လါအ့ဖြ့ၣ်(၈)သီ,၂၀၂၅နံၣ်
ကီၫ်ခိၣ်ဒီနၢၣ်ထရၢးဒီးဘံၣ်လံၣ်ယၣ်နၣ် အံၣ်လိၣ်မး(စ်)တဖၣ် လၢအမဲရကၤကီၫ်ပူၤ ပှၤအမဲရကၤဖိတဖၣ် ပာ်ဖျါထီၣ်တၫ်ပာ်သးန့ၣ်လီၤ.
ဒီနၢၣ်ထရၢးပဒိၣ်န့ၣ် ထုးထီၣ်ကွံာ် ဖဲၣ်ဒရၢၣ်ပှၤမၤတၫ်ဖိတဖၣ်လၢတၫ်မၤ၀ံၤ တၫ်ကဒီၣ်တဲာ်ကွံာ် ပဒိၣ်သူစ့တၫ်ရဲၣ်တၫ်ကျဲၤန့ၣ် မၤဟးဂီၤကွံာ်၀ဲအဃိ ဖဲလါအ့ဖြ့ၣ်(၅)သီအနံၤန့ၣ် အမဲရကၤထံဖိကီၫ်ဖိတဖၣ် မၤ၀ဲကမျၢၫ်တၫ်ပာ်ဖျါထီၣ် တၫ်ပာ်သးန့ၣ်လီၤ.
အံၣ်လိၣ်မး(စ်)န့ၣ် တီခိၣ်ရိၣ်မဲတၫ်မၤထီထီၣ်ပဒိၣ်ကံၫ်စီ၀ဲၤကျိၤ(DOGE)ဘၣ်ဆၣ် အ၀ဲန့ၣ်တမ့ၫ်ပှၤတဂၤလၢတၫ်ဃုထၢထီၣ်အီၤအသိး အလီၫ်လၤန့ၣ် ခီကရဲးတပာ်ဂၢၫ်ပာ်ကျၢၤ၀ဲဘၣ်အဂ့ၫ် ပှၤထီဒါတၫ်တဖၣ်တဲ၀ဲလီၤ.
တၫ်ရဲၣ်တၫ်ကျဲၤလၢ ပှၤအမဲရကၤဖိ ဘၣ်ဒိးသန့ၤထီၣ်အသးတဖၣ် တၫ်ကဒီၣ်တဲာ်ကွံာ်အဂီၫ် အံၣ်လိၣ်မး(စ်)န့ၣ် တီခိၣ်ရိၣ်မဲ DOGEအဂ့ၫ် ပှၤပာ်ဖျါထီၣ်တၫ်ပာ်သးလၢ ၀့ၫ်ခိၣ်၀ၣ်ရှ့ၣ်တၢၣ်တဂၤ စံးအၢစံးသီ၀ဲ၀ံၤ အံၣ်လိၣ်မး(စ်)အတၫ်မၤတဖၣ်န့ၣ် ပှၤကိးဂၤဒဲးသးဟးဂီၤ၀ဲအဂ့ၫ် တဲ၀ဲလီၤ.
ပှၤပာ်ဖျါထီၣ်အသးလၢခံတဂၤတဲ၀ဲလၢ အံၣ်လိၣ်မး(စ်)န့ၣ် ကြၢးမၤဒၣ်လၢအခီပနံာ်ကလဲၤတရံးသးအဂီၫ်၀ံၤ ကြၢးဟးထီၣ်ကွံာ်လၢပဒိၣ်မူဒါလီၫ်လၤဒီးအ၀ဲန့ၣ်မ့ၫ်ဒၣ်ဂဲၤလိာ်၀ဲလၢကမၤဟးဂီၤအမဲရကၤပဒိၣ်န့ၣ်လီၤ.
ဒီနၢၣ်ထရၢးတခီ စံးပတြၢၤဘၣ် အံၣ်လိၣ်မး(စ်)အတၫ်မၤနၢၤတဖၣ်လီၤ.အံၣ်လိၣ်မး(စ်)န့ၣ် လၢတၫ်ကဟ့ၣ်တၫ်ဆၢ ကတီၫ်လၢအခီပနံာ်တဖၣ်အဂီၫ် လၢစှၤလါအတီၫ်ပူၤ ဟးထီၣ်လၢပဒိၣ်မူဒါလီၫ်လၤသ့အဂ့ၫ် ထရၢးတဲသီၣ်တဲသဲ၀ဲလီၤ.
