လါအ့ဖြ့ၣ်(၉)သီ,၂၀၂၅နံၣ်
သုးကီၣ်ကးအတၢ်ပၢဆှၢဖီလၥ် ကညီကီၢ်စဲၣ်, ဖၣ်အၣ်ကီၢ်ရ့ၣ်, ခလီၢ်ကထဲး(ရှါယွၤသ့း၀့ၢ်) ပၢၤကီၢ်သုးတဖၣ်ပၣ်ဃုၥ် ၀ဲၤကျိၤ၀ဲၤဒ့ပှၤမၤတၢ်ဖိတဖၣ်အံၤ ပၥ်တ့ၢ်ကွံၥ်၀့ၢ်ဒီး သုးကွံၥ်အသး ဖဲလါမးရှးအလၢၥ်အဂ့ၢ် တၢ်သ့ၣ်ညါဘၣ်လၢ ဂံၢ်ခီၣ်ထံးသုးဂ့ၢ်၀ီတၢ်ကစီၣ်အအိၣ်န့ၣ်လီၤ.
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၇)ဟ့ၣ်ပလီၢ်လၢ သုးကီၣ်ကးအစုတီၤဖီလၥ် ဖၣ်အၣ်ကီၢ်ရ့ၣ်, လူပျဲၢ်ကီၢ်ဆၣ်, ရှါယွၤသ့း၀့ၢ် ၀ဲၤကျိၤ၀ဲၤဒ့ပှၤမၤတၢ်ဖိတဖၣ် ကဟးထီၣ်ကွံၥ်အဂီၢ်၀ံၤအလီၢ်ခံ အ၀ဲသ့ၣ်သုးကွံၥ်အသးအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
၀ဲၤကျိၤ၀ဲၤဒ့ပှၤမၤတၢ်ဖိတဖၣ်ဒ်အမ့ၢ် ပၢၤကီၢ်သုး, ပၢပြးတဖၣ်, လ၀က, တၢ်ဆဲးကျိးဆဲးကျၢ, ပှၤမၤကဆှဲကဆှီတၢ်တဖၣ်တဖၣ် ဟးထီၣ်ကွံၥ်လၢ၀့ၢ်ပူၤအဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ကးတံၥ်ဃၥ်စ့ၢ်ကီး ကၠိတဖၣ်အဃိ ကူၣ်သ့ပှၤမၤတၢ်ဖိတဖၣ်စ့ၢ်ကီး ပၣ်ဃုၥ်လၢပှၤဟးထီၣ်ကွံၥ်အကျါအဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
ကတီၢ်ခဲအံၤန့ၣ် သုးကီၣ်ကးသုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤတၢ်လူၢ်ခိၣ်တဖျၢၣ်အိၣ်တ့ၢ်ဒံးလၢ ရှါယွၤသ့း၀့ၢ်ပူၤန့ၣ်လီၤ. ဖဲလၢအပူကွံၥ် လါမးရှးတ၀ၥ်န့ၣ် သုးကီၣ်ကးအသုး ဟဲမၤပှဲၤအါထီၣ်တၢ်အီၣ်တၢ်အီလၢ သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤအံၤအပူၤ လၢကဘီယူၤအိၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအသုးကလၢၤတဖၣ်လၢအိၣ်ဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, သုးက့(၇)ဟီၣ်က၀ီၤ, ကၠီၣ်တဲၣ်-ပယီၤကီၢ်ဆၢဒီတကျိၤတဖၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ထီၣ်ဒုး၀ဲဒီးဖဲအပူၤကွံၥ်လါမးရှးအတီၢ်ပူၤန့ၣ် (KNLA)ထီၣ်ဒုးမၤန့ၢ်ဃၥ်၀ဲ သုးကီၣ်ကးချၢၣ်ဒ့သုးကလၢၤန့ၣ်လီၤ.
မ့မ့ၢ်လၢရှါယွၤသ့သုးတၢ်တိၥ်ကူၣ်ကျဲၤခိၣ်သ့ၣ်သုးကလၢၤတခီ အိၣ်၀ဲဒၣ်ဖဲ မဲးတလ့ၤ-ရှါယွၤသ့း-လူပျဲၢ်သိလ့ၣ်ကျဲမုၢ်အဖီခိၣ်အသိး အိၣ်ဘူး၀ဲဒၣ်စ့ၢ်ကီးဒီး ခ့ၣ်အဲၣ်ယူၣ်လီၢ်ခၢၣ်သး၀ဲၤလီၢ်ခိၣ်သ့ၣ်တၢ်လီၢ်န့ၣ်လီၤ.
ခီဖျိလၢအိၣ်ဘူး၀ဲဒၣ်ဒီး ခ့ၣ်အဲၣ်ယူၣ်လီၢ်ခၢၣ်သး၀ဲၤလီၢ်ခိၣ်သ့ၣ်သုးကလၢၤအံၤအဃိ သုးဂ့ၢ်၀ီတပၤ ဟဲမၤတံၥ်တၥ်၀ဲသ့အဂ့ၢ် ဂံၢ်ခီၣ်ထံးတၢ်ကစီၣ်စံး၀ဲန့ၣ်လီၤ.
သုးကီၣ်ကးအသုးလၢအိၣ်ဖဲ ရှါယွၤသ့းသုးတၢ်တိၥ်ကူၣ်ကျဲၤခိၣ်သ့ၣ်တဖၣ် ဟဲကွၢ်ဟုၣ်ကွၢ်စုၣ်တၢ်လၢဒြိတဖၣ်, ဒီးဟဲဒုးတၢ်လၢဒြိတဖၣ် ဆူခ့ၣ်အဲၣ်ယူၣ်-လီၢ်ခၢၣ်သး၀ဲၤလီၢ်ခိၣ်သ့ၣ်တၢ်လီၢ်အိၣ်၀ဲအဃိ တၢ်ဟးဂုၤဟးဂီၤတဖၣ် အိၣ်ထီၣ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
Ref: Hlaing Info
