးသုးဒ့တဒ့န့ၣ်လီၤ. ဒ်န့ၣ်အသိး ခဲအံၤန့ၣ် တၢ်ပၢၢ်ဆၢသုးတဖၣ် က၀ီၤကးတံၥ်ဃၥ် ကသၣ်၀့ၢ်ဒီး ခမရ၃၀၉လံအဂ့ၢ် သုးခိၣ်စ့ၣ်ယီၣ် စံး၀ဲန့ၣ်လီၤ.
သုးကီၣ်ကးအသုးတြိၤခိၣ်ဒီးအပှၤလၢဘၣ်တၢ်ဖီၣ်န့ၢ်အီၤ အနီၣ်ဂံၢ်နီၣ်ဒွးတခီ တၢ်တသ့ၣ်ညါဘၣ်လီၤတံၢ်ဒံးဘၣ်. အ့တီၣ်၀့ၢ်တၢ်ဒုးလၢ ယံၤလါတဖၣ်အံၤအပူၤ သုးကီၣ်ကးတပၤခီၣ်ဆၢဒုးက့ၤတၢ်လၢ အဂံၢ်အဘါဒိၣ်ဒိၣ်မုၢ်မုၢ်ဘၣ်ဆၣ် ယံၤဘူးထီၣ်(၈)လါန့ၣ် ဘၣ်ပျၢ်ကွံၥ်၀ဲသုးကလၢၤန့ၣ်လီၤ.
ခီဖျိဟီၣ်ခိၣ်ဟူး၀းတၢ်တတဲၥ်တနါကဲထီၣ်တ့ၢ်အဃိ သုးကီၣ်ကးအသုး ဘိးဘၣ်ရၤလီၤဃၥ်၀ဲလၢ ကမၤတၢ်ပတုၥ်တၢ်ခးဘၣ်ဆၣ် တၢ်ပၢၢ်ဆၢသုးပၥ်ဖှိၣ်တဖၣ်လဲၤဒုး သုးကီၣ်ကးခီၣ်ဆၢသုးကလၢၤလၢအမ့ၢ် ယပၣ်လဲၣ်ကူၣ်သုးကလၢၤအံၤလၢ ကျိဖးဒိၣ်ဒီးဒြိတဖၣ်အဃိ တၢ်ဒုးဆူၣ်ထီၣ်၀ဲဒၣ် ဖဲလါအ့ဖြ့ၣ်(၁)သီတုၤ(၃)သီအနံၤ၀ံၤ သုးကီၣ်ကးတပၤ ဘၣ်ဟဲခးစၢၤ၀ဲဒၣ်လၢကလံၤကျါန့ၣ်လီၤ.
အ့တီၣ်ကီၢ်ဆၣ်ဒီတဘ့ၣ်လၢ အိၣ်ဖဲ ကခၠ့ၣ်ကီၢ်စဲၣ်အဆၢဒီးစကဲကီၢ်ခီအပူၤအံၤ တၢ်ပၢၢ်ဆၢသုးပၥ်ဖှိၣ်တဖၣ် ထီၣ်ဒုးမၤန့ၢ်အီၤ ဖဲလါအ့ဖြ့ၣ်(၇)သီ ဟါ(၈)နၣ်ရံၣ်ဃၣ်ဃၣ်အဆၢကတီၢ်န့ၣ်လီၤ.
Ref:မောင်း
